Yesu ne khatakaron ki fehrist mein naam likhwana kyun guwara kiya? Is hairat-angez inkisari ke peeche kai thos wujoohaat thin. Isi roop mein woh behtar taur par un ka wakeel ya shafaati ban sakta tha. Baaz muqadmaat mein wakeel aur muakkil ki pehchan ek ho jati hai, aur qanoon ki nazar mein unhein ek doosre se juda nahi dekha ja sakta. Ab jab khatakar ko adalat ke kat-here mein laya jata hai, to Yesu wahan khud zahir hota hai. Woh ilzam ka jawab dene ke liye khara hota hai. Woh apni pasli, apne hathon aur apne pairon ki taraf ishara karta aur adl ko challenge karta hai ke woh un khatakaron ke khilaf nalish kare jin ki woh numaindagi kar raha hai. Phir woh apne khoon ka hawala dete hue, aur un ke sath shumar hone aur un ka shareek-e-haal hone ke nate aisi fatah-ana daleel pesh karta hai ke munsif Khuda pukar uthta hai, "Is mulzim ko jane do. Ise garhe mein dale jane se bachao, kyunke is ka fidya ho chuka hai". Hamara Khudawand Yesu khatakaron ke sath isi liye shumar kiya gaya takeh woh apne dilon mein us ke liye kashish mehsoos karain. Bhala us se kon dar sakta hai jis ka naam hamari hi fehrist mein darj ho? Yaqeenan hum dileri ke sath us ke paas aa sakte aur apne gunah ka iqrar kar sakte hain. Woh jo hamare sath shumar kiya gaya, humein mujrim nahi thehra sakta. Kya woh khatakaron ki fehrist mein isi liye nahi dala gaya takeh hamare naam muqaddasin ki Kitab-e-Hayat mein likhe jayain? Woh pak tha, aur pak logon mein shumar kiya jata tha. Doosri taraf hum mujrim the, aur mujrimon mein shumar kiye jate the. Magar us ne apna naam us fehrist se hata kar is siyah-karon ke sath darj kara liya, aur hamare naam khatakaron ki fehrist se nikalwa kar ba-izzat bari kiye jane walon yani najat pane walon ki fehrist in mein likhwa diye, kyunke Yesu aur us ke logon ke mabain siyah-kariyon ki mukammal adla badli ho chuki hai. Hamari tamam tar museebat aur gunah ki saza Yesu ne apne upar le li aur jo kuch Yesu ka hai woh humein mil gaya hai. Us ki rast-bazi, us ka khoon, aur jo kuch us ke paas hai woh humein batur-e-bakhshish ata karta hai. Ae imandar! Us ke sath apni yaganagat par khushi mana jo khatakaron ke sath shumar kiya gaya tha, aur naye sire se paida hone walon yani najat-yafta logon mein shumar ho kar apni najat ka amli sabot pesh kar.

Woh dulhan jo apne pardais sidhar jane wale shohar se walhana mohabbat karti hai, us ki wapsi ki tamanna rakhti hai. Apne maalik se taveel judayi us ki jaan ke liye neem-maut ke barabar hoti hai. Isi tarah woh zindagiyan jo najat-dahinda ke sath be-panah mohabbat rakhti hain, un ke liye us ka deedar lazim hai kyunke woh yeh bardasht nahi kar saktin ke woh Bather ke paharon par un se door rahe aur un ke sath mazeed rafaqat na rakkhe. Laad-pyar ke aadi bachon ke liye tanbih bhari nazar ya utha hua hath bhi takleef-deh hota hai. Kyunke woh apne shafeeq baap ko naraz karne se darte hain aur sirf us ki muskurahat mein khush rehte hain. Azizo! Aap ke sath bhi kabhi aisa hi tha. Kitab-e-Muqaddas ki ek ayat, ek tanbih, ya dukh ki lathi ki ek junbish, aur aap apne baap ke qadmon in mein ja girte the aur pukarte the, "Mujhe bata ke tu mujh se kyun jhagarta hai?". Kya ab bhi aisa hi hai? Kya aap door door se Yesu ki pairwi karne par mutmain hain? Kya aap bagehir kisi khauf ke Masih ke sath ruki hui roohani qurbat ka tasawwur kar sakte hain? Kya aap yeh bardasht kar sakte hain ke aap ka mehboob aap ke barkhilaf ho jaye, kyunke aap us ke barkhilaf chalte hain? Kya aap ke gunahon ne aap ke aur aap ke Khuda ke darmiyan judayi daal rakkhi hai, aur phir bhi aap ka dil pur-sukoon hai? Main khuloos-e-dil se aap ko khabardar karna chahta hoon, kyunke yeh sochna bhi afsos-nak hai ke hum apne najat-dahinda ka deedar paye bagehir itminan se jee sakte hain. Humein is baat ko mehsoos karne ki koshish karni chahiye ke yeh kis qadar haulnak baat hai ke apni khatir jane dene wale munji ke liye hamare dil mein thori si mohabbat, apne qeemti Yeshu mein thori si khushi, aur mehboob ke sath thori si rafaqat ki talab baqi na rahe. Apne dil ki sakhti par gham karte hue apni roohon ko haqiqi roze ki halat mein layain. Sirf gham par na rukain! Yaad karain ke aap ne pehli baar najat kahan paee thi. Fauran saleeb ki taraf jayain. Wahan, aur sirf wahan, aap apni rafaqat ko az-sar-e-no bahal kar sakte hain. Koi farq nahi parta ke hum kitne sakht, kitne be-hiss, ya kitne murda ho chuke hain. Humein dubara apni napaki ke tamam chithron, gunahon aur dhabbon ke sath us ke paas jana chahiye. Humein us ki saleeb ko thaam lena chahiye, humein us ki muntazir aankhon mein ghaur se dekhna chahiye, humein khoon se bhare us chashme mein ghota lagana chahiye kyunke isi surat mein hamari pehli mohabbat wapas aaye gi. Apne iman ki mazbooti aur mohabbat ki sargarmi ko bahal karne ka yahi wahid tariqa hai.