Agar hum is kalam ko faqat iman se thaam lein, to hamare haath mein ek aisa hathiyar aa jaye jo sab ko maghloob karne ki qudrat rakhta hai. Is do-dhari talwar se kaun sa shak teh-tegh hone se bach paye ga? Woh kaun sa khauf hai jo Khuda ke ahed ki kaman se nikalne wale is teer ke mohlik waar se bach sakta hai? Agar hum apne aap ko "Us ne khud farmaya hai" ki faseel ke neeche chhupa lein to kya zindagi ki kulfatein aur maut ki aziyatein; baatni buraiyan aur zahiri phande; baalayi azmaishon aur zair-e-nigeen waswasay, sab mahaz dam bhar ki musibatein maloom nahin hon gi? Jee han; chahe maqsood tanhai mein khushi ho, ya muqable mein quwwat, "Us ne khud farmaya hai" hamare liye rozmarra zindagi ke goonagon masail ke liye taqviyat ka wahid zariya hona chahiye. Is se hum Kitab-e-Muqaddas ki tehqeeq ki be-inteha qadar-o-qeemat seekh sakte hain. Ain mumkin hai ke Kalam-e-Aqdas mein zaroor koi ek na ek aisa waada pehle se maujood ho jo aap ki darpesh surathal ke saath ain mutabiqat rakhta ho magar aap shayad use na jaante hon aur isi adam-e-marifat ke bais aap apni tasalli kho baithein. Aap kisi kaal-kothri mein band qaidiyon ki manind hon, aur wahin kahin chabiyon ka ek aisa gucha rakkha hai jis ke andar woh ek kunji bhi maujood hai jo aap ke qaid khane ka darwaza khol kar aap ko azad kar sakti hai lekin agar aap use talash nahin karein ge, to aap sari zindagi us kaal-kothri mein pare rahein ge halankay aap ki rahai aap ke bilkul qareeb hai. Kitab-e-Muqaddas ke azeem dawakhane mein aisi koi na koi zor-asar dawa zaroor maujood hogi jo aap ko har marz se shifa dene ki qudrat rakhti hai lekin jab tak ke aap use daryaft karne ke liye Kalam-e-Muqaddas mein us waade ki jaanch aur talash nahin karein ge jo "Us ne khud farmaya hai" tab tak aap apni bimari se shifa nahin pa sakein ge. Kya aap ko Bible Muqaddas ka sarsari mutala karne ki bajaye apne hafze ko Khuda ke qeemti waadon se poori tarah bhar nahin lena chahiye takay ba-waqt-e-zaroorat kaam aa sake? Aap bari bari hastiyon ke aqwal yaad rakh sakte hain, aap namwar shoara ke ashaar ka zakhira jama karne ka shaghaf rakhte hain lekin kya aap ko Khuda ke kalam ke ilm mein bhi itna gehra nahin hona chahiye, takay jab aap kisi mushkil ko hal karna chahein, ya kisi shak ka qila-qama karna chahein, to aap aasani se mutalliqa aayat ka hawala de sakein? Chunkay "Us ne khud farmaya hai" is liye wahi tamam hikmat ka manba aur sari tasalli ka chashma hai. Use apne andar kasrat se basne dein, jaise "pani ka ek aisa chashma, jo hamesha ki zindagi ke liye jari rahe ga". Is tarah aap ilahi zindagi mein tandurust-o-tawana, mazboot aur khush-o-khurram ho kar apne iman mein khoob taraqqi kar sakte hain.

Agar hum Khuda ke kalam ki zyada feham aur aql ke saath samajh hasil karne ki koshish karein to hum doosron ke liye behtar asatiza ban sakte hain aur taleem ke har jhonke se idhar udhar bhi nahin urein ge. Rooh-ul-Quds Kalam-e-Muqaddas ka haqiqi musannif aur wahid hasti hai jo is kalam ko durust taur par samajhne ke liye hamare dilon ko roshan kar sakta hai is liye humein musalsal us se taleem pane aur tamam sachayi mein us ki rahnumai hasil karne ke liye us se iltija karni chahiye. Jab Daniel Nabi, Nebuchadnezzar ke khwab ki tabeer bayan karna chahta tha to us ne kya kiya tha? Woh dua mein baith gaya takay Khuda us par roya ko zahir kare. Yuhanna Rasool ne Patmos ke jazire par apni roya mein ek kitab dekhi jise saat mohrein laga kar band kiya gaya tha aur jise kholne ya is par nazar dalne ke liye bhi koi layak na mila. Woh kitab baad-azan Yahudah ke qabile ke babbar yani Khudawand Yesu Masih ne kholi jis ne ghalib aa kar use kholne ka ikhtiyar aur istaqqaq hasil kiya tha lekin us ke kholne se pehle Yuhanna bayan karta hai ke main "zaar zaar rone laga". Yuhanna ke yeh aansu us ki sayyal duayein aur darasl woh muqaddas kunjiyaan thien jin ke zariye woh mohar-band kitab kholi gayi. Is liye agar aap bhi apni aur doosron ki behtari ke liye kuch karna chahte hain ke "kamal ruhani hikmat aur samajh ke saath us ki marzi ke ilm se mamoor ho jayein" to yaad rakhein ke Daniel ki tarah dua aap ki fathamandi ka behtareen zariya hai kyunke Khuda ki taraf ruju lane se phir aap bhi us ki tarah khwab aur us ki tabeer ko jaan lein ge aur Yuhanna Arif ki tarah aansu bahane ke zariye se aap bhi qeemti sachayi ki saat mohron ko khula hua dekhein ge. Patthar hathore ke bharpoor istemal ke baghair nahin toot-te aur patthar torne wale ko apne ghutnon ke bal jhukna parta hai. Apni mehnat ka hathora istemal karein aur dua ke ghutne ko kaam mein layein to ilham mein aisi koi bhi patthri-li taleem jo aap ke samajhne ke liye mufeed hai aisi nahin jo dua aur iman ke istemal se pash-pash ho kar aap ke samne khul na jaye. Aap dua ke zariye kisi bhi cheez ke paar utarne ke liye apna rasta khud bana sakte hain. Khayalat aur istdlal woh fouladi faane hain jo sachayi par giraft ko aur mazboot bana dete hain lekin dua woh lever hai jo muqaddas bhedon se bhare lohe ke sandooq ko zor-awar tariqe se khol deta hai takay hum us ke andar chhupe huay khazane tak pohanch sakein.