Najaat Khuda ka kaam hai. Yeh wahi akela hai jo "apne qusooron aur gunahon ke sabab se murda" zindagiyon ko zinda karne ki qudrat rakhta hai aur yeh wahi hai jo insani jaan mein ruhani zindagi ko qaim-o-daim bhi rakhta hai. Woh "Alpha aur Omega" dono hai. "Najaat Khudawand ki taraf se hai". Agar mein dua-guzar hoon to mujhe dua ki taufiq dene wala Khuda hai, agar mujh mein kuch khoobiyan payi jati hain to woh bhi Khuda hi ki bakhshi hui neimatein hain, aur agar mein rah-e-mustaqeem par qaim hoon to yeh bhi isi liye hai ke us ne mujhe apne haath se thaam rakha hai. Mein apni hifazat ke liye az-khud kuch nahin karta siwaye is ke jo Khuda ki taraf se mere liye ilahi muhafazat ka intizam karta hai. Kyunke mere paas jo kuch bhi hai aur meri sari naiki faqat Khudawand hi ki taraf se hai. Jahan jahan mein gunah karta hoon woh mera apna hai lekin jahan jahan mein koi naik kaam karta hoon woh poori tarah Khuda ki taraf se mere wasile amal mein laye jate hain. Agar mein ne kisi ruhani dushman ko shikast di hai to Khudawand ki taqat ne mere bazuon ko himmat bakhshi hai. Kya mein logon ke samne ek pakiza zindagi guzarta hoon? To yeh mein nahin balkay Masih hai jo mujh mein zinda hai. Kya mein muqaddas hoon? To mein ne khud ko paak aur saaf nahin kiya balkay Khuda ke Pak Rooh ne meri taqdis ki hai. Kya mera dil duniya se uchaat ho chuka hai? To Khuda ki us islahi tarbiyat ne mujhe duniya se door kiya hai jo meri bhalayi ke liye thi. Kya mein marifat mein taraqqi kar raha hoon? To mera azeem ustad yani Rooh-ul-Quds mujhe sikhane wala hai. Mujhe apni zaroorat ki har cheez Khuda se milti hai lekin apni zaat mein mujhe gunah aur dukh ke siwa kuch nazar nahin aata kyunke sirf "wahi meri chatan aur meri najaat" hai. Kya mein kalam se ghiza pata hoon? Agar Khudawand use meri rooh ki ghiza na banata to woh kalam mere liye kabhi khorak na banta. Kya mein is aasmani mann ke bal-boote par zinda hoon? To woh mann khud mujassam Yesu Masih hai jis ke badan aur khoon se mein ruhani zindagi kasheed karta hoon. Kya mein musalsal nayi quwwat pa raha hoon? Mein apni quwwat aur kumak kahan se hasil karta hoon? Meri kumak aasman ke paharon se aati hai kyunke Yesu ke baghair mein kuch nahin kar sakta. Jis tarah koi daali angoor ke darakht mein qaim rahe baghair phal nahin la sakti waise hi mein bhi kuch nahin kar sakta jab tak ke mein us mein qaim na rahoon. Pas jo kuch Yunah ne gehre samundar mein seekha wahi mein bhi aaj subah apni tanhai mein seekh loon ke "Najaat Khudawand hi ki taraf se hai".

Yeh usool dekhne mein bohat ajeeb lagta hai lekin is mein ek gehri hikmat poshida thi kyunke bimari ka is tarah bahar nikal aana is baat ka saboot hota tha ke insani badan andar se theek aur tandurust hai. Aaj ki shaam hamare liye is anokhe qaide se ek ruhani sabaq seekhna bohat zaroori hai kyunke hum bhi ruhani taur par korh-zada hain aur yeh qanoon hum par bhi sadiq aata hai ke jab ek insan khud ko mukammal taur par gunahon mein mustaghriq aur tabah haal pata hai to use mahsoos hota hai ke us ki zindagi ka koi bhi hissa ab napaki se khali nahin raha. Phir jab woh apni har tarah ki naiki aur rastbaazi se inkar kar ke Khudawand ke huzoor apne gunahon ka iqrar karta hai to woh Yesu ke khoon aur Khuda ke fazl ke wasilah se paak ho jata hai. Darasl poshida aur aisa gunah jis ka iqrar na kiya gaya ho wahi asl korh hai lekin jab gunah nazar aa jaye aur use mahsoos kar liya jaye to samajh lein ke use ek kaari zarb lag chuki hai aur Khudawand aisi tarapti aur taib rooh par rahmat ki nazar zaroor dalta hai kyunke khud ko naik samajhne se zyada khatarnak koi cheez nahin aur gunahon par sharminda hone se zyada pur-umeed kuch nahin. Humein yeh manna chahiye ke hum gunah ke majmuaye ke siwa kuch nahin hain kyunke yahi mukammal sachayi hai aur agar Rooh-ul-Quds humein gunah ka ehsas dila raha hai to phir iqrar karna mushkil nahin hoga balkay yeh khud-ba-khud hamare labon se jari ho jaye ga. Yeh aayat un gunahgaron ke liye bari tasalli ka bais hai jo sidq-e-dil se apni asli halat se waqif hain kyunke wahi baat jo unhein bohat zyada mayoos kar rahi thi ab yahan un ki behtari ki alamat ban chuki hai. Yaad rakhein ke naya libas pehnne se pehle purana utarna parta hai aur imarat banane se pehle zameen khod kar buniyaad banani parti hai. Isi tarah gunah ka bharpoor ehsas dil mein fazl ke shuru hone ki alamat hai. Is liye, ae gunahgar korhi! jis ka koi hissa tandurust nahin hai, yeh kalam tere liye bari tasalli aur tashaffi ka paigham hai ke tu jis bhi haal mein hai waise hi Yesu ke paas chala aa.
"Hamara qarz chahe kitna hi zyada ho ya kam,
Jab dene ko kuch na ho to Khuda mitata hai har gham.
Kamil gharibi hi rooh ko azad karti hai,
Zara si bhi khud-raasti rahai mein rukawat banti hai."