Matthew 5:43
"Apne parosi se mohabbat rakh."
athah gehraiyon mein para ho. Lekin shayad tu kahe ke "Main apne parosiyon se mohabbat nahin kar sakta, kyunke mere har bhale kaam ke badle woh nashukri aur haqarat lautate hain". To phir mohabbat ki bahaduri dikhane ka mauqa aur bhi zyada hai. Kya tu mohabbat ki kathan jang larne ki bajaye mahz rahat ke bistar ka sipahi banna chahta hai? Jo sab se zyada himmat karta hai wahi sab se zyada jeetta hai. Aur agar mohabbat ki raah dushwar-guzar hai to is par dileri se chal, aur har haal mein apne parosiyon se mohabbat kiye ja. Un ke saron par aag ke angare jama kar, aur agar unhein khush karna mushkil ho to unhein khush karne ki justuju na kar balkay apne malik Yesu ko khush karne ki fikr kar. Yaad rakh ke agar woh teri mohabbat ko thukra dein, to bhi tu mohabbat karta ja kyunke tera malik ise nahin thukrata, aur tera yeh amal us ke nazdeek itna hi maqbool hai jitna ke un ke nazdeek. Apne parosi se mohabbat rakh, kyunke aisa karne se hi tu Masih Yesu ke naqsh-e-qadam par chal paye ga.
1 Samuel 30:13
"Tu kis ka aadmi hai?"
Deendari mein koi ghair-janibdari mumkin nahin. Hum ya to jalali shehzade Immanuel ke khadim aur us ki jangein larne wale sipahi hain, aur ya phir siyah-fam shehzade yani Shaitan ke ghulam hain. "Tu kis ka aadmi hai?" Ae qari! Mujhe jawab dene mein apni madad karne de. Kya tu naye sire se paida ho chuka hai? Agar haan, to tu Masih Yesu ka hai, lekin nayi paidaish ke baghair tu us ka nahin ho sakta. Tu kis par bharosa rakhta hai? Kyunke jo Yesu par iman late hain wahi Khuda ke farzand hain. Tu kis ka kaam kar raha hai? Yeh yaqeeni baat hai ke tu apne malik hi ki khidmat kare ga, kyunke jis ki tu khidmat karta hai wahi tera aqa hai. Tu kin logon ki rafaqat ikhtiyar karta hai? Agar tu Yesu ka hai, to tu unhi se rafaqat rakkhe ga jo saleeb ke rahi hain. Ham-nawa parinde ek saath urte hain. Teri guftagu kaisi hai? Kya yeh aasmani hai ya dunyawi? Tu ne apne aqa se kya seekha hai? Kyunke shagird apne un ustad se hi seekhte aur tarbiyat pate hain. Agar tu ne apna waqt Yesu ki khidmat mein guzara hai, to tere baare mein bhi wahi kaha jaye ga jo Patras aur Yuhanna ke baare mein kaha gaya tha ke "phir unhein pehchana ke Yesu ke saath rahe hain". Hum is sawal par zor dete hain ke "Tu kis ka aadmi hai?" Neend ki wadi mein utarne se pehle imandari se is ka jawab de. Agar tu Masih ka nahin, to tu ek kathan ghulami mein hai. Abhi waqt hai aur apne is zalim aqa se apna daman chhurra kar bhag ja! Mohabbat bhare Khudawand ki khidmat mein dakhil ho, aur tu barkatun bhari zindagi se lutf-andoz hoga. Agar tu Masih Yesu ka hai, to main tujhe chaar kaam karne ka mashwara deta hoon. Tu Yesu ka hai, pas us ki farmanbardari kar, us ke kalam ko apna nasb-ul-ain bana, us ki khwahish ko apni marzi bana le. Tu Yehovah Khuda ka hai, pas us se ishq kar. Apne dil se use gale laga aur apni poori rooh ko us ki yaad se bhar de. Tu Khuda ke bete Yesu ka hai, pas us par tawakkul kar. Us ke siwa kahin aaram na pa. Tu badshahon ke badshah ka hai, pas usi ke liye tabe reh aur us ke naam se dat ja. Yun, apne mathe par koi zahiri nishan numayan kiye baghair hi sab jaan lein ge ke tu kis ka aadmi hai.