Psalm 62:5
"Usi se mujhe umeed hai."
Is zaban ka istemal karna har imandar ka istaqqaq hai. Agar woh duniya se kisi cheez ki tawaqqo rakhta hai to yeh waqayi ek be-kaar "umeed" hai. Lekin agar woh apni zarooratun ki farahami ke liye Khuda ki taraf dekhta hai, chahe woh dunyawi barkatein hon ya ruhani, to us ki "umeed" kabhi raigan nahin jaye gi. Woh apne iman ke khazane se musalsal apni zarooratein nikal sakta aur Khuda ke fazl ki daulat se apni hajatein poori kar sakta hai. Main yeh jaanta hoon ke, main sare Rothschilds ke muqable mein Khuda ko apna banker banana zyada pasand karoon ga. Mera Khudawand apne waadun ko poora karne mein kabhi nakam nahin hota, aur jab jab hum unhein us ke takht ke samne pesh karte hain to woh unhein kabhi baghair jawab ke wapas nahin bhejta. Is liye main sirf us ke darwaze par intezar karoon ga, kyunke woh use hamesha apne kaseer fazl ke haath se kholta hai. Us ghari mein use naye taur se azmaon ga. Lekin hamari "umeedein" is zindagi se aage ki hain. Hum jald mar jayein ge; aur tab ke liye bhi "usi se mujhe umeed hai". Kya hum yeh tawaqqo nahin rakhte ke jab hum bimari ke bistar par hon ge to woh humein apne seene se lagane ke liye farishtun ko bheje ga? Hum yaqeen rakhte hain ke jab hamari nabz madham aur dil bojhal hoga, to koi paigham-rasan farishta khara ho kar hum par mohabbat bhari nigah dale ga aur sargoshi kare ga, "Ae muqaddas rooh, mere saath chali aa!". Jab hum aasmani darwaze ke qareeb pahunchein ge, to humein khush-aamdeed ki yeh dawat sunne ki umeed hai ke, "Aao mere baap ke mubarak logo jo badshahi binaye-alam se tumhare liye tayyar ki gayi hai use mirath mein lo". Hum sone ke barbatun aur jalal ke tajun ki tawaqqo kar rahe hain, hum jald hi takht ke samne chamkne wale muqaddaseen ki bheer mein shamil hone ki umeed kar rahe hain, hum us waqt ke muntazir hain balkay tarap rahe hain jab hum apne jalali Khudawand ki tarah hon ge kyunke "hum use waisa hi dekhein ge jaisa woh hai". Phir ae meri jaan, agar yeh teri "umeedein" hain to Khuda ke liye apni zindagi basar kar, us ki tamjeed karne ki khwahish aur dili irade ke saath apni zindagi guzar jis ki taraf se teri tamam zarooratein poori hoti hain, aur jis ke fazl ki badaulat tere chunao, chutkare aur bulawe mein yeh mumkin hua ke tu aane wale jalal ki koi "umeed" rakh sake.
1 Kings 17:16
"Aur Khudawand ke kalam ke mutabiq jo us ne Eliyah ki marifat farmaya tha na to aate ka matka khali hua aur na tail ki kuppi mein kami hui."
Zara, ilahi mohabbat ki wafadari mulahiza farmaein. Aap dekh sakte hain ke is aurat ki rozmarra zarooratein kis qadar sangeen thien. Kaal ke waqt use apna aur apne bete ka pait bharna tha balkay is par turra yeh ke ab, use Eliyah nabi ko bhi khana khilana tha. Lekin agarche zaroorat teen guna bari thi, phir bhi aate ka zakheera khatm na hua, kyunke us ke paas musalsal rasad aa maujood hui. Har roz us ne matke se madad li, lekin phir bhi har roz woh waisa hi raha. Azeez qari, aap ki zindagi mein bhi aisi hi kai rozmarra zarooratein payi jati hon gi aur chunke woh itni kasrat se pesh aati hain, ke aap aksar unhein dekh kar khaufzada bhi ho jate hain ke aate ka matka ek din khali ho jaye ga, aur tail ki kuppi aap ka saath chhor de gi. Magar itminan rakhein, Khuda ke kalam ke mutabiq, aisa hargiz nahin hoga. Har din, agarche apni musibat le kar aaye, to bhi Khuda ki ilahi madad bhi zaroor us ke saath aaye gi aur chahe aap Metushelah ki umar se bhi zyada jiyein, aur chahe aap ki zarooratein samundar ke sahil ki rait jitni kaseer bhi hon, phir bhi Khuda ka fazl aur rahmat aap ki tamam zarooratun mein barabar jari rahe gi, aur aap ko kabhi kami ka samna nahin karna pare ga. Is bewa ke dinon mein, teen lambe barson tak aasman ne kabhi badal na dekha, aur sitaron ne is badkar zameen par kabhi shabnam ka koi muqaddas aansu na bahaya yahan tak ke qaht, veerani aur maut ne zameen ko ek haulnak khandar bana diya, magar yeh aurat kabhi muflis na rahi, balkay hamesha farawani mein khush rahi. Aap ke saath bhi aisa hi hoga. Aap gunahgar ki umeed ko khatm hote dekhein ge, kyunke woh apni zaati taqat par bharosa karta hai, aap maghroor Fareesi ke aitmad ko larkharate dekhein ge, kyunke woh apni umeed rait par banata hai, aap apni hi tadbeeron ko murda aur madhosh dekhein ge, lekin aap khud dekhein ge ke aap ki kumak Khudawand ki taraf se aayegi jaise likha hai ke "Tujhe roti di jaye gi aur tera pani muqarrar ho ga." England ke bank ki milkiyat rakhne se behtar hai ke Khuda aap ka muhafiz aur Yehovah Jireh ho. Aap Jazair-e-Hind ki daulat kharch kar sakte hain, lekin Khuda ki la-mahdood daulat ko aap kabhi khatm nahin kar sakte.