Bagh-e-Gatsmani ke dukhon ki rafaqat mein sirf kuch shagird hi Masih ke sath sharik hue. Zyada tar shagird fazl mein is qadar age nahin badhe ke unhen is "jan kani" se mutaliqa bhedon ka mushahida karne ki ijazaat di jati. Woh apne apne gharon mein eid-e-fas-h ki ziyafat mein magan, un bahut se logon ki numayandagi karte hain jo sirf honton se tazim ke musaddaq zindagi guzarte hain, magar injil ki haqiqi ruh se jude muamlat mein sari zindagi mahz bacche hi reh jate hain. Barah, balki sirf gyarah ko yeh istahiqaq diya gaya ke woh Gatsmani bagh mein dakhil ho kar is "bade nazare" ko dekhen. Un gyarah mein se ath ko kuch fasle par chhor diya gaya yani unhen rafaqat to hasil thi, lekin woh qurbat hasil na thi jis mein faqat maudude chand hi dakhil kiye jate hain. Sirf tin barguzida log hi hamare Khudawand ke is bade dukh ko qarib se dekh sake. Magar unhen bhi is dukh ke andar madakhlat karne ki ijazaat nahin thi kyunke ek patthar ke tappe ka fasla baqi rakhna zaruri tha. Use anguron ke hauz ko akele hi raundna tha, aur is dukh ki ghari mein us ke apnon mein se koi bhi us ke sath na tha. Patras aur Zabdi ke do bete un chand mumtaz aur tajurba-kar imandaron ki numayandagi karte hain jinhen "Abaye Kalisiya" kaha ja sakta hai kyunke yeh woh log hain jinhon ne gahre mein utar kar dekha tha aur woh apne munajji ke dukhon ki bahr-e-bekaran ki tand-o-tez lahron ki paimaish kisi had tak kar sakte hain. Kuch chunida zindagiyon ko dusron ki bhalai ke liye aur mustaqbil ke makhsus aur haulnak maarkon ke liye mazbut karne ki khatir yeh mauqa diya jata hai ke woh Masih ke sath andruni halqe mein dakhil hon aur dukh sahte hue sardar kahen ki iltija ko sunen. Woh us ke dukhon ki rafaqat mein shamil hote aur apni zindagiyon mein us ki maut se mushabihat paida karte hain. Albatta, zyada tar log munajji ke dukhon ke poshida bhedon tak puri rasai hasil nahin kar pate. Yunani duaiya kitab mein ek ghair mamuli jumla darj hai, "Tere anjan dukh". Hamare Khudawand ke qalb mein gham ka ek aisa andruni kamra bhi maujud tha jahan tak kisi insani ilm aur rafaqat ki dastras nahin thi. Yasu ko "akela chhor diya gaya". Yasu ki zindagi ka yeh pehlu haqiqi manon mein "bayan se bahar" hai! Kya Watts ne apne geet mein thik nahin gaya ke,
Aur woh sari anjani khushiyan jo tu bakhshta hai,
Woh tere anjane dukhon se kharidi gayi thin.

Agar hamare andar apni qabliyatton par fakhr karne ki khu pai jati ho, to Khuda ki qudrat-e-kamila hamen jald hi dikha deti hai ke ham kis qadar haqir hain. Ham timtimate sitaron mein se chhote se chhote sitare ko bhi us ki jagah se hila nahin sakte, aur na hi subh ki kirnon mein se kisi ek ko bujha sakte hain. Ham apni salahiyatton par laf-zani karte hain, magar asman ham par hansta aur hamen hamari auqat yaad dilata hai. Jab jab mausam-e-bahar mein uqd-e-surayya apne pure joban par chamakta aur damakta hai to koi insan us ki latafat ko rok nahin sakta, aur jab jabbar bulandiyon par raj karta hai aur mausam-e-sarma ki beriyon mein jakra hota hai, to ham us par charhi barfili pattiyon ko dhila nahin kar sakte. Mausam Khuda ke muqarrar karda waqt ke mutabiq badalte hain, aur insanon ki puri nasl mil kar bhi is mein koi ratti barabar raddo-badal nahin kar sakti. Ae Khudawand, insan hai hi kya?

Tabayi duniya ki tarah ruhani duniya mein bhi insan ki qudrat har lihaz se mahdud hai. Jab Ruh-ul-Qudus apni nematen banta aur bikherta hai, to koi dakhl dar maqoolat ki jasarat nahin kar sakta. Insan apni tamam tar chalaki aur khud-farebi ke sath bhi Khuda ki qudrat mein jhankne se qasir hai tawakt-ke woh use mauqa aur ijazaat na de. Jab woh kisi kalisiya par nazar-e-karam karne aur use nayi zindagi bakhshne ka irada karta hai, to bad-tarin dushman bhi is nek kaam ka muqabla nahin kar sakte. Woh is ka mazaq to ura sakte hain, lekin woh ise rok nahin sakte, bilkul waise hi jaise mausam-e-bahar mein uqd-e-surayya ke joban par koi asar andaz nahin ho sakta. Yeh Khuda ka intezam hai jis mein insan ko madakhlat ki ijazaat nahin. Dusri taraf, agar Khudawand apni hakimiyat ya adal mein kisi shakhs ko is tarah jakar de ke woh ruhani qaid mein ho, to kaun use azadi dila sakta hai? Sirf Khuda hi yeh sab kuch kar sakta hai. Wahi jabbar ke bandhanon ko kholta hai, aur us ke siwa koi dusra nahin. Yeh hai hamare Khuda ki qudrat-e-kamila. Kash woh aj raat bhi apni isi qudrat ko kaam mein la kar hamari zindagiyon mein apni maujizana barkat ko jari kare. Ae Khudawand, mere mausam-e-sarma ka khatma kar, aur meri bahar ka aghaz hone de. Main apni tamam tar khwahishon ke bawajud apni ruh ko maut aur afsurdagi se bahar nahin nikal sakta, lekin tere liye sab kuch mumkin hai. Mujhe asmani qudrat ki zarurat hai, teri muhabbat ki roshan chamak, tere fazl ki kirnen aur tere chehre ki tajalli hi mere liye uqd-e-surayya hain. Main gunah aur azmaish ke bais bahut dukh uthata hun, yeh mere liye uqd-e-surayya aur jabbar hain jinhen main khol nahin sakta. Ae Khudawand, meri madad kar. Amin.