Romans 4:20
"Imaan mein mazbut."
Ae Masihi! Apne imaan ki khub hifazat kar aur yaad rakh ke imaan hi woh wahid rasta hai jis ke zariye tu barkat hasil kar sakta hai. Agar ham Khuda se barkat hasil karna chahte hain, to imaan ke siwa koi chiz unhen niche nahin la sakti. Koi dua Khuda ke takht se jawabat nahin khinch sakti siwaye us shakhs ki pur-josh dua jis ke sath imaan shamil ho. Yeh imaan hi hai jo imandar aur jalal mein maujud Khudawand Yasu ke darmiyan kisi farishte ki tarah paigham-rasani ka kaam karta hai. Agar imaan ko darmiyan se hata diya jaye, to na hamari dua upar ja sakti hai aur na hi asman se koi jawab niche a sakta hai. Imaan woh taar hai jo zamin aur asman mein rabta qayam karti hai aur phir jab yeh rabta munsalik ho jata hai to Khuda ke muhabbat bhare paighamat itni tezi se ana jana shuru ho jate hain ke hamare pukarne se pehle hi woh jawab deta hai, aur jab ham hanoz keh nahin chukte to woh sun leta hai. Lekin agar imaan ki yeh taar tut jaye, to ham wada kaise hasil kar sakte hain? Kya main musibat mein hun? Main imaan ke zariye musibat mein madad hasil kar sakta hun. Kya main dushman ke hathon dukh utha raha hun? Meri ruh imaan ke zariye apni panah-gah par takiya karti hai. Lekin imaan ko hata den to mera Khuda ko pukarna bekar hai. Meri ruh aur asman ke darmiyan phir koi wasta nahin. Sakht-tarin sardi ke mausam mein bhi imaan woh sadak hai jis par dua ke ghode safar kar sakte hain balki karkarati baraf mein to yeh aur bhi behtar kaam karti hai, lekin agar rasta hi band ho jaye, to ham azim badshah se rabta kaise kar sakte hain? Imaan mujhe alohiyat se jorta hai. Imaan mujhe Khuda ki qudrat ka libas pehnata hai. Imaan Yehovah ki qudrat-e-kamila ka rukh meri janib mor deta hai. Imaan meri hifazat ke liye Khuda ki har sifat ko yaqini banata hai. Yeh jahannam ke lashkaron ko lalkarne mein meri madad karta hai. Yeh mujhe apne dushmanon par fatah pane ke qabil banata hai. Lekin imaan ke bighair main Khudawand se kaise kuch pa sakta hun? Jo shak karta hai woh samundar ki lahar ki manand hai aur woh yeh umeed na rakhe ke woh Khuda se kuch paye ga. Pas ae imandar! Apne imaan ki khub hifazat kar kyunke is ke sath tu sab kuch jit sakta hai khwah tu kitna hi gharib kyun na ho, lekin is ke bighair tu kuch hasil nahin kar sakta. "Kya! Agar tu kar sakta hai! Jo itiqad (imaan) rakhta hai us ke liye sab kuch ho sakta hai".
Ruth 2:14
"So us ne khaya aur sair hui aur kuch rakh chhora."
Jab kabhi hamen woh roti khane ka istaihqaq milta hai jo Yasu deta hai, to ham Rut ki tarah us bharpur aur shirin ziyafat se khub sair ho jate hain. Jab Yasu mizban ho to koi bhi mehman dastar-khwan se khali hath nahin jata. Hamara sar Masih ki besh-qimat sachai se asuda ho jata hai, hamara dil Yasu ki muhabbat se sarshar ho jata hai aur hamari umeed itminan pati hai, kyunke asman par Yasu ke siwa hamara kaun hai? Naiz hamari har ruhani ishtaha bhi puri ho jati hai, kyunke koi imandar is se zyada kya chah sakta hai ke woh "Masih ko hasil kare aur us mein paya jaye"? Yasu hamare shaur ko apni hikmat se asuda kar aur woh hamare fahm ko apni talim se arasta karta hai. Woh hamari yaddasht ko apni yadgari se aur hamare tasawwur ko apne ilahi khayalat se munawwar kar deta hai. Jaise Rut "sair hui aur kuch rakh chhora", waisa hi hamare sath bhi hota hai. Ham bhi khub ji bhar kar us ki huzuri se sair hue hain aur us ki mamuri ne hamari ruhon ko sairab kar diya hai yahan tak ke ab ham ne dusron ke sath bantne ke liye bhi bahut kuch rakh chhora hai. Ham Khudawand ki muhabbat ke dastar-khwan par baithe aur kaha ke "Khudaye-lamahdud ke siwa koi hasti ya chiz mujhe sair nahin kar senti. Main itna bada papi hun ke mujhe apne gunah dhone ke liye lamahdud fazl chahiye". Aur phir yeh fazl ham par jari hua aur hamare gunah mita diye gaye aur ham ne paya ke fazl par fazl yani zarurat se kahin zyada fazl. Khuda ki har barkat lamahdud aur lamatnahi hai. Us ke kalam mein abhi itni aur aisi shirin baten baqi hain jin se ham ne abhi tak pura lutf nahin uthaya, aur jinhen ham kuch der ke liye chorne par majbur hain, kyunke ham un shagirdon ki manand hain jin se Yasu ne kaha tha ke "Mujhe tum se aur bhi bahut si baten kehna hai magar ab tum un ki bardasht nahin kar sakte". Ji han, fazl ke kuch aise darje hain jin tak ham hanoz nahin pahonche. Masih ke sath rafaqat mein kai aise maqamat hain jin tak ham ne abhi tak rasai hasil nahin ki, aur mukashfat ki abhi mutaddad aisi bulandiyan baqi hain jin tak hamari dastras nahin. Muhabbat ki har ziyafat mein tukron ke bahut se tokre baqi reh jate hain. Aiye ham apne azim Boaz ki fayazi ke liye us ki shukr-guzari karen!