Azeez qari! Yeh chhoti si kitab bunyadi taur par imandaron ki ruhani tarbiyat ke liye likhi gayi hai, lekin agar aap abhi tak najaat-yafta nahin hain, to mera dil aap ke liye tarapta hai, aur main aap ke liye koi aisi baat kehna chahta hoon jo aap ke liye bais-e-barkat ho. Apni Bible kholein aur Salateen ki doosri kitab mein se korhiyon ki kahani parhein, aur un ki halat par ghaur karein jo bilkul aap ki halat jaisi thi. Agar aap wahin baithe rahe jahan aap hain, to aap zaroor halak ho jayein ge lekin agar aap Yesu ke paas jate hain to zyada se zyada yehi hoga ke aap apni tabayi maut marein ge. Purani kahawat hai ke kuch pane ke liye kuch khona parta hai, aur aap ke maamle mein yeh sauda koi bara nahin. Agar aap mayoosi ki halat mein yunhi baithe rahe, to jab tabahi aaye gi to koi aap par taras nahin khaye ga, lekin agar aap fazl ki talash karne ke baad marein, woh bhi agar aisa mumkin hua to, phir aap sab ki aalamgir hamdardi ka markaz hon ge. Jo log Yesu ki taraf dekhne se inkar karte hain un mein se koi nahin bachta. Lekin aap jaante hain ke bahar-haal kuch log to aise hain jo us par iman la kar bach gaye hain, kyunke aap ke apne baaz rufaqa ne bhi yehi fazl paya hai, to phir aap kyun nahin? Ninewah ke logon ne kaha tha, "Shayad Khuda raham kare". Aap bhi isi umeed par amal karein aur Khudawand ki rahmat ko azma kar dekhein. Halakat is qadar bhayanak aur haulnak hai ke agar thamne ke liye koi tinka bhi ho, to apni baqa ki jibillat ke tehat aap ko apna haath aage barhana chahiye. Main ne ab tak aap ke iman na lane ki bunyad par aap se baat ki hai, lekin ab main Khudawand ki taraf se aap ko yaqeen dilata hoon ke agar aap use dhoondein ge to woh aap ko mil jaye ga. Yesu apne paas aane wale kisi ko bhi apni huzoori se nikal nahin deta. Agar aap us par tawakkul karein ge to aap halak na hon ge, balkay is ke bar-aks, aap us se kahin zyada qeemti khazana payein ge jitna un be-chare korhiyon ne mulk-e-Shaam ki weeran lashkar-gah se ik ikatha kiya tha. Khuda Rooh-ul-Quds aap ko yeh jurrat de ke aap fauran uthein, aur aap ka iman lana hargiz raigan nahin jaye ga. Jab aap khud najaat pa lein, to is khushkhabri ko doosron tak pahunchein. Khamosh na rahein, pehle shahi khandan yani kaleesiya ko batayein aur un ke saath rafaqat mein shamil hon. Shehar ke darban yani Injeel ke khadim ko apni is daryaft ki khabar dein, aur us ke baad har jagah is khushkhabri ka elan karein. Meri dua hai ke aaj ka suraj gharoob hone se pehle pehle Khudawand aap ko apni najaat se ham-kinar kare.

Apni awargiyon se thaki haari fakhta aakhir-kar kashti ki taraf lauti hai kyunke wahi us ke aaram ki wahid jagah hai. Apni be-sood uran ke baad woh is qadar bojhal aur manda ho chuki thi ke goya woh raah mein hi kahin gir jaye gi aur kashti tak kabhi pahunch nahin paye gi! Magar woh apni jid-o-jahad jari rakhti hai. Nuh sara din apni fakhta ki raah takta raha aur use qabool karne ke liye tayyar baitha hai. Fakhta mein bas itni hi sakat hai ke woh kashti ke kinare tak pahunch sake. Woh mushkil se wahan pahunch kar us par baith pati hai aur girne hi wali hai ke Nuh apna haath barhata hai aur use kheench kar apne paas andar le leta hai. Is baat par ghaur kijiye, "Us ne haath barha kar use le liya." Woh khud urr kar andar nahin gayi thi, balkay woh aisa karne ke liye bohat sehmi hui ya bohat thaki hui thi. Woh jitna urr sakti thi urti rahi, aur phir Nuh ne apna haath barhaya aur use apne paas andar kheench liya. Fazl ka yeh amal us bhatki hui fakhta ke liye dikhaya gaya, aur us ki awargi aur be-murad lautne par use jhirka na gaya. Woh jaisi thi, waisi hi kashti ke andar kheench li gayi. Ae najaat ke talib-o-mutalashi gunahgar! Tu bhi apne tamam gunahon ke saath waise hi qabool kiya jaye ga. "Faqat laut aa." Khuda ke yeh do alfaz kis qadar fazl se bhare hain "Sirf laut aa." Kya aur kuch nahin? Nahin, "Sirf laut aa." Is baar us ke munh mein zaitoon ki daali na thi, us ke paas kuch bhi na tha siwaye apni zaat aur apni awargiyon ke. Magar hukm sirf yehi hai ke "Sirf laut aa", aur woh laut aati hai aur Nuh use andar kheench leta hai. Ae bhatke hue aur bargashta insan! Urr kar aa. Ae nidhaal musafir! Khwah tu khud ko gunah ki keechar ki wajah se kawwe ki tarah siyah hi kyun na samajhta ho, par tu hai fakhta hi. Pas wapas aa, apne munji Khudawand ke paas wapas aaja. Woh har lamha jise tu intezar mein zaya karta hai, teri bad-haali mein izafa hi karta hai. Apne paron ko sanwarne aur khud ko Yesu ke laiq banane ki teri tamam koshishein layani hain. Tu jaisa bhi hai, us ke paas aa ja. "Ae bargashta Israel laut aa." Woh yeh nahin kehta ke "Ae tauba karne wale Israel laut aa" (bilashuba aisi dawat bhi maujood hai), balkay woh kehta hai "Ae bargashta", yani apni tamam-tar bargashtagi ke saath laut aa, laut aa, laut aa! Yesu tera muntazir hai! Woh apna haath barhaye ga aur tujhe "andar kheench le ga", apne paas, jo tera haqiqi aur abdi ghar hai.