Hum badi ke Filistiyon ke saath ek bari jang mein masroof hain. Har hathiyar jo hamari dastras mein hai, use humein zaroor baroye-kaar lana chahiye jaise ke munadi, taleem, dua, qurbani waghaira neiz woh tore, liyaqatein aur salahiyatein bhi jinhein khidmat ke liye mamooli samjha jata tha, ab unhein bhi istemal mein lana chahiye jaise zair-e-nazar aayat mein phaali, bhaale, kulhari aur kudal waghaira jaise chhote hathiyar bhi Filistiyon ko halak karne mein mufeed sabit hote thay kyunke zyada khurdre auzar zyada sakht zarbein laga sakte hain, aur halak karne ke liye hathiyar ya auzar ka khoobsurat aur pur-kashish hona zaroori nahin balkay mo-assir hona lazmi hai. Waqt ka har lamha, chahe woh mauzoon ho ya na ho; qabiliyat ka har tukra, chahe woh tarbiyat-yafta ho ya ghair-tarbiyat-yafta; har mauqa, chahe woh sazgar ho ya nasazgar, ise istemal kiya jana chahiye, kyunke hamare dushman bohat hain aur hamari quwwat bohat kam hai. Humein apne aksar auzaron ko tez karne ki zaroorat hai; humein samajh-boojh ki tezi, hikmat, tawanayi aur mustaidi ki zaroorat hai yani agar ek jumle mein kahein to Khudawand ke kaam ki tezi ke saath mukammal mutabiqat honi chahiye. Masihi kawishon ke muntazimeen mein amli aql-e-saleem bohat nadir-o-nayab cheez hai. Agar hum chahein to apne dushmanon se seekh sakte hain, aur is tarah Filistiyon se apne hathiyar tez karwa sakte hain. Aaj subah, aaiye hum Rooh-ul-Quds ki madad se is din ke dauran apni Masihi ghairat-o-hamiyat ko tez karne ke liye kuch batein seekh lein. Bey-imanon ki tawanayi dekhein ke woh ek naya pairowkar banane ke liye kis tarah samundar aur zameen ke chakkar lagate hain, kya tamam sargarmi par sirf unhi ka haq hai? Ghair maaboodon ke aqidat-mandon par ghaur karein ke woh apne buton ki khidmat mein kaisi takleefein bardasht karte hain! Kya sirf unhein hi sabr aur istaqamat ka muzahira karna chahiye? Tariki ke hakim ka mushahida karein ke woh apni koshishon mein kis qadar mustaqil-mizaj, apni koshishon mein kitna bey-baak, apne mansobon mein kitna diler, apni sazishen mein kitna zeerak, aur har kaam mein kitna mutaharrak hai! Shayateen apni napak baghawat mein ek aadmi ki tarah muttahid hain, jabke hum Yesu par iman lane wale Khuda ki khidmat ke naam par dharon mein bate huay hain, aur shaz-o-nadir hi kabhi ittefaq ke saath kaam kar pate hain. Kaash ke hum Shaitan ki is unthak mehnat se naik Samriyon ki tarah chalna seekh lein aur yeh dekhein ke hum dushman ki tadbeeron se seekh kar kis tarah aapas mein muttahid magar dushman ke liye seena-sipar ho sakte hain!

Paulas rasool ne Injeel ki munadi ko ek bohat bare sharaf aur aezaz ki baat samjha. Us ne apni bilahat ko koi beigar ya bojh nahin samjha, balkay woh dili shauq aur khushi ke saath is kaam mein shamil hua. Agarche Paulas apni is khidmat ke liye bohat shukr-guzar tha, lekin is kaam mein us ki faqid-ul-misal kamyabi ne use mazeed aajiz bana diya. Ek bartan jitna zyada bharta hai, woh pani mein utna hi gehra doobta chala jata hai. Farigh baithne wale log apni salahiyaton ke baare mein khush-fehmi ka shikar ho sakte hain, kyunke woh azmaye nahin gaye, lekin mehnti khadim jald hi apni kamzori ko bhaanp leta aur frotan ho jata hai. Agar aap aajzi talash karna chahte hain, to sakht mehnat kar ke dekhein, agar aap apni be-mayagi ko jaanna chahte hain, to Yesu ke liye kisi bare kaam ka bera uthayein. Agar aap yeh mahsoos karna chahte hain ke zinda Khuda ke baghair aap kitne be-bas hain, to khas taur par Masih ki be-qiyas daulat ki munadi karne ki koshish karein, aur tab aap ko pehle se kahin barh kar yeh maloom hoga ke aap kis qadar kamzor aur na-cheez hain. Agarche Paulas apni kamzori se bakhubi waqif tha aur us ka iqrar bhi aksar karta rehta tha, lekin woh apni khidmat ke baare mein kabhi pareshan nahin hua. Apni pehli se le kar aakhri munadi tak, Paulas ne sirf Masih ki munadi ki, aur Masih ke siwa kuch nahin bayan kiya. Us ne saleeb ko sar-buland kiya, aur Khuda ke us bete ki har qadam par barayi bayan ki jis ne us ki khatir lahu bahaya tha. Najaat ki khushkhabri phelane ki apni tamam infiradi-o-ijtima-ayi koshishon mein us ki misal hamare liye qabil-e-taqleed hai, aur humein bhi chahiye ke hum bhi "Masihe Masloob" ko apna daimi mauzoo bana lein. Ek Masihi ko bahar ke un khoobsurat phoolon ki tarah hona chahiye jo suraj ke chamkne par apni sunehri pankhriyan khol dete hain, goya keh rahe hon ke "humein apni kirnon se bhar de!" lekin jab suraj badlon ke peeche chhup jata hai, to woh apni wahi pankhriyan band kar ke apne sar jhuka lete hain. Isi tarah ek Masihi ko bhi Yesu, jo Aftab-e-Sadaqat hai, ki roshni se khud ko munawwar aur sargarm karna chahiye! Sirf Masih ke baare mein kalam karna hi woh mauzoo hai jo bone wale ke liye beej aur khane wale ke liye roti hai. Yahi bolne wale ke labon ke liye dehkta hua koyla aur sunne wale ke dil ko kholne wali woh khas kunji hai jo sab par ghalib aane aur dilon ko moh lene ki qudrat rakhta hai.