Iman, insan ka woh paon hai jis ki madad se woh Khuda ke ahkaam ki raah par chalta hai. Mohabbat qadmon ki raftar ko tez kar sakti hai magar iman ruhani zindagi mein humein aage barhata hai. Iman woh tail hai jo muqaddas bandagi aur sachi parsayi ke pahiyon ko rawani bakhshta hai aur iman ke baghair ruhani zindagi bilkul waise hai jaise pahiyon ke baghair gari. Iman ke saath main sab kuch kar sakta hoon lekin iman ke baghair main Khuda ki taraf mائل hoon ga na Khuda ki khidmat ke liye mujh mein kuch zor ho ga. Agar aap Khuda ki behtarin khidmat anjam dene wale muqaddaseen ko talash karna chahte hain, to aap ko sab se zyada iman rakhne wale logon ko dhoondna hoga. Chhota iman insan ko bacha to le ga, lekin woh Khuda ke liye koi bara kaam nahin kar sakta. Bechara kamzor iman rakhne wala imandar Iblees ka muqabla nahin kar sakta tha is ke liye ek mazboot Masihi iman ki zaroorat hoti hai. Kamzor iman wala mayoosi-o-na-umeedi ke afreet ka qala-qama nahin kar sakta kyunke is deo ko girane ke liye ek ruhani dileri aur mazboot iman ki zaroorat hoti hai. Chhote iman wala bhi yaqeenan aasman par jaye ga lekin us ke jalali taaj par zyada jawahirat nahin hon ge. Kamzor iman kehta hai ke yeh rasta kathan hai, nokeele kanton se bhara aur nihayat pur-khatar hai. Mujhe is par chalne se khauf aata hai lekin bara iman is waade ko yaad rakhta hai ke "Tere bende lohe aur pittal ki manind hon ge aur jaise tere din waisi hi teri quwwat ho" aur isi ke bal-boote par woh kamal dileri se maidan-e-amal mein kood parta hai. Kamzor iman wala mayoosi ke aalam mein khara tasway baha raha hota hai lekin us waqt bara iman yeh geet ga raha hota hai ke "Jab tu sailab mein se guzre ga to main tere saath hoon ga aur jab tu nadiyon ko uboor kare ga to woh tujhe na dubayein gi" aur woh musibaton ke har darya ko uboor kar jata hai. Kya aap pur-sukoon aur khush rehna chahte hain? Kya aap deendari se lutf-andoz hona chahte hain? Kya aap aisi deendari chahte hain jo udasi ki bajaye shadmani se bharpoor ho? To phir Khuda par iman rakhein. Agar aap ko tariki pasand hai, aap afsardagi aur kasm-porsi mein rehne par mutmain hain, to phir chhote iman par hi iktifa karein, lekin agar aap ko roshni pasand hai aur aap khushi ke geet gana chahte hain, to phir is behtarin neimat se aarasta hone ke liye yeh dua maangein ke ae Khuda! "Mere iman ko barha".

Bilashuba aap ki zindagi mein bhi koi na koi aisa waqt aur aisi azmaish zaroor aayi ho gi jis mein aap ko dekhe insan par aitmad karne se andekhe Khuda par aitiqad rakhna zyada aasan aur behtar mahsoos hua hoga. Masihi log aksar madad aur mashware ke liye apne hum-jins insanon ki taraf dekhte hain aur is mein koi qabahat bhi nahin lekin jab baat ho tawakkul karne aur aitiqad rakhne ki to phir "Khuda par tawakkul karna insan par bharosa rakhne se behtar hai." Agar aaj shaam ka yeh kalam Khuda ke kisi aise farzand ki nazar se guzar raha hai jo dunyawi zarooratun ke baare mein fikrmand hai, to hum kuch dair us ke saath isi haqiqat par ghaur karna chahte hain. Agar aap apni najaat ke liye Yesu par, aur sirf Yesu par iman rakhte hain, to phir aap pareshan kyun hain? "Apni bari fikron ki wajah se". Kya yeh nahin likha ke "Apna bojh Khudawand par daal de"? Phir yeh bhi ke "Kisi baat ki fikr na karo balkay har ek baat mein tumhari darkhwastein dua aur minnat ke wasila se shukr-guzari ke saath Khuda ke samne pesh ki jayein". Kya aap dunyawi zarooratun ke liye apne Khuda par bharosa nahin kar sakte? "Aah! Kaash main kar sakta". Agar aap madi cheezun ke liye Khuda par tawakkul nahin kar sakte, to ruhani baaton ke liye us par bharosa karne ki jurrat kaise karte hain? Kya aap apni rooh ki makhalsi ke liye to us par yaqeen rakhte hain, magar chand chhoti neimaton ke liye us par takiya nahin kar sakte? Kya Khuda aap ki zaroorat ke liye kafi nahin, ya kya us ki hama-geeri aap ki hajaton ke muqable mein kam par gayi hai? Kya aap ko us ki aankh ke ilawa kisi aur aankh ki zaroorat hai jo har poshida cheez ko dekhti hai? Kya us ka dil kamzor par gaya hai? Ya kya us ka bazu thak gaya hai? Agar aisa hai to phir kisi aur Khuda ko talash kar lein lekin agar woh la-mahdood, qadir-e-mutlaq, wafadar, sacha aur kamal hikmat ka sarchashma hai, to aap kisi aur sahare ki talash mein idhar udhar kyun bhatakte phirte hain? Aap zameen ko kuraid kar kisi aur buniyaad ki talash kyun karte hain, jab ke yeh buniyaad itni mazboot hai ke woh har us bojh ko utha sakti hai jo aap us par kabhi rakkhein ge? Ae Masihi! Apne iman ki mai mein pani na milayein, aur apne iman ke sone ko insani bharose ke khot se napak na karein. Aap sirf Khuda ke samne khamosh rahein, aur apni umeed us par qaim rakhein. Yunah ki tarah kisi khud-rau bail ki tamanna na karein balkay Yunah ke Khuda par bharosa rakhein. Dunyawi tawakkul ki reitli buniyaadon ka intekhab nadanon ka kaam hai, lekin aap us shakhs ki tarah jo toofan ko pehle se dekh leta hai, apni buniyaad abdi chatan par rakhein.