Masih ki pur-fazl zaat mein fazl ki koi had nahin, lekin us ne yeh fazl sirf apni zaat tak mahdood nahin rakkha. Jis tarah ek bara hauz paipon ke zariye khud ko khali kar deta hai, isi tarah Masih ne apna fazl apne logon ke liye ek faiz-e-aam ke taur par jari kar rakkha hai. "Usi ki mamori mein se hum sab ne paya yani fazl par fazl." Aisa maloom hota hai ke us ke paas jo kuch bhi hai woh sirf humein ata karne ke liye hai. Woh ek aise chashme ki manind hai jo hamesha jari rehta hai, lekin us ke behne ka maqsad sirf un khali gharon aur pyase labon ko sairab karna hai jo us ke qareeb aate hain. Ek phaldar darakht ki tarah, woh shireen phalon se lada hai, is liye nahin ke woh phal faqat usi ki tehniyon par hi latke rahein, balkay is liye ke hajat-mand jab chahein unhein hasil karlein. Fazl ka kaam chahe maafi dena ho, paak karna ho, mehfooz rakhna ho, taqwiyaat dena ho, roshan karna ho, zinda karna ho ya bahaal karna, yeh sab kuch us se hamesha muft aur bila-qeemat mil sakta hai. Aur fazl ke faiz ki koi aisi surat nahin jo us ne apne logon ko ata na ki ho. Jis tarah jism ka khoon agarche dil se jari hota hai lekin woh har uzv tak yaksan pahunchta hai, isi tarah fazl ki barkatun har us muqaddas ki mirast hain jo barre ke saath mun-salik hai. Aur chunke Masih aur us ki kaleesiya ke darmiyan ek shireen rafaqat aur sharakat payi jati hai is liye yeh fazl donon par yaksan taur par jari hota hai. Masih woh sar hai jis par pehle tail dala jata hai, lekin phir wahi tail behte behte pirahan tak ja pahunchta hai, takay ek mamooli muqaddas ko bhi usi qeemti tail ka masah mile jo sar par dala gaya. Haqiqi rafaqat yehi hai jab fazl ka araq tane se shakh tak pahunchta hai, aur jab yeh ihsas hota hai ke tane ki apni zindagi bhi usi ghaza par mauqoof hai jo shakh ko palti hai. Jab hum roz-ba-roz Yesu se is fazl ko hasil karte aur iqrar karte hain ke yeh fazl hum par usi ke tufail jari hota hai, to phir hum us ki aur gehri rafaqat, qurbat aur shadmani se lutf-andoz hote hain. Aaiye hum fazl ki is daulat ko rozana istemal mein layein, aur apne ahed ke Khudawand ke paas hamesha apni zarooratein le kar itni hi dileri ke saath jayein jitni dileri se insan apne batway se raqam nikalta hai.

Yeh koi ghair-mamooli waqia nahin hai. Yeh is akhlaqi kainat ka aam usool hai ke jo log apna kaam sare dil se anjam dete hain woh zaroor kamyab hote hain jabke un logon ki nakami taqreeban yaqeeni hai jo apne kaam ko bad-dili se anjam dete hain. Khuda sust logon ko faslein nahin deta siwaye oont-kataron ke, aur na hi woh un logon ko daulat ata kar ke khush hota hai jo chhupe hue khazane ki talash mein khet ke andar khudayi nahin karte. Yeh baat har jagah mani jati hai ke agar insan kamyabi chahta hai, to use apne kaam ko poori dilchaspi, sargarmi aur lagan ke saath anjam dena chahiye. Deendari ka maamla bhi aisa hi hai. Agar aap Yesu ke liye apni khidmat mein kamyab hona chahte hain, to ise apne dili shauq aur lagan ke saath apne poore dil se anjam dein. Apni deendari mein itni hi quwwat, tawanayi, khuloos aur tandahi sarf karein jitni aap apne karobar mein karte hain, kyunke yeh us se kahin zyada ki haq-dar hai. Khuda Rooh-ul-Quds hamari kamzoriyon mein hamari madad karta hai, lekin woh hamari susti ki hausla-afzai nahin karta balkay woh sargarm imandaron se mohabbat rakhta hai. Masihi kaleesiya mein sab se zyada mufeed insan kaun hain? Woh log jo Khuda ke liye jis kaam ka bera uthate hain use apne sare dil se anjam dete hain. Sab se kamyab Sunday School teachers kaun hain? Kya sab se zyada salahiyat rakhne wale? Nahin, balkay woh jo sab se zyada josh aur jazba rakhte hain yani woh log jin ke dil Masih ke saath ishq ki had tak lagao rakhte hain. Yehi woh log hain jo apne har kaam mein apne Khudawand ko awwalin darja dete hain. Dil ki poori lagan mustaqil-mizaji se zahir hoti hai. Ho sakta hai ke shuru mein nakami ho, lekin sargarm karkun yehi kahe ga ke yeh Khudawand ka kaam hai, aur ise bahar-surat mukammal hona chahiye. Mere Khudawand ne mujhe yehi karne ka hukm diya hai, aur main usi ki quwwat se ise paya-e-takmeel tak pahuncha kar rahoon ga. Ae Masihi! Kya tu isi tarah apne sare dil ke saath apne malik ki khidmat kar raha hai? Yesu ki jan-fishani ko yaad kijiye! Sochiye ke us ne duniya ki najaat ka kaam kis qadar dili shauq, lagan aur aqidat ke saath anjam diya tha! Is had tak ke us ne kaha "Tere ghar ki ghairat mujhe kha gayi". Jab us ka pasina goya khoon ki bari bari boondein ban kar tapak raha tha, aur phir jo bhari saleeb us ne apne muqaddas kandhon par uthayi. Us ne goya apna dil apni ummat ki najaat ke liye undail diya tab ja kar hamari najaat mumkin hui. Jab Yesu apne kaam in ba-dil-o-jaan sargarm tha, to hum neem-garam kyun hain?