Acts 14:22
"Zaroor hai ke hum bohat musibatein seh kar Khuda ki badshahi mein dakhil hon."
Khuda ke logon ko musibaton ka samna karna parta hai. Khuda ne jab apne logon ko chuna, to yeh kabhi maqsood na tha ke woh aise log hon jinhein kabhi azmaya nahin jaye ga. Unhein musibat ki bhatti mein muqaddas kiya gaya aur un ka chunao dunyawi itminan aur zamini khushi ke liye nahin tha. Un se bimari aur faani takleefon se azadi ka waada kabhi nahin kiya gaya tha, balkay musibatein to unhein Khudawand ki mazeed barkatun ke liye tayyar karne aati hain aur ya phir tanbeeh ke taur par takay woh paak ho kar apni ilahi barkatun ke laiq aur waris ban sakein. Chunancha, musibatein hamare Masihi iman aur muqaddar ka hissa hain kyunke woh Masih ki aakhri wirasat mein hamare liye peshtar se muqarrar kar di gayi thien. Jis tarah sitare us ke hathon ki karigari hain aur un ke madaar usi ke muqarrar karda hain, isi tarah hamari musibatein bhi hamare liye pehle se thehrayi hui hain takay hum kamil kiye jayein. Gharaz, Khuda ne un ka waqt aur maqam, un ki shiddat aur woh asar jo woh hum par dalein gi, sab kuch pehle se tay kar rakha hai. Deendar aur imandar logon ko kabhi apni musibaton se bachne ki umeed nahin rakhni chahiye. Agar woh aisa karein ge to mayoos hon ge, kyunke un se pehle walon mein se bhi koi in ke baghair nahin raha. Ayoob ke sabr par ghaur karein. Abraham ko yaad karein, kyunke us ki apni musibatein thien, aur un ke dauran apne iman ki wajah se woh "imandaron ka baap" thehra. Tamam buzurgon, nabiyon, rasoolon aur shaheedon ki zindagiyon ko ghaur se dekhein aur aap ko un mein se ek bhi aisa nahin mile ga jise Khuda ne fazl ka bartan banaya ho magar woh musibat ki aag se na guzra ho. Yeh qadeem zamane se muqarrar hai ke musibat ki saleeb fazl ke har bartan par naqsh honi chahiye, jaise woh shahi nishan jis se badshah ke izzat wale bartanun ki pehchan hoti hai. Lekin agarche musibat Khuda ke farzandon ki raah hai, unhein yeh jaan kar tasalli milti hai ke un ke Khudawand ne un ke waste khud yeh rasta tay kiya hai. Un ke paas himmat barhane ke liye us ki huzoori aur hamdardi hai, unhein sanbhalne ke liye us ka fazl hai, aur unhein sabr sikhane ke liye us ki misal maujood hai. Phir jab woh "badshahi" mein pahunchein ge, to woh un "bari musibaton" ka behtarin ajr sabit hogi jin se guzar kar woh is mein dakhil hone ke laiq thehre.
Genesis 35:18
"Us ne marte marte us ka naam Bin-oni rakkha (dukh ka beta) aur mar gayi par us ke baap ne us ka naam Benyamin (mere dahne haath ka beta) rakkha."
Har maamle ka ek roshan aur ek tarik pehlu hota hai. Rakhel apni zachgi ki takleef aur maut ke gham mein doobi hui thi. Yaqoob ne agarche apne bachon ki maan ke kho jane par aansu bahaye, magar woh bache ki paidaish mein Khuda ke fazl ko bakhubi dekh sakta tha. Hamare liye yeh kitna hi achha hai ke jab hamara jism to musibaton par matam kare, magar hamara iman ilahi wafadari par ghalib aaye. Samson ko apne hathon se dher kiye hue sher ke panjar se shahad mila tha, aur agar hum sahi taur par ghaur karein to hamari musibatein humein bhi aisa hi phal dein gi. Toofani samundar apni machhliyon se lakhon ka pait bharta hai, jangal bayaban khoobsurat phoolon se mehkta hai, tund-o-tez hawa waba ko ura le jati hai, aur karake ki sardi zameen ki matti ko narm kar deti hai. Siyah badlon se roshan qatre tapakte hain, aur siyah matti se rangeen phool khilte hain. Burayi ki har baat mein bhalayi ka ek pehlu zaroor paya jata hai. Afsurda dilon ko yeh khas maharat hasil hoti hai ke woh azmaish ko dekhne ke liye sab se zyada manfi aur nuqsan-deh nukta talash kar lete hain. Agar duniya mein sirf ek hi daldal ho, to woh jald hi us mein gardan tak dhans jayein ge, aur agar sahra mein sirf ek hi sher ho, to woh us ki dhaar sun lein ge. Hum sab mein is afsos-nak nadani ki kuch na kuch ramaq zaroor payi jati hai, aur kabhi kabhi hum bhi Yaqoob ki tarah pukar uthte hain ke "Yeh sab baatein mere khilaf hain". Iman par chalne ka tariqa yeh hai ke apna tamam bojh Khudawand par daal diya jaye, aur phir bad-tarin aafat se bhi achhe nataij ki tawaqqo rakhi jaye. Gid-on ke sipahiyon ki tarah, iman apne ghare torne par ranjeeda nahin hota, balkay is baat se khush hota hai ke mashal ki roshni mazeed tezi se phel rahi hai. Musibat ki sakht seepi se tazeem ka nayab moti nikalta hai, aur pareshani ke gehre samundar ki gharon se tajrube ka qeemti moonga baramad hota hai. Jab hamari khush-haali ka sailab utar jata hai, to humein rait mein chhupe hue khazane bhi dikhayi dene lagte hain. Jab us ki khushi ka suraj gharoob hota hai, to woh apni umeed ki door-been aasman ke sitaron jaise waadun ki taraf morr deta hai. Jab maut khud samne aati hai, to iman qabr se pare roz-e-qayamat ke jalal ki taraf ishaara karta hai. Aur yun hamara yahi iman marte hue Bin-oni ko hamara zinda Benyamin bana deta hai.