Masih ki mohabbat apni sheerini, apni mamuri, apni azmat aur apni wafadari mein insani samajh se balatar hai. Woh zaban kahan se mile gi jo bani nau-e-insan ke liye us ki be-misal aur la-sani mohabbat ko bayan kar sake? Yeh itni wasee aur lamahdood hai ke jis tarah ababeel pani ko sirf chhoo kar guzar jati hai aur us ki gehraiyo mein ghota nahi lagati, waise hi tamam bayaniya alfaz sirf satah ko chhoo pate hain, jabkeh na-qabil-e-paimaish gehraiyan neeche chupi hui hain. Shaer ne kitna sach kaha hai ke:
"Ae mohabbat! Tu ek be-athah samandar hai!"
Aur Masih ki mohabbat har ek samandar se zyada gehri, na-qabil-e-paimaish aur idraak se mawara hai, kyunke koi bhi is ki teh tak nahi pohanch sakta. Is se pehle ke hum Yesu ki mohabbat ka koi sahi tasawwur qaim karain, humein us ke sabqa jalal ki bulandiyo aur zameen par us ke tajassum ki tamam tar sharminda-haali ki gehraiyo ko samajhna hoga. Lekin Masih ki azmat ke bare mein humein kon bata sakta hai? Jab woh ala tareen aasmano par takht-nasheen tha, woh bar-haqq Khuda se bar-haqq Khuda tha. Aasman aur un ke tamam lashkar usi ke wasila se bane. Usi ke Qadir-e-Mutlaq hath ne kainat ke sayyaron ko banaya aur sanbhala hua tha. Karubiyo aur Sarafim ki hamd-o-sana har waqt us ke gird jari rehti thi. Poori kainat ki Hallelujah Hallelujah kehte hue us ke qadmon par sajda-reiz ho jati thi kyunke apni sari makhluqat par mumtaz aur mukhtar tha yani sab se buland aur abad tak mubarak Khuda. Us ke haqiqi jalal ki sar-bulandi ka andaza kon kar sakta hai? Aur doosri taraf, kon bata sakta hai ke woh kitna neeche utra? Insan banna hi bari baat thi, mard-e-gham-nak banna us se bhi kahin barh kar tha. Phir khoon bahana, jaan dena aur dukh uthana, yeh sab us ke liye bahut bari baatein thin kyunke woh Zaat-e-Ilahi aur Ibn-e-Khuda tha jis ke liye aisi be-misal aziyat sehna, sharmnak balkeh laanti maut ko gale lagana aur apne baap ki taraf se chor diya jana, yeh farotni aur mohabbat ki woh gehrai hai jise bare se bara ilahiyat mein mahir dimagh bhi napne mein mukammal taur par qasir hai. Mohabbat isi mein hai! Aur sach to yeh hai ke yeh woh mohabbat hai jo har ek "ilm se bahar" hai. Aaiye apne dilon ko is mohabbat ke liye Khudawand Yesu ki shukr-guzari se aisa bhar dain ke badle mein hamare andar bhi us ke sath waisi hi mohabbat rakhne ka jazba bedar ho.

Hamare azeem najat-dahinda ke fazail Haqq Taala ke nazdeek rahat-angez khushbu ki manand hain. Khwah hum Masih ki rast-bazi ki baat karain ya us ki farmanbardari ki, dono mein barabar khushbu payi jati hai. Us ki amli zindagi mein ek aisi mehek payi jati thi jis ke zariye us ne Khuda ki shariyat ko apni zindagi mein poora kiya, aur har ek hukm ko apni zaat ke pakiza juzo mein ek qeemti jauhar ki tarah chamkaya. Isi tarah us ki farmanbardari thi, jab us ne bagehir kisi shikayat ke bhook aur pyaas, sardi aur nang ko bardasht kiya, aur aakhir-kar Gethsemane bagh mein is dukh ki intiha par aisa ja pohancha ke us ka apna khoon bari boondon ki surat mein goya pasine ki tarah behne laga. Us ne apni peeth ko peetne walon ke hawale kiya aur apne galon ko un ke samne pher diya jinhon ne us ke baal noche, tamache mare, aur use saleeb par jar diya magar yeh sab Khuda ke ghazab ko apne upar le kar humein najat dene ke liye hua. Yeh sari baatein Haqq Taala ke huzoor rahat-angez khushbu hain jin ke sath Khuda humein apni huzoori mein qabul karta hai. Us ke kaam aur us ki maut, us ke ewzi ban kar hamari khatir uthaye jane wale dukhon aur us ki farmanbardari ke sille mein Khudawand hamara Khuda humein qabul karta hai. Us ki zaat mein kaisi qudrat payi jati hai jo hamari be-waqti par ghalib aa jati hai! Kaisi sheereen khushbu jo hamare gunahon ki badbu ko door kar deti hai! Us ke khoon mein kaisi pak karne wali qudrat payi jati hai jo hamare sare gunahon ko mita deti hai! Aur us ki rast-bazi mein kaisi taseer payi jati hai jo hum jaisi na-qabil-e-qabul makhluq ko us ke azeez bete mein maqbul thehra deti hai! Ae imandar, ghaur kar ke tera is qabuliyat par kis qadar iman, yaqeen aur iteqad hona chahiye, kyunke yeh sab us ki zaat ke khasse hain. Khabardar, kabhi Yeshu mein apni is qabuliyat par shakk na karna. Masih ke bagehir aap kabhi qabul nahi ho sakte. Lekin jab aap ne us ke fazail ko pa liya, to phir aap kabhi radd nahi ho sakte. Aap ke tamam shukook, khauf aur gunahon ke bawajood, Yehovah Khuda ki fazl-bhari aankh kabhi qahar se aap ki taraf nahi dekhti. Agarcheh use hamari zaat mein gunah nazar aata hai, lekin jab Masih ke khoon ke parde ke andar se dekhta hai, to use koi gunah nazar nahi aata. Aap Masih mein hamesha maqbul ho, baap ke dil ko hamesha azeez aur us ke mubarak log hain. Isi liye hamd ka geet gayain, aur jab aap aaj shaam jalali takht ke samne Munji ke in fazail ka loban mein se rahat-angez khushbu ka dhuan uthte hue dekhain, to us mein apni parastish, shukr-guzari aur munajat bhi shamil kar dain.