Koi bhi waada niji tashreeh ka hamil nahin. Jo kuch Khuda ne kisi ek muqaddas se farmaya hai, wahi us ne sab ke liye bhi farmaya hai. Jab woh kisi ek imandar ke liye kunwan kholta hai, to us ka yeh faiz aam hota hai. Jab woh kisi ek faqa-kash muqaddas ko khilane ke liye apne zakheera-khane ka darwaza kholta hai, to sare bhooke muqaddaseen aa kar apni bhook mita sakte hain. Al-gharaz, chahe us ne Abraham ko mukhatib kar ke kuch kaha ho ya Musa se koi kalam kiya ho, woh kalam us ke tamam muqaddason ke liye hai. Is liye ae imandar! Tu har ahed ki nasl ke saath barabar ka shareek hai. Khuda ki koi barkat aisi nahin jo teri dastras se buland ho aur koi rahmat aisi nahin jise tu samait na sake. Is liye, abhi apni aankhein utha kar poorab se pacham aur uttar se dakhan ki taraf dekh kyunke yeh sab tera hai. Pisgah ki choti par charh ja aur nazar ghuma kar ilahi waade ki aakhri had tak dekh le, kyunke yeh sari mauooda sar-zameen teri milkiyat hai. Aab-e-hayat ka koi chashma aisa nahin jis se tu apni pyas bujha nahin sakta. Agar teri sar-zameen mein doodh aur shehad behta hai to sair ho kar doodh aur shehad se faizyab ho kyunke yeh dono tere liye hain. Tu apne is iman mein mazboot ban kyunke us ne khud farmaya hai ke "Main tujh se hergiz dast-bardar na hoon ga aur kabhi tujhe na choroon ga." Is waade mein, Khuda sab kuch apne logon ko de chuka hai. "Main tujhe kabhi nahin choroon ga." To phir Khuda ki koi sifat aisi nahin jis se hum bharpoor istifada na kar sakein. Kya woh qadir hai? Woh apni zaat ko un ki khatir zaroor qawi dikhaye ga jo us par bharosa rakhte hain. Kya woh sarapa mohabbat hai? Phir woh apni shafqat se hum par zaroor raham kare ga. Jo kuch us ki uluhiyat ka khasa hai, us mein se koi har ek wasf bharpoor tariqe se hamari bhalayi aur barkat ke liye baroye-kar laya jaye ga. Aaiye, darya ko kooze mein band kar dete hain yeh kehte huay ke, aisi koi cheez hai hi nahin jo aap chahein, aisi koi cheez hai hi nahin jo aap mang sakein, aisi koi cheez hai hi nahin jis ki aap ko fi-al-waqt ya abdiyyat mein zaroorat par sake, aisi koi zinda cheez hai hi nahin, aisi koi marne wali cheez hai hi nahin, is duniya mein aisa kuch hai hi nahin, agli duniya mein aisa kuch hai hi nahin, fil-haal aisa kuch hai hi nahin, jee uthne ki subah ke hawale se aisa kuch bhi nahin, aasman mein aisa kuch hai hi nahin jo is aayat ke andar maujood na ho yani "Main tujh se hergiz dast-bardar na hoon ga aur kabhi tujhe na choroon ga."

Aap ko apni saleeb az-khud banane ka koi ikhtiyar nahin, agarche bey-imani saleeb tarashne mein ek mahir barhai jaisi maharat rakhti hai, na hi aap ko apni saleeb az-khud muntakhib karne ki ijazat hai, agarche azad marzi aap ki zindagi par qabiz hona aur use apni giraft mein rakhna chahti hai, albatta aap ki saleeb ilahi mohabbat ke tehat aap ke liye pehle se tayyar aur muqarrar ki ja chuki hai, aur ab aap ko use khushi se qabool karna hai yani aap ko apni saleeb ko apne liye chunida nishan aur bojh ke taur par uthana hai, aur us par koi hujjat nahin karni. Aaj ki raat, Yesu aap ko apne kandhe apne narm-o-mulayam joye ke neeche lane ka hukm deta hai. Bey-adbi ka muzahira karte huay use laat mat marein, ya laaf-zani mein use pamal na karein, ya be-chargi ke saath us ke neeche mat aayein, ya khauf kha kar us se door mat bhagein, balkay Yesu ke ek sache pairowkar ki tarah use fakhr ke saath apne upar utha lein. Yesu khud bhi ek saleeb-bardar tha aur isi liye woh gham ki raah mein apne saleeb-bardaron ki agwai-o-rahnumai karta hai. Yaqeenan, aap is se behtar rahnuma ki khwahish nahin kar sakte thay! Aur agar us ne saleeb uthayi, to aap is se zyada bare bojh ki kya khwahish karein ge? Saleeb ki raah salamati ki raah hai, is ke khardar raston par chalne se har giz na darein. Ae azeez qari! Saleeb paron se nahin bani hoti, na hi is mein makhmal laga hota hai magar yeh nafarmani ke aadi kandhon ke liye bahut bhari aur aziyat ka bais hoti hai. Albatta yeh lohe ki saleeb bhi nahin hai, agarche aap ke khauf ne is par fouladi rang charha diya hai, magar yeh lakri ki saleeb hai, aur koi bhi insan ise ba-asani utha sakta hai, kyunke hamara Khudawand aur humein is saleeb ko uthane ka hukm dene wala mard-e-ghamnak khud bhi is bojh ko azma chuka hai. Is liye aaiye, apni apni saleeb uthayein, aur Khuda ki Rooh ki qudrat se aap jald hi us ki mohabbat mein is qadar giraftar ho chuke hon ge, ke Musa ki tarah, aap bhi Masih ki tanbih aur malamat ke iwaz Misr ke tamam khazanon ka tabadla nahin karein ge. Yaad rakhein ke is saleeb ko Yesu ne uthaya tha, aur ab yeh aap ke liye utni bhari nahin rahi balkay aap ko is se meethi khushbu aaye gi. Yaad rakhein ke jald hi is ke baad aap ko jalali taaj mile ga, aur aane wale az-had bhari jalal ke samne hamari maujooda musibat bahut halki aur faqat dam bhar ki hai. Khudawand aap ki madad kare ke aaj raat sone se pehle aap apni rooh ko ilahi marzi ke tabay kar dein, takay kal ke suraj ke saath jagte huay, aap aane wale kal ki saleeb ko bari dileri aur bahaduri ke saath utha sakein jo Masihe-Masloob ke har pairowkar ke shayan-e-shan hai.