Song of Solomon 2:8
"Mera mahbub."
Yeh woh sunhera naam tha jis se qadim kalisiya apne pur-musarrat lamhat mein Khudawand ke Masih ko pukarti thi. Jab parindon ke gane ka waqt ata aur us ki sarzamin mein fakhta ki awaz sunai deti, to us ki muhabbat ka naghma in donon se zyada shirin hota, jab woh gati "Mera mahbub mera hai aur main us ki hun. Woh sosnon ke darmiyan charata hai". Woh apni har ghazal mein use isi dilkash naam "Mere Mahbub" se pukarti hai! Yahan tak ke tawil jade mein bhi, jab but-parasti ne Khudawand ke bagh ko murjha diya tha, us ke nabiyon ko Khudawand ke bar-e-nabuwwat ko thori der ke liye utar rakhne ka mauqa mila aur Yasaya ki tarah kaha "Ab main apne mahbub ke liye apne mahbub ka ek geet us ke takistan ki babat gaun ga". Agarche muqaddasin ne kabhi us ka chehra nahin dekha tha, agarche woh abhi mujassam nahin hua tha aur na hi hamare darmiyan sakunat pazir hua tha, aur na hi insan ne abhi tak us ka jalal dekha tha, phir bhi woh Israel ki tasalli, tamam barguzidon ki umeed aur khushi, aur un sab logon ka "Mahbub" tha jo Haqq Ta'ala ke huzur rasti se chalte the. Ham bhi, kalisiya ke in mausam-e-bahar ke dinon mein, Masih ko apni ruh ka sab se pyara mahbub kehte, aur yeh mante hain ke woh be-had qimti, "das hazar mein mumtaz aur sarapa ishq-angez hai". Yeh itni badi sachai hai ke Masih ke sath kalisiya ki muhabbat ka bhed isi mein muzmar hai kyunke ahd-e-atiq ka yeh mahbub aj kalisiya ka dulha aur us ka sar hai. Ahd-e-jadid ki kalisiya ka yeh istahiqaq is qadar azim aur amiq hai ke puri kalisiya ki numayandagi karte hue Paulas rasul is puri kainat ko lalkarne ki jasarat karte hue babang-e-duhal yeh kehta hai ke kaun hamen Masih ki muhabbat se juda kar sakta hai na zulm, na tangi, na musibat, na khatra aur na talwar aur phir woh khushi se aur fakhriya andaz mein yeh bhi kehta hai ke "Magar un sab halaton mein us ke wasila se jis ne ham se muhabbat ki ham ko fatah se bhi badh kar ghalba hasil hota hai" (Rumiyon 8: 37).
Kash main tere bare mein aur zyada jan pata, ae mere besh-qimat mahbub!
Teri muhabbat mera kul asasah hai,
Niche zamin par ya upar asman mein,
Mere pas koi dusra nahin,
Ke jis ka main mushtaq hun,
Mujhe teri muhabbat ki lau lagi hai,
Mujhe tere ishq ke siwa kuch nahin chahiye!
Ephesians 5:25
"Ae shoharo! Apni biviyon se muhabbat rakho jaise Masih ne bhi kalisiya se muhabbat kar ke..."
Masih apne shagirdon ko kitni sunheri misal deta hai! Bohat kam ustad yeh kehne ki jurat kar sakte hain ke "Agar tum meri talim par amal karna chahte ho, to meri zindagi ke namuna par chalo". Lekin chunke Yasu ki zindagi kamil rastbazi ka mujassam paikar hai, isi liye woh khud ko pakizagi ke ala namune aur mualim ke taur par pesh kar sakta hai. Ek Masihi ko Masih se kam namune ko apna miyar kabhi nahin banana chahiye. Hamen kisi bhi haal mein us waqt tak mutmain nahin hona chahiye jab tak ham us rastbazi ki akasi na karen jo us ki zat-e-aqdas mein jhalakti thi. Ek shohar ke taur par, har Masihi ko Masih Yasu ki misal ko hamesha mad-e-nazar rakhna chahiye, aur usi namune ke mutabiq apni azdawaji zindagi mein rang bharne chahiyen. Ek sacche Masihi ko waisa hi shohar banna chahiye jaisa Masih apni kalisiya ke liye tha aur hai. Shohar ki muhabbat apni mankuha biwi ke liye bohat khas hoti hai. Khudawand Yasu kalisiya ke liye ek makhsus lagao rakhta hai, jo baqi sab insanon se badh kar aur hamare liye qabil-e-taqlid namuna hai jaise woh kehta hai ke "Main un ke liye darkhwast karta hun, main duniya ke liye darkhwast nahin karta". Barguzida kalisiya asman ki rani, Masih ka khazana, us ke sar ka taj, us ke bazu ka kangan, us ke dil ka sina-band, aur us ki muhabbat ka ain markaz-o-mihwar hai. Ek Masihi shohar ko apni biwi se la-tabdil muhabbat rakhni chahiye, kyunke Yasu bhi apni kalisiya se isi tarah muhabbat rakhta hai. Us ki muhabbat mein koi tabdili nahin ati. Woh muhabbat ke izhar ka tariqa badal sakta hai, lekin us ki muhabbat hamesha yaksan rehti hai. Ek shohar ko apni biwi ke sath daimi muhabbat rakhni chahiye, kyunke koi bhi chiz hamen "Khuda ki jo muhabbat hamare Khudawand Masih Yasu mein hai us se juda na kar sake gi". Ek saccha shohar apni biwi se dili muhabbat karta hai, jo intihati sargarm aur shadid hoti hai. Yeh muhabbat mahz zabani jama kharch par mauquf nahin hoti. Ah! Azizo, Masih apni muhabbat ke sabut mein is se zyada aur kya kar sakta tha jo us ne kar dikhaya? Yasu apni dulhan ke sath ek walahana muhabbat rakhta hai, woh us muhabbat ki rah se us ki be-had qadr karta hai aur hamah waqt usi ki qurbat-o-rafaqat mein magan rehta hai. Ae imandar! Tu Yasu ki muhabbat par hairan hota hai, tu is ki tarif karta hai, magar kya tu us ke namune par bhi amal kar raha hai? Kya tere gharelu taluquat mein teri muhabbat ka usul aur paimana wahi hai "jaise Masih ne kalisiya se muhabbat rakhi"?