Jo quwwat Khuda apne Yusufon ko deta hai woh ek haqiqi quwwat hai. Yeh koi sheikhi baghaarne wali bahaduri hai na koi afsanvi taqat, ya koi aisi quwwat jis ke baare mein log aksar deogira-mali qism ki batein karte hain magar us ka anjam hamesha nakami par hota hai. Yeh haqiqi ilahi quwwat hai. Yusuf azmaish ke khilaf kyun qaim reh paya? Kyunke Khuda ne use apni quwwat aur madad ata farmayi. Khuda ki quwwat ke baghair hum kuch nahin kar sakte. Tamam haqiqi quwwat "Yaqub ke Qadir Khuda" se sadir hoti hai. Zara ghaur kijiye ke Khuda ne kis tarah ek nihayat mubarak aur babarkat tariqe se Yusuf ko apni is quwwat se hum-kanar kiya, "Us ke hathon aur bazuon ne Yaqub ke Qadir ke haath se quwwat payi". Is lafzi tasveer mein Khuda ko Yusuf ke hathon par apne haath rakhte huay, aur Yusuf ke bazuon par apne bazu rakhte huay dikhaya gaya hai. Jaise koi baap apne bachon ko sikhata hai, waise hi Khudawand apna khauf manne walon ko sikhata hai. Woh apne bazu un par phelata hai. Yeh kaisi hairat-angez aajzi hai ke Qadir-e-Mutlaq, Azli aur Qadir Khuda, apne takht par se jhuk kar apne farzand Yusuf ke haath par apna haath rakhta, aur us ke bazu par apna bazu phela kar use apna zor ata karta hai. Yeh quwwat ahed ki quwwat bhi thi, kyunke ise "Yaqub ke Qadir Khuda" se mansoob kiya gaya hai. Ab, Bible Muqaddas mein aap jahan kahin bhi Yaqub ke Khuda ki babat parhein, aap ko Khuda ki janib se Yaqub ke saath kiya gaya ahed bhi yaad aana chahiye. Masihi imandar Khuda ke ahood par soch-bichar karna pasand karte hain. Sari qudrat, sara fazl, sari barkat-tein, sari rahmatein, sari tasalliyan, al-gharaz woh sab neimatein jo is waqt hamare paas hain, woh usi manba se ahed ke zariye hum tak pohanchti hain. Agar koi ahed na hota, to fi-al-haqiqat andhere mein taamak-toiyan maar rahe hote, kyunke sara fazl ahed ke raste ain usi tarah jari hota hai, jaise suraj se roshni aur hararat. Yaqub ki seerhi ke baghair koi farishta utar ya charh nahin sakta jis ke ek sire par Yaqub aur doosre par ahed karne wala Khuda khara tha. Ae Masihi, ho sakta hai ke teer-andazon ne tujhe bohat dilgeer kiya ho, aur apne jalte huay teeron se tujh par tabarr-torr hamle kar kar ke tujhe buri tarah ghayal kar diya ho magar phir bhi teri kaman mazboot aur teri quwwat qaim rahe gi kyunke Abraham, Ishaq aur Yaqub ke saath waade aur ahed karne aur unhein nibhane wala Khuda tere saath hai.

Yehovah "qahar karne mein dheema hai". Jab Khuda duniya par apni rahmat jari karta hai to woh rahmat paron wale subuk-raftar aur aatishi ghoron aur barq-raftar rathon par safar karti hai magar jab us ka ghazab jari hota hai, to woh use dheemi raftar se chalne wali sawari ke zariye bhejta hai, kyunke Khuda kisi gunahgar ki halakat nahin chahta. Khuda apne raham ki lathi hamesha apne hathon mein thame rakhta hai magar apne insaf ki talwar hamesha apni miyan mein rakhta hai, jise upar se mohabbat bhare un chhide huay hathon ne zor se andar daba rakha hai jin mein insan ki najaat aur baqa ke liye besh-qeemat khoon bahaya gaya tha. "Khudawand qahar karne mein dheema hai," kyunke woh qudrat mein barh kar hai. Woh fi-al-haqiqat apni qudrat mein barh kar hai kyunke woh sab cheezon aur khud apni zaat par bhi qadir hai. Yeh Khuda ki qudrat hi hai jo use apna qahar nazil karne se dheeme-pan ka muzahira karne par majboor karti hai aur upar se insanon ke saath us ki mohabbat us ke qahar par mazeed ghalib aa kar use mazeed halka aur sust kar deti hai. Ek aadmi jo mazboot dimagh ka malik ho woh taveel arse tak apni toheen bardasht kar sakta hai, aur jab tak adal karne ka sahi mauqa aur waqt na aa jaye woh us waqt tak badla nahin leta. Kamzor zehen chhoti chhoti baat par chirr jata hai jabke mazboot dimagh rakhne wale ka sabr, bardasht aur istaqamat chatan jaisi pukhta hoti hai jise kabhi junbish nahin hoti, khwah tan-o-tashnee ki hazaron lahrein us se takrati rahein woh poori deeda-daleri ke saath apni dagar par rawan dawan rehta hai. Khuda apne dushmanon ko bakhubi jaanta hai, magar phir bhi apne qahar ko furan harkat mein nahin lata, balkay apne ghaiz-o-ghazab ko roke rakhta hai. Agar woh qahar karne mein itna dheema na hota jitna woh hai, to woh aaj se bahut pehle apne sare qahar ko duniya par nazil kar chuka hota, woh apne ghazab ke aasmani zakheeron ko khali kar chuka hota, woh is se bahut pehle zameen ko is ke zair-e-hisson ki hairat-angez aag se jhalsha chuka hota, aur nasal-e-insani safha-e-hasti se kab ki mit chuki hoti, magar us ki mohabbat us ke ghazab par hamesha ghalib aa kar use qahar ki bajaye fazl ko jari karne par majboor kar deti hai. Azeez qari, aaj shaam aap ki haalat kaisi hai? Kya aap iman ki nazron se Yesu ki taraf dekh sakte, aur yeh keh sakte hain ke, "Ae mere iwazi Khudawand, tu hi meri chatan aur mera tawakkul hai"? Agar aisa hai to phir, azizo, Khuda ki qudrat se mat darein, kyunke us ke qahar ko bhanpte huay aaj aap apni panah ke liye furan Masih ki taraf bhaag sakte hain, aur isi liye aaj aap ko Khuda ke qahar se khaufzada hone ki qat-an zaroorat nahin kyunke kisi jangju surma ki dhaal aur talwar dekh kar woh log kabhi khauf nahin khate jin se woh mohabbat rakhta hai. Balkay khush hon ke woh jo "qudrat mein barh kar hai" aap ka aasmani baap aur dost hai.