Yeh ek ajab haqiqat hai, ke fazl par fakhr karne ki aadat bhi wujood rakhti hai. Ek aadmi kehta hai, "Mera iman bohat bara hai. Main nahin giroon ga. Bechara kamzor iman wala gire ga, magar main kabhi nahin giroon ga." Doosra kehta hai ke, "Meri mohabbat bohat sargarm hai, main qaim reh sakta hoon, mere bargashta hone ka koi khatra nahin." Jo fazl par fakhr karta hai us ke paas fakhr karne ke liye fazl bohat kam hota hai. Kuch log jo aisa samajhte hain un ka khayal hai ke un ki khoobiyan unhein sanbhal sakti hain, woh yeh nahin jaante ke chashme se dhaara mutawatil jari rehna chahiye warna chashma jald khushk ho jaye ga. Agar charagh ko tail musalsal muyassar na aaye to chahe woh aaj kitna hi roshan kyun na ho, kal woh dhuwan dene lage ga aur us ki boo nagawar hogi. Khabardar rahein ke aap apni khoobiyon par fakhr na karein, balkay aap ka tamam fakhr aur bharosa sirf Masih aur us ki qudrat par ho, kyunke sirf isi surat mein aap girne se mehfooz reh sakte hain. Dua mein zyada waqt guzarein. Muqaddas bandagi mein zyada waqt lagayein. Kitab-e-Muqaddas ko zyada jan-fishani, lagan aur ba-qaidgi se parhein. Apni zindagiyon ki zyada ihtiyat se nigahbani karein. Khuda ke zyada qareeb rahein. Behtarin misalon ko apna nasb-ul-ain banayein. Aap ki guftagu aasmani khushbu se mehakti ho. Aap ka dil insanon ki zindagiyon ke liye mohabbat se moattar rahe. Aisi zindagi guzarein ke log aap ko pehchan lein ke aap Yesu ke saath rahe hain aur aap ne mohabbat rakhne ka hunar usi se seekha hai. Phir jab woh mubarak din aaye ga ke jab woh, jis se aap ishq rakhte hain, aap se yeh kahe ga ke "Upar aa ja", to aap ke liye yeh khushi ka maqam ho ke aap us ki zaban se yeh sunein ke "Tu achhi kushti lar chuka, tu ne daur ko khatm kar liya. Aur ab tere waste rast-baazi ka woh taaj rakkha hua hai jo kabhi murjhata nahin." Ae Masihi! Ihtiyat aur khabardari ke saath aage barh! Paak khauf ke saath kanpte hue pesh-qadmi kar! Sirf Yesu par iman aur tawakkul ke saath aage barh, aur tere labon par hamesha yehi iltija rahe ke "Apne kalam ke mutabiq mujhe sanbhal le." Wahi qadir hai, aur sirf wahi yeh kar sakta hai ke tujhe "thokar khane se bachaye aur apne jalal ke roo-ba-roo kamal khushi ke saath be-aib khara kare."

Ae hamsafar! Apne dil mein yeh mat keh ke "Main falan falan jagah jaoon ga aur gunah nahin karoon ga" kyunke tu kabhi gunah ke khatre se itna door nahin ke apni salamati par fakhr kar sake. Rasta bohat daldali hai. Apni raah ka intekhab aisi ihtiyat se karna ke tera libas aalooda na hone paye, ek mushkil kaam hoga. Yeh duniya raal ki manind hai. Agar tu ise broye-kar late hue apne hathon ko saaf rakhna chahta hai to tujhe har baar ihtiyat se kaam lena pare ga. Sarak ke har morr par tere jawahirat lootne ke liye koi na koi lutera hama-waqt maujood hai. Har neimat mein ek azmaish pinhon hai aur har khushi mein ek phanda paya jata hai. Aur agar tu kabhi aasman tak pahunch paye, to yeh ilahi fazl ka ek mu-ajiza hoga jis ka tamam-tar sehra tere baap ki qudrat ke sar par bandhe ga. Apne aap ko chaukanna rakh. Jab ek insan ke haath mein barood ka gola ho, to use ihtiyat karni chahiye ke woh kisi shama ke qareeb na jaye. Isi tarah tujhe bhi dhyan rakhna chahiye ke apne aap kisi azmaish mein dakhil na ho. Yahan tak ke tere roz-marra ke aam aamaal bhi tez dhaar wale auzaron ki manind hain. Tujhe in auzaron ko burt-te waqt har tarah se hoshiyar aur khabardar rehne ki zaroorat hai. Is duniya mein koi aisi cheez nahin jo Masihi deendari ko parwan charhane mein teri madadgar ho, balkay yahan ki har cheez ise tabah karne par tuli baithi hai. Tujhe kitna fikrmand hona chahiye ke teri nigah hamesha Khuda ki lagi rahe takay woh tujhe aap hi mehfooz rakkhe. Teri dua yeh honi chahiye ke "Mujhe sanbhal aur main salamat rahoon ga." Yeh dua maangne ke baad tujhe khud bhi nigahbani karni chahiye aur apne har khayal, lafz aur amal ki muqaddas ghairat ke saath hifazat karni chahiye. Bila-zaroorat khud ko khatron mein na daal. Lekin agar tujhe kisi aisi jagah jana hi pare jahan teer baras rahe hon, to apni sipar ke baghair kabhi qadam bahar mat nikal. Kyunke agar Shaitan ne ek baar bhi tujhe apni dhaal ke baghair pa liya, to woh khush hoga ke us ki fatah ki ghari aa gayi hai, aur woh jald hi tujhe apne teeron se zakhmi kar ke gira de ga. Agarche tu halak to nahin ho sakta, magar ghayal zaroor ho sakta hai. "Tum hoshiyar aur bidaar raho, tumhara mukhalif Iblees garajne wale sher-e-babbar ki tarah dhoondta phirta hai ke kis ko pharr khaye." Is liye apni raah ki nigrani kar aur dua ke liye bidaar raho. Koi bhi insan had se zyada ba-khabar rehne ki wajah se kabhi gumrahi mein nahin girta. Khuda Rooh-ul-Quds sab raahon mein hamari rahnumayi kare, takay hamari ravishein hamesha Khudawand ko pasand aane wali hon.