Galatians 2:10
"Ghareebon ko yaad rakhna."
Khuda apne bahut se farzandon ko ghareeb kyun rehne deta hai? Agar woh chahe to unn sab ko ameer bana sakta hai, woh unn ki dehleez par sone ki thailiyan rakh sakta hai, woh unhein ek badi saalana amdani bhej sakta hai, ya woh unn ke gharon ke gird waafir khoraak bikher sakta hai, jaise uss ne ek baar Bani Israel ki lashkar gaah ke gird bateron ke dher laga diye thay aur unhein khilane ke liye aasman se roti barsayi thi. Khuda ke farzandon ka ghareeb hona ya ghareeb rehna koi zaroori nahi, siwaye iss ke ke woh unn ke haqq mein issi ko behtar samajhta hai. "Hazaron pahadon ke chopaye ussi ke hain". Woh unn ki bakhubi kafalat kar sakta hai. Woh ameer tareen, azeem tareen aur taqatwar tareen logon ko iss baat par maail kar sakta hai ke woh apni tamaam tar daulat aur taqat uss ke farzandon ke qadmon mein le aayein, kyunke tamaam insaanon ke dil ussi ke ikhtiyar mein hain. Lekin woh aisa karna pasand nahi karta balkay unhein zaroorat mand rehne deta hai, woh unhein muflisi aur gumnami mein kadhne deta hai. Aisa kyun hai? Iss ki bahut si wujohaat hain. Ek wajah yeh hai ke hamein, jinhein zaroorat ke mutabiq kafi kuch mila hai, yeh mauqa diya jaye ke iss tarah hum Yeshu ki saath apni muhabbat ka izhaar kar sakein. Hum Maseeh se apni muhabbat ka izhaar uss ki hamd-o-sana ga kar aur uss se dua kar ke karte hain lekin agar duniya mein koi zaroorat mand na hota, to hum uss ke ghareeb bhaiyon ki maali madad kar ke apni muhabbat saabit karne ke iss pur-kashish istehqaq se mahroom reh jate. Uss ne yeh muayyan-o-muqarrar kiya hai ke hum issi tarah se saabit karein ke hum sirf kalaam hi se muhabbat nahi rakhte balkay amal aur sachayi ko bhi azeez jaante hain. Agar hum waqayi Maseeh se muhabbat rakhte hain, to hum unn ka khayal rakhein ge jin se woh muhabbat rakhta hai. Jo uss ke liye azeez hain, wahi hamare liye bhi azeez honge. Pas, aaiye hum Khudawand ke galle mein shamil ghareebon ki madad ko ek farz nahi balkay ek istehqaq samjhein. Khudawand Yeshu ke inn alfaaz ko yaad karte hue ke "Jab tum ne mere inn sab se chhotay bhaiyon mein se ek ke saath yeh kiya, to mere hi saath kiya". Yaqeenan yeh baat hamare liye tasalli bakhsh aur be-had shireen hai, jis ka kulli maqsad yeh hai ke hum khulay haath aur muhabbat bhare dil ke saath doosron ki madad karein, yeh yaad rakhte hue ke jo kuch bhi hum uss ke logon ke liye karte hain, goya Maseeh ke saath karte hain aur woh usse issi taur par qubool bhi karta hai.
Matthew 5:9
"Mubarak hain woh jo sulah karate hain kyunke woh Khuda ke bete kehlayein ge."
Yeh saatween mubarakbadi hai aur Israelyon ke nazdeek saat ka adad kaamilyat ki alamat tha. Mumkin hai ke Munj-e-Aalam ne sulah karane wale ko iss fehrist mein saatween number par iss liye rakkha ho kyunke woh Maseeh Yeshu mein kaamil insaan ke namune ke taur par sab se zyada qareeb hai. Jo koi kaamil barkat pana chahta hai, jitni ke iss zameen par mumkin hai, usse iss saatween barkat tak pahunchna aur sulah karane wala banna hoga. Iss ayat ki tarteeb mein bhi ek khaas ahmiyat paayi jati hai. Iss se pehli ayat "Paak dil" logon ki barkat ke baare mein batati hai ke "Woh Khuda ko dekhein ge". Yeh samajhna zaroori hai ke hamein "Pehle paak, phir sulah-joo" banna hai. Hamari sulah-joyi ka matlab hargiz gunaah ke saath samjhota ya badi ki bardasht nahi hona chahiye. Hamein har uss cheez ke khilaf apne chehre chaqmaq ki tarah sakht kar lene chahiye jo Khuda aur uss ki pakeezgi ke baraks hai lekin jab pakeezgi hamari roohon mein poori tarah ja-guzeen ho jaye, tab hi hum sulah-joyi ki taraf badh sakte hain. Issi tarah iss ke baad aane wali ayat bhi goya kisi khaas maqsad ke tehat wahan rakkhi gayi maloom hoti hai. Hum iss duniya mein kitne hi sulah-joo kyun na hon, phir bhi hamein ghalat samjha jaye ga aur hamari baaton ka ghalat matlab nikala jaye ga yaani iss mein koi tajub ki baat nahi, kyunke khud Sulah ke Shehzade ne apni sulah-joyi ke bawajood zameen par aag bharkayi. Woh khud, bawajood iss ke ke uss ne nau-e-insaan se muhabbat rakkhi aur koi burayi na ki, to bhi woh "Aadmiyon mein haqeer-o-mardood, mard-e-ghamnaak aur ranj ka aashna tha". Pas, kahin aisa na ho ke sulah-joo dil rakhne wale dushmanon ka saamna hone par hairan reh jayein, iss liye agli ayat mein yeh izafa kiya gaya hai ke "Mubarak hain woh jo raast baazi ke sabab se sataye gaye hain kyunke aasman ki baadshahi unn hi ki hai". Iss tarah, sulah karane walon ko na sirf mubarak kaha gaya hai, balkay unn ke aage peechay bhi barkatein hi barkatein hain. Ay Khudawand! hamein woh fazl ata kar ke hum iss saatween mubarakbadi ke darjay tak pahunch sakein! Hamare zehnon ko paak kar taake hum "Pehle paak aur phir sulah-joo" banein. Hamari roohon ko itni taqwiyat ata farma ke jab teri khatir hamein sataya jaye to hamari sulah-joyi hamein buzdili aur mayusi ki taraf nahi balkay dileri aur sachayi par qaaim rehne ki taraf le kar jaye.