Yeh aik sheereen khayaal hai ke Yasu‘ Masih apne Baap ki ijaazat, haakimiyat, raza aur madad ke baghair duniya mein nahin aaya tha. Usay Baap ki taraf se is liye bheja gaya tha taake woh bani-nau‘ insaan ka nijaat-dehinda bane. Hum aksar yeh bhool jate hain ke agarche Taslees-e-Aqdas ke teeno aqaneem mein imtiyaazi farq paye jate hain, lekin un ke jauhar o jalal mein chandaan farq nahin. Hum aksar apni nijaat ki shaan-o-shaukat, ya kam az kam us ki shafqat ke fazaail ka sehra Baap se zyada Yasu‘ Masih ke sar baandh dete hain, jo aik bohat badi ghalti hai. Agar Yasu‘ aaya to kya us ke Baap ne usay nahin bheja? Agar us ka kalaam hairat-angez tha to kya us ke Baap ne us ke labon par yeh fazl nahin undela tha ke woh naye ahd ka aik laaiq khadim bane? Jo koi Baap, Bete aur Rooh-ul-Qudus ko waise jaanta hai jaise jaanna chahiye, woh apni muhabbat mein kisi aik ko doosre par muqaddam nahin thehrata; woh Bait-ul-Lahm, Jat-Simni aur Kalwari par in sab ko nijaat ke kaam mein barabar shareek dekhta hai. Ae Maseehi, kya tu Yasu‘ Masih naam ke kisi insaan par imaan laya hai? Kya tu faqat usi par tawakkul rakhta hai, aur kya tu us ke saath muttahid hai? To yaqeen rakh ke tu aasmaan ke Khuda ke saath muttahid hai. Chunanche tu insaan-e-kaamil Yasu‘ Masih ka bhai hai aur us ke saath gehri rafaqat rakhta hai, is liye tera rishta us ke waseelay se azli Khuda ke saath jura hua hai, aur woh jo “Qadeem-ul-Ayyam” hai wahi tera Baap aur tera dost hai. Kya tu ne kabhi Yahweh ke dil mein paayi jaane wali muhabbat ki is gehraai par ghour kiya hai jis ke tehat Khuda Baap ne apne aklote Bete ko fazl ke is kaar-haaye-numaya ko anjaam dene ke liye tayyar kiya tha? Agar nahin, to aaj ka din isi par ghour-o-fikr kar. Baap ne Bete ko duniya mein bheja. Is mazmoon par dhyaan de. Soch ke Yasu‘ kaise wahi kaam karta hai jo Baap chahta hai. Jaan-bilb nijaat-dehinda ke zakhmon mein us azeem “Main jo hoon so main hoon” ki muhabbat ko dekh. Yasu‘ ke baare mein har khayaal ko us azli aur mubarak Khuda ke saath jor de, kyun ke “Khudawand ko pasand aaya ke usay kuchlay; us ne usay ghamgeen kiya.”

Yeh aayat-e-mubarakah Yasu‘ ki shehrah-aafaaq du‘aon mein se aik du‘a ke siyaaq-o-sabaaq se ta‘alluq rakhti hai. Yasu‘ kehta hai, Yasu‘ bolta hai, balkeh Yasu‘ farmata hai. Woh jo kehta hai wohi hota hai, kyun ke woh Baap ke diye hue ikhtiyaar se bolta aur kalaam karta hai. Yahan par Yasu‘ ke kehne mein aik du‘aiya andaaz ke andar Baap ke huzoor munaajaat aur darkhwast pesh karne ka ta’assur paaya jata hai. Is aitbaar se yeh alfaaz aik munfarid mafhoom pesh karte hain ke jab Yasu‘ toofanon ko hukm dete hue kuch kehta hai to us ka zor-e-bayaan aur asar kuch aur hota hai, jab woh kisi ko shifa dene ke liye kuch kehta hai to andaaz farq hota hai, lekin jab woh Baap ke huzoor du‘a karta hai to us ke kehne par aik moaddabana darkhwast ka rang ghaalib aa jata hai. Jab woh insaanon se kuch kehta hai to us ka andaaz aur hota hai, magar jab woh Baap se kuch kehta hai to us ke andaaz mein aik alag lab-o-lehja paaya jata hai jo mehez tehreeri kalaam hone ki wajah se hum dekh nahin paate, albata ghour karne par samajh zaroor sakte hain ke is waqt Yasu‘ ke bolne ka andaaz kaisa ho ga. Bolte waqt aap ka tarz-e-takhaatub, lehja, ta’assur aur andaaz-e-bayaan aap ke maafi-uz-zameer ko pesh kar raha hota hai. Yasu‘ ki kaamil zaat-e-aqdas mein har insaani rang aur ang badarja-e-uttam paaya jata tha, kyun ke woh kaamil Khuda bhi tha aur kaamil insaan bhi. Kahin us ke kehne se khudai ikhtiyaar numayaan jhalakta hai aur kahin woh Baap ke huzoor multamis ho kar aajizana andaaz ikhtiyaar kar leta hai. Magar aik baat tay hai ke us ke oopar har aik andaaz bakhoobi jachta hai aur woh khwah kisi bhi andaaz mein kuch bhi kahe, woh ho kar rehta hai. Insaanon se woh jo kuch kehta hai woh ilhaami aur ilahi hota tha, magar jab Baap se mukhatib ho kar kuch kehta to woh iltija, darkhwast aur farmaanbardari ka mujassam mazhar ban jata tha. Waise to hum bakhoobi jaante hain ke Yasu‘ hama waqt apne Baap ki rafaqat mein rehta, chalta aur bolta tha, magar hum yeh bhi jaante hain ke duniya mein jaise Yasu‘ tha waise hi hum bhi hain. Humein bhi chahiye ke duniya ke saamne jab bhi kuch kahein to hamari baaton se apne Khudawand Yasu‘ Masih ke ikhtiyaar, kalaam aur jalal ki jhalak dikhai de, magar jab apne aasmani Baap se mukhatib hon to hamare andaaz-e-bayaan mein Yasu‘ jaisi farmaanbardari, aajizi aur taabedari numayaan nazar aani chahiye. Aaiye aaj ki shaam hum bhi ain isi andaaz mein apni aur apne khandaan ki hifazat aur madad-o-rehnumaai ke liye Baap se darkhwast karein.