Jab se hum ne dua karna seekha hai tab se hum hazaaron duaein bargah-e-Ilahi mein pesh kar chuke hain. Hamari pehli dua hamare apne liye thi jismein hum ne Khuda se manga tha ke hum par reham kar aur hamare gunaahon ko mita de, aur us ne hamari sun li. Lekin jab us ne baadal ki tarah hamare gunaahon ko mita diya to phir humein apne liye mazeed duaein karni padi. Phir humein taqdees karne wale fazl, neki par mail karne aur burai se rokne wali quwwat aur qudrat ke liye dua karni padi. Humein imaan ki taaza tasdeeq ke liye, wadaon ki tasalli bakhsh farahmi ke liye, aazmaish ki ghari se khalasi ke liye, farz ki adaigi mein madad aur dukh ke din mein Ilahi dastgeeri ke liye dast-e-dua buland karna pada. Aaj bhi humein chaar-o-na-chaar apni zindagiyon ki baqa ke liye Khuda ki huzoori mein jana hi padta hai, un pakkay bhikariyon ki tarah jinhein har cheez maangne ki aadat ho jati hai. Ae Khuda ke farzando, mere saath gawahi do ke humein apni jaanon ke liye aaj tak jo kuch bhi darkaar tha woh humein apne Khuda ke siwa aur kahin se nahin mila. Woh tamam roti jisay kha kar hamari jaan aasooda hui hai aasman se utri hai, aur woh saara pani jisay pee kar hamari pyaas bujhi hai woh hamari zinda chattan yani Khudawand Yasu‘ Masih se jaari hua hai. Aap ki jaan kabhi apne bal-boote par maal-dar nahin hui balkay woh hamesha se Khuda ki rozmarrah sakhawat ki wazifa-khwaar rahi hai, aur isi liye aaj tak aap ki duaein un la-mutanahi roohani rehmaton ke husool ke liye aasman tak buland hoti rahi hain jo aap ko zindagi ke liye darkaar hain. Aap ki zarooratein be-shumaar theen, is liye farahmi bhi la-mutanahi taur par wasee rahi, aur aap ki duaein bhi utni hi an-ginat rahi hain jitni ke woh ne‘matein jo be-shumaar theen. Kya phir aap ke paas yeh kehne ki wajah nahin ke “Main Khudawand se muhabbat rakhta hoon kyun ke us ne meri faryaad aur minnat suni hai”? Jaise aap ki duaein bohat theen waise hi Khuda ke jawabaat bhi bohat aur bar-waqt thay. Us ne hamesha museebat ke din aap ki faryaad suni, aap ko zor bakhsha aur aap ki madad ki, hatta ke us waqt bhi jab aap ne sar-posh, yani fazl ke takht par thartharate aur shak karte hue us ki be-tawqeeri ka irtikab kiya tha. Yaad rakhein aur Khuda ki shukarguzari ke liye isay apne dil ki takhti par likh lein ke kamzor aur na-hif duaein karne ke bawajood us ne kaan jhuka kar aap ki iltijaon ko tahammul ke saath suna aur jawab diya hai: “Ae meri jaan, Khudawand ko mubarak keh aur us ki kisi ne‘mat ko faramosh na kar.”

Aik doosre ke liye dua ko shafa‘at karna kaha jata hai. Shafa‘ati dua karne ke liye aik khush aayand baat hai jo humein sada yaad rakhni chahiye ke aisi duaein Khuda ke kaan ko sab se zyada sheereen aur bhali sunai deti hain, kyun ke shafa‘at Masih ki dua ka bhi turra-e-imtiyaaz rahi hai. Hamare baray sardar kaahin ne us sunehri bakhoor-daan mein ab tak jitna bakhoor dala hai, us ka aik zarra bhi us ki apni zaat ke liye nahin hai. Us ki shafa‘at tamaam munajaaton mein sab se zyada maqbool hai. Badeen sabab, hamari dua Masih ki dua ke jitni mushabeh hogi, utni hi woh sheereen aur maqbool thehregi. Pas jahan aik taraf hamari apni zarooraton ki darkhwastein qubool ki jati hain, wahan doosron ke liye hamari giriya-o-zaari, jismein rooh ke phal, muhabbat, imaan aur baradarana shirakat ki kasrat hoti hai, Yasu‘ ke tafeel Khuda ke huzoor hamara sab se pakeeza nazrana mutasawwar hogi, yani hamari qurbani ka asal maghz. Yeh bhi yaad rakhein ke shafa‘ati dua be-had asar-angez hoti hai. Shafa‘ati duaein hamesha kitne hi kamaalaat aur ajaaibat dikhati rahi hain. Khuda ka kalaam us ke hairat-angez kaamon se bhara pada hai. Ae imandaar, tere haath mein shafa‘at aik taaqatwar waseela hai; isay achhi tarah istemal kar, isay mustaqil-mizaaji se aur imaan ke saath kaam mein la, aur tu yaqeenan apne bhaiyon ke liye baais-e-barakat thehrega. Jab Baadshah teri faryaad sunne ke liye hama-tan gosh ho, to us ke badan ke dukh jhelne wale a‘zaa ki tasalli ke liye us se faryaad kar. Jab jab tujhe us ke takht ke bohat qareeb aane ka istehqaq mile aur Baadshah tujh se kahe ke “maang, aur main tujhe woh doon ga jo tu chahe ga,” to teri iltija sirf tere apne liye na ho balkeh un bohat son ke liye bhi ho jinhein us ki madad darkaar hai. Agar tujh mein zara bhi fazl paaya jata hai magar tu shafa‘at-kaar nahin, to woh fazl raai ke daane jitna chhota hoga. Tere paas bas itna fazl hai ke teri apni rooh museebat ki daldal se nikal kar aab-e-rawaan mein tairti rahe, lekin tere paas fazl ka woh gehra bahaao nahin jis ki badolat tu apni khushiyon se bhari kashti mein doosron ki zarooraton ka bhaari bojh uthaye phiray aur tu Khudawand apne Khuda ke huzoor se un azeem barkaat ko doosron par nichaawar kar sake jo shayad tere baghair unhein haasil na ho sakein. "Bhool jayein mere haath apna yeh hunar aur maharat,
Meri goyaai ho jaye sada ke liye saakit,
Mera dharkta hua dil bhi dharkna chhor de,
Bhool jaoon gar main takht-e-fazl ki sa‘aadat."