Matthew 26:39
"Phir zara age badha aur munh ke bal gir kar... dua ki."
Azmaish ki is ghari mein hamare munajji ki is dua mein hamare liye kai sabaq-amoz pehlu paye jate hain. Yeh khalwat ki dua thi. Is dauran woh apne teen qaribi shagirdon se bhi alag ho kar tanhai mein chala gaya. Ae imandar! Tu bhi aksar khalwat mein ja kar khub dua kiya kar, khas taur par azmaish ke waqton mein aur bhi zyada. Khandani dua, ijtamayi dua aur kalisiyayi dua kafi nahin hogi agarche yeh sab bahut qimti hain, lekin teri shakhsi riyazat ke bakhur-dan se behtarin rahat-angez khushbu us waqt uthegi jab Khuda ke siwa koi dusra kaan sunne wala na ho. Yeh ajzi ki dua thi. Luqa kehta hai ke us ne ghutne tek kar dua ki, magar yahan Matti kehta hai ke us ne "munh ke bal gir kar" dua ki. To phir is azim Khudawand ke haqir khadim! Teri jagah kahan honi chahiye? Tere sar par to khak aur raakh honi chahiye! Ajzi hamen dua mein mazbut qadam jamane ka mauqa deti hai. Khuda ke huzur frutni ke siwa kamyabi ki aur koi kunji nahin taka woh hamen waqt par sar-buland kare. Yeh ek farmanbardar farzand ki dua thi. "Ae Abba, ae Bap!". Azmaish ke din aap apne le-palak farzand hone ke istaihqaq ko ek mazbut panah-gah ke taur par mahsus karen ge. Ek ra-aya ke taur par aap ke pas ab koi huquq nahin rahe kyunke nasl-e-Adam hone ke nate ham ne apni sarkashi ke bais unhen kho diya hai albatta koi chiz ek farzand ke liye apne bap ki farzandiyat ke haqq ko khatm nahin kar sakti. Yeh kehne se na daren ke "Ae mere bap, meri faryad sun". Ghaur kijiye ke yeh imaan ki mazbuti ke liye dua thi. Us ne teen baar dua ki. Jab tak aap ghalib na a jayen, himmat na haaren. Us nadar bewa ki tarah banen jis ne musalsal faryad kar kar ke woh kuch hasil kar liya jo woh apni chand darkhwaston ke zariye hasil nahin kar pai thi. Dua mein mashghul rahen aur shukr-guzari ke sath is mein mustaid rahen. Akhir mein, yeh supardagi ki dua thi. "Tau bhi na jaisa main chahta hun balki jaisa tu chahta hai waisa hi ho." Jhuk jaiye, to phir Khuda bhi mutawajja hoga. Sab kuch Khuda ki marzi par chhor dijiye, aur phir Khuda behtarin faisla kare ga. Apni munajat ko us ke hathon mein saunpne ke baad itminan se us ki shukr-guzari kijiye kyunke wahi behtar janta hai ke aap ko is dua ka jawab kab dena hai, kaise dena hai, kya dena hai aur kya nahin dena. Is tarah intihati ishtiyaq, frutni, ajzi aur supardagi ke sath dua karne se aap zarur ghalib a jayen ge.
John 17:24
"Ae Bap! Main chahta hun ke jinhen tu ne mujhe diya hai jahan main hun woh bhi mere sath hon."
Ae maut! Tu us darakht ko kyun chhuti hai jis ki phaili hui shakhon ke niche thake mande aram pate hain? Tu zamin ke un behtarin logon ko kyun chhin leti hai jo sari duniya ke liye shadmani aur fakhr ka bais hote hain? Agar tujhe apna kulhara chalana hi hai, to un darakhton par chala jo koi phal nahin dete, tab shayad ham bhi tera shukriya ada karne walon mein se hote. Lekin tu luban ke khubsurat deodaron ko kyun girati hai? Apna kulhara rok le aur rastbazon ko chhor de. Lekin nahin, aisa nahin ho sakta. Maut hamare behtarin doston ko daboch leti hai. Intihayi sakhi, nihayat dua go, be-had pakiza aur behtarin aqidat mand logon ka muqaddar bil-akhir marna hi hai. Aur kyun? Yeh Yasu ki isi dua ki wajah se hai ke "Ae Bap! Main chahta hun ke jinhen tu ne mujhe diya hai jahan main hun woh bhi mere sath hon." Yahi woh dua hai jo unhen goya uqab ke paron par sawar kar ke asman par le jati hai. Har baar jab koi imandar is zamin se firdaus ki taraf parwaz karta hai, to woh Masih ki dua ka jawab ban jata hai. Kisi nek aur qadim muqaddas shakhsiyat ne kya khub kaha hai ke "Kai baar Yasu ke log dua mein us ke ain bar-aks iltija kar rahe hote hain. Aap dua mein apne ghutne jhukate aur kehte hain 'Ae Bap! Main chahta hun ke tere muqaddasin hamesha hamare pas rahen'. Jabke Masih kehta hai ke 'Ae Bap! Main chahta hun ke jinhen tu ne mujhe diya hai jahan main hun woh bhi mere sath hon'." Is tarah koi bhi shagird kisi bhi muamle mein apne Khudawand ke maqsad ke ain bar-aks bhi iltija kar sakta hai magar aisa hona nahin chahiye. Ruh ek hi waqt mein do jagahon par nahin reh sakti. Aap ka aziz ek hi waqt mein Masih ke pas aur aap ke pas nahin reh sakta. Ab sawal yeh hai ke kis ki iltija rang laye gi? Agar aap ko ikhtiyar diya jaye yani agar badshah apne takht se niche aye aur kahe ke "Yahan do faryadi hain jo ek dusre ke khilaf dua kar rahe hain, kis ki dua ka jawab diya jaye?", to mujhe yaqin hai ke aap ke liye yahi behtar hoga ke aap fauran khade ho kar kahen ke "Ae Yasu! Meri nahin balki teri marzi puri ho". Agar aj aap is baat ka idrak kar len ke Masih dusri taraf yeh dua kar raha hai ke "Ae Bap! Main chahta hun ke jinhen tu ne mujhe diya hai jahan main hun woh bhi mere sath hon", to aap apne aziz ki zindagi ke liye apni aisi dua se dast-bardar ho jayen ge. Ae Khudawand! Woh tere sath rahen. Imaan ke wasila se ham unhen tere supard karte hain.