Song of Solomon 5:16
"Haan woh sarapa ishq-angeiz hai."
Yesu apne husn-e-kamil aur jaho-jalal mein fi-al-haqiqat nihayat pur-kashish aur qabil-e-deed hai jo mahz laiq-e-sataish-o-mohabbat hi nahin balkay qabil-e-ishq bhi hai. Woh sirf dilkash aur khoobsurat hi nahin, balkay woh sarapa ishq-angeiz hai yani use ek nazar dekhte hi insan ko us se ishq ho jata hai. Wah, "ishq-angeiz" kya hi sunehri istalah hai aur yaqeenan Khuda ke log hi is khoobsurat lafz ke istemal ko poori tarah durust sabit kar sakte hain, kyunke Masih ki zaat un ki shadeed tareen mohabbat ka markaz-o-mihwar hai. Ae Yesu ke shagirdo! apne malik ke labon ko dekho aur kaho ke "kya woh nihayat shireen nahin hain?" Jab woh raah mein tum se baatein karta hai to kya us ke alfaz tumhare dilon ko garma nahin dete? Ae Immanuel ke parastaro! us ke sar ki taraf dekho jo kundan hai, aur mujhe batao ke kya us ke khayalat tumhare liye besh-qeemat nahin hain? Jab tum us chehre ka deedar pate hi aajzi se us ke samne sar-nigoon ho jate ho jo Lubnan ke saroo ki manind sar-sabz aur sanobar jaisa aali-shaan hai, to kya usi lamhe tumhari aqidat ishq ki mithas se bhar nahin jati? Kya us ka har naqsh kamal aur us ki zaat ka har wasf pur-jalal nahin, aur kya us ki poori zaat sarchashma-e-husn-o-ishq nahin ke kanwariyan us par farefta na hon? Kya us ke jalali badan ka koi uzv aisa hai jo be-misal nahin? Kya us ki zaat ka koi aisa hissa hai jo hamari roohon ke liye miqnatis-i asar nahin rakhta? Hum us ke ishq mein mubtala ho kar sari zindagi us ki pairwi karna chahte hain. Hum us ke poore kirdar ki chhaap apni zindagiyon par dekhna chahte hain. Doosri tamam hastiyon mein kahin na kahin koi kami zaroor payi jati hai, magar us ki zaat kamliyat ki haqiqi aaina-dar hai. Us ke pasandida tareen muqaddaseen ke libason par bhi daagh aur mathon par shikanen rahi hain lekin woh khud sarapa husn-o-ishq hai. Zameen ke tamam khursheedon mein dhabbe paye jate hain, is khoobsurat duniya mein bhi bayaban maujood hai, hum kisi bhi dilkash tareen cheez ke har pehlu se mohabbat nahin kar sakte, lekin Masih Yesu woh khalis sona hai jis mein ratti barabar bhi khot nahin. Woh aisi potar roshni hai jis mein koi tariki nahin. Woh aisa jalal hai jis mein koi saya nahin. "Haan, woh sarapa ishq-angeiz hai."
John 15:4
"Mujh mein qaim raho."
Masih ke saath rafaqat har bimari ka yaqeeni aur shafi ilaj hai. Chahe woh dukh ki karwahat ho ya dunyawi lazzaton ki bezar-kun kasrat, Khudawand Yesu ke saath qareebi taluq ek se talkhi ko door kar de ga aur doosre se uktahat ko. Ae Masihi! Yesu ke qareeb reh, phir yeh baat sanwi ahmiyat ki hamil ho gi ke tum izzat ke pahar par rehte ho ya aajzi ki wadi mein. Yesu ke qareeb rehte hue tum Khuda ke paron ke saye mein ho aur us ke azli bazu sahare ke liye tumhare neeche sada maujood hain. Koi bhi cheez tumhein is pakiza taluq se baaz na rakkhe jo us rooh ka turra-e-imtiaz hai jis ka rishta is mehboob-e-barhaq se jurr chuka hai. Kabhi kabhaar ki mulaqat par iktifa na karo balkay hama-waqt us ki rafaqat qaim rakhne ki justuju karo, kyunke sirf us ki huzoori mein hi tumhari tasalli aur salamati hai. Yesu hamare liye mahz ek aisa dost nahin hona chahiye jo kabhi kabhaar milne aata ho, balkay woh aisa dost ho jo har qadam par aap ke saath saath chale. Tumhare samne ek mushkil rasta hai. Ae aasman ke musafir! Dekhna ke tum apne rahnuma ke baghair kabhi na chalo. Tumhein aag ki bhatti mein se guzarna hai aur us mein us waqt tak dakhil mat hona jab tak Sadrak, Mesak aur Abed-nego ki tarah ilahi-zada tumhara sathi na ho. Tumhein apni hi bad-kariyon ke Yericho ko bhi fatah karna hai aur is jang ka irada bhi tab tak na karna jab tak Yashua ki tarah tum Khudawand ke lashkar ke sipah-salar ko haath mein nangi talwar liye na dekh lo. Tumhein apni kai azmaishon ke Esau se milna hai. Us ke saath bhi us waqt tak na milna jab tak Yabbok ke nale par tum farishte ko pakar kar us par ghalib na aa jao. Har surat aur har haal mein tumhein Yesu ki zaroorat hogi. Lekin sab se barh kar us waqt jab maut ke aahni darwaze tumhare liye khulein ge. Apni rooh ke dulha ke qareeb raho, apna sar us ke seene par rakkho, aur us ki qurbat se tar-o-taza ho jao. Tab hi, aakhir-kar, tum us ke huzoor be-aib, be-daagh, be-jhurri aur paak thehro ge. Chunke tum yahan barabar us ke saath rahe aur us ki qurbat in apni sari zindagi guzari, is liye tum abad-ul-abaad us ki qurbat mein qaim raho ge.