Matthew 26:56
"Is par sab shagird use chor kar bhag gaye."
Us ne unhein kabhi nahi chora tha, magar unhon ne apne buzdilana khauf ke sabab, dukhon ka aghaz hote hi use chor kar bhagne mein aafiyat jani. Yeh sab imandaron ki kamzori ki ek sabaq-amoz misal hai ke jab unhein apne haal par chor diya jaye to kya hota hai. Aakhir woh bherin hi to hain jo bheriye ko dekh kar bhag khari hoti hain. Un sab ko khatre se peshgi aagah kar diya gaya tha, aur un sab ne apne maalik ko chorne ki bajaye jaan dene ka wada kiya tha, lekin phir bhi waqt aane par woh nagahan khauf ka shikar hue aur dum daba kar bhag gaye. Ein mumkin hai ke main ne bhi aaj ke din ki ibtida mein Khudawand ki khatir koi azmaish sahne ke liye khud ko tayyar kiya ho, aur main yeh guman kar raha hoon ke main kamil wafadari ka muzahira karoon ga, lekin mujhe bhi apne bare mein bahut zyada muhtat aur khabardar rehna chahiye, kahin aisa na ho ke apne dil ki be-imani ya kamzor imani ke baais mujhe bhi Khudawand se zyada apni jaan ke lale par jayain. Wada karna ek baat hai aur use poora karna bilkul doosri baat. Yeshu ke pehlu mein dewana-war khare rehna un ke liye abdi izzat ka baais hota magar woh is izzat-afzai ko bhool kar bhag khare hue. Kaash main un ki taqleed se mehfooz rahoon! Woh bhala apne maalik ke qareeb rehne se zyada kahin aur kaise mehfooz ho sakte the, jo fauran farishton ke barah tuman talab kar sakta tha? Woh apni haqiqi salamti hi se bhag gaye. Ae Khuda, mujhe aisi himaqat na karne de. Khuda ka fazl to buzdil ko bhi bahadur bana sakta hai. Khudawand ki marzi ho to sulagta hua san bhi qurban-gah ki aag ki tarah bharak sakta hai. Yeh wahi rasool the jo geedar ki tarah darpok nikle, nuzool-e-Rooh-ul-Qudus ke baad sher-e-babar ki tarah nidar ban gaye, aur isi tarah Rooh-ul-Qudus hamari past-himti ko bhi apne Khudawand ke iqrar aur us ki sachaee ki gawahi ke liye diler bana sakta hai. Jab Munji ne apne doston ki itni be-wafayi dekhi hogi to us ka dil kis qadar ranjida hua ho ga! Yeh us ke pyale ka ek karwa juzo tha, magar woh pyala ab khali ho chuka hai. Ab meri bari hai. Agar main apne Khudawand ko chor doon ga, to main use dubara masloob aur use elaniya ruswa karoon ga. Ae Rooh-ul-Qudus! Mujhe aise sharmnak anjam se mehfooz rakh.
Matthew 15:27
"Us ne kaha han Khudawand kyunke kutte bhi un tukron mein se khate hain jo un ke malikon ki meiz se girte hain."
Yeh aurat Masih ke bare mein bare aur azeem khyalat rakhti thi jo us ke liye wahid umeed ka baais the. Maalik ne larkon ki roti ka zikr kar ke us ke iman ko parkha. Magar us ki daleel be-had jandar thi ke "Chunke tu hi fazl ki meiz ka maalik hai, main janti hoon ke tu ek fayyaz mezban hai, aur teri meiz par yaqeenan roti ki kasrat hogi; bachon ke liye itni zyada frawani hogi ke farsh par kuton ke liye bhi tukre girain ge, aur un se bache hue tukre bhi hamare liye kafi honge." Us ka khyal tha ke Khudawand ki meiz itni bari hai ke us mein se agar use ek tukra bhi muyassar aa jaye to woh bhi us ke liye kafi hoga. Yaad rakhain, woh apni beti mein se bad-rooh niklwani chahti thi. Yeh us ke liye bahut bari baat thi, lekin Masih ke bare mein us ki soch aur qadr-o-manzilat itni buland thi ke us ne kaha, "Yeh Masih ke liye kuch bhi nahi, yeh to us ke dene ke liye mahz ek tukra hai." Yahi tasalli ka shahi aur aasmani rasta hai. Sirf apne gunahon ke bare mein bare khyalat aap ko mayusi ki taraf le jayain ge, lekin Masih ke bare mein bare khyalat aap ko salamti ki bandar-gah tak pohanchayain ge. "Mere gunah bahut hain, lekin rukain! In sab ko door karna Yeshu ke liye to kuch bhi nahi. Meri khata ka bojh mujhe yun dabata hai jaise kisi deo-qamat ka paon ek kirm ko kuchal de, lekin us ke liye yeh dhool ke ek zarre se bhi zyada nahi, kyunke woh pehle hi saleeb par apne badan mein is ki laanat utha chuka hai. Mere liye poori maafi pana ek lamatnahi barkat hogi, lekin us ke liye yeh maafi dena ek mamooli baat hai." Us aurat ne Yeshu se bari tawaqqoaat rakhte hue apne dil ko khoob khola, aur us ne ise apni mohabbat se bhar diya. Aziz qari, aap bhi aisa hi kijiye. Masih ne jo kuch us ke samne rakha us ne us ka iqrar kiya, lekin us ne Masih ko mazbooti se thame rakha, aur us ki sakht baaton se bhi apne haq mein asbab nikal liye. Us ne us ke bare mein suni hui bari bari baaton ka yaqeen kiya, aur be-imani ka shikar na hui. Balkeh apne iman par qaim reh kar fatah aur shifa paee. Us ka waqia ghalib aane wale iman ki ek umda misal hai. Aaj agar hum bhi us ki tarah fatahmandi hasil karna chahte hain, to humein us ki hikmat-e-amli aur misal par amal karne ki zaroorat hai.