Hebrews 5:8
"Aur bawajood beta hone ke us ne dukh utha utha kar farmanbardari seekhi."
Humein bataya gaya hai ke hamari najat ka bani dukhon ke zariye kamil kiya gaya, is liye hum jo gunahgar hain aur kamal se koson door hain, agar humein bhi isi tarah dukhon se guzarne ke liye bulaya jaye humein is par hairat nahi honi chahiye. Kya aisa ho sakta hai ke sar to kanton se zakhmi ho aur badan ke baqi aaza rahat ke makhmaleen bistar par jhoolain? Kya aisa ho sakta hai ke Masih ko taj pane ke liye khoon asham samandaron se guzarna pare aur hum sone ki jootiyan pehen kar khushk paon aasman ki janib kharaman kharaman chalain? Nahi, hamare maalik ka tajurba humein sikhata hai ke dukh zaroori hain, aur Khuda ka haqiqi farzand kabhi dukhon se bachna nahi chahe ga. Lekin Masih ke "dukhon ke zariye kamil hone" ki haqiqat mein ek intihi tasalli-bakhsh khyal maujood hai, woh yeh ke ab woh hamare sath mukammal hamdardi rakh sakta hai jaise likha hai ke "Hamara aisa sardar-e-kahin nahi jo hamari kamzoriyon mein hamara hamdard na ho sake". Masih ki is hamdardi mein humein sanbhalne wali quwwat milti hai. Ibtidai daur ke ek shaheed ne kaha tha ke "Main yeh sab bardasht kar sakta hoon, kyunke Yeshu ne dukh uthaya, aur woh ab mujh mein dukh uthata hai. Woh mere sath hamdardi rakhta hai, aur yahi baat mere iman ko mazboot banati hai." Ae imandar! Dukh aur karb ke sare lamhon mein is khyal ko mazbooti se thaam le. Jab tu us ke naqsh-e-qadam par chale to Yeshu ke dukhon ka tasawwur tujhe taqwiyat de. Us ki hamdardi mein ek sheereen sahara talash kar aur yaad rakh ke dukh uthana ek izzat ki baat hai balkeh Masih ke liye dukh uthana jalal ki baat hai. Rasool is baat par khush the ke Masih ki khatir sataye jane ke laiq thehraye gaye. Jis had tak Khuda humein Masih ke liye aur Masih ke sath dukh uthane ka fazl deta hai, itna hi woh hamari izzat ko barhata bhi hai. Ek Masihi ke jawahiraat us ki museebatein hain. Un shahi kahinon ki shahi khilat par jinhein Khuda ne dukhon ke liye masah kiya hai, un ki takleefein, un ke gham aur un ke dukh heeron aur jawahiraat ki tarah hain. Is liye, humein dukhon se katrana nahi chahiye. Humein dukhon ke zariye sarfraz-i pane se munh nahi morna chahiye. Dukh humein sarfraz karte hain aur museebatein hamare liye sar-bulandi paida karti hain jaise likha hai ke "Agar hum dukh uthayain ge to us ke sath badshahi bhi karain ge".
Song of Solomon 5:6
"Main ne use pukara par us ne mujhe kuch jawab na diya."
Dua kabhi kabhi saail ki tarah darwaze par thehri rehti hai, jab tak ke badshah bahar aa kar us ki jholi un barakat se bhar na de jin ki woh talib hai. Yeh dekha gaya hai ke jab Khudawand ne kisi ko bara iman bakhsha, to us ne taveel takheer ke zariye use azmaya bhi. Us ne apne khadmon ki awazon ko pittal ke aasman se takra kar wapas unhi ke kanon mein goonjne diya hai. Unhon ne sunehri darwaze par dastak di, lekin us mein koi junbish na hui, goya us ke qabzon ko zang lag gaya ho. Yarmiyah ki tarah, unhon ne pukara, "Tu badilon mein mastoor hua takeh hamari dua tujh tak na pohanche". Isi tarah sacche muqaddasin jawab ke bagehir taveel arse tak sabr ke sath intizar karte rahe hain, is liye nahi ke un ki duain pur-josh, pur-zor aur pur-asar na thin ya woh maqbul na thehrain, balkeh is liye ke is mein usi ki maslihat thi jo Hakim-e-Aala hai aur jo apni marzi ke mutabiq ata karta aur jawab deta hai. Agar woh chahta hai ke hamare sabr ki azmaish ho, to kya woh apni cheez ke sath jo chahe na kare? Mangne walon ko waqt, jagah ya tariqe ke intikhab ka haqq nahi hota. Lekin humein muhtat rehna chahiye ke dua mein takheer ko inkar na samajhain. Khuda ke taveel muddati wade apne waqt par poore kiye jayain ge. Is liye humein shaitan ko yeh moqa nahi dena chahiye ke woh hamari ghair-maqbul duon ki taraf ishara kar ke sachaee ke Khuda par hamare itimad ko mutazalzal kare. Jin iltajon ka jawab nahi mila, woh an-suni nahi rahain gi. Khuda ke paas hamari duon ka baqaida daftar maujood hai. Woh hawa mein be-simt ur nahi jatain, balkeh badshah ke zakhira-khane mein mehfooz ho jati hain. Aasmani adalat mein ek aisa register bhi hai jahan har dua darj ki jati hai. Ae azmuda imandar! Tere Khudawand ke paas ek sheeshe ka aisa martaban hai jis mein muqaddas gham ke qeemti aansu rakhe jate hain, aur ek kitab hai jis mein teri paak siskiyon ka shumar darj hota hai. An-qareeb teri faryad rang laye gi. Kya tu itminan aur sabr se thori der nahi kar sakta? Kya tere Khudawand ka waqt tere waqt se behtar na hoga? Bahut jald woh teri rooh ki khushi ke liye sukoon-bakhsh surat mein zahir hoga, aur tujh se taveel intizar ke taat aur raakh ko door kar ke tujhe poori murad pane ke qirmizi aur maheen malmal ke libas se aarasta kare ga.