Hamare Khuda jaisi tasalli dene wala kaun hai? Khuda ke kisi muflis, udas aur pareshan farzand ke paas jayein, use us ke shireen waade sunayein aur us ke kaan mein tasalli ki achi achi baaton ki sargoshi karein to is haalat mein use aap ki baaton se kai tasalli-o-tashaffi nahin mile gi. Woh pitt aur naag-done ke karwe ghoont bhar raha hai aur aap use jitni chahe tasalli dein aap ko us se ghamnak lehje mein sabr-o-raza ke ek do bolon ke siwa aur kuch uglwa nahin sakein ge che-jayeke woh aap ke saath mil kar hamd ke geet, Haleluiah ke naare ya khushi ke naare lagana shuru kar de. Lekin jab Khuda apne kisi farzand ke paas aata aur us par apni nazar-e-karam dalta hai to us maatam-zada ki aankhein umeed se chamak uthti hain. Phir aap use yeh gaate huay sun sakte hain ke,
Tu jo mere paas hai to har taraf hai jannat
Ab tu agar juda hua sab kuch jahannum ban jaye ga
Aap apni laakh koshish se bhi use kabhi khush nahin kar sakte magar Khudawand Khuda yeh kaam kar sakta hai kyunke woh sari tasalli ka Khuda hai. Gilead mein koi roghan-e-balsan nahin, magar hamare Khuda ke paas hai aur makhlooqat mein koi tabeeb nahin lekin khaliq hi Yehovah Rapha yani Shafi hai. Yeh intehayi hairat-angez baat hai ke Khuda ke shireen kalam ka ek hi lafz us ke logon ka mukammal geet ban jata hai. Khuda ke barah-e-rast waade ka har ek tasalli bakhsh harf sone ki ek aisi dalli ki manind hota hai jise koi bhi Masihi imandar ek mahir sunaar ki tarah koot kar kai hafton tak phaila sakta hai. Is liye ae be-chargi ke mare Masihi! Tujhe mayusi mein baithne ki qat-an zaroorat nahin balkay us tasalli dene wale ke paas ja aur us se apni tasalli mang. Tu ek khushk kunway ki manind hai aur aap yeh sun chuke hain ke jab koi pump khushk ho jaye to pehle us mein upar se pani dalna parta hai tab ja kar aap use kunway ke andar se pani nikalne ke liye rawan kar sakte hain. Pas ae Masihi! Jab tu khushk ho jaye to apne Khuda ke paas ja aur us se mang ke woh tere dil mein apni khushi undeile aur phir teri khushi kamil ho jaye gi. Dunyawi doston ke paas na ja kyunke aakhir-kar tu unhein Ayub ko tasalli dene walon ki tarah hi paye ga balkay sab se pehle aur sab se barh kar apne us Khuda ke paas ja jo past-halon ko tasalli-o-tashaffi deta aur un ki dhaaras bandhata hai. Phir tu bhi jald hi Zaboor nawees ki tarah kahe ga ke, "Jab mere dil mein fikron ki kasrat hoti hai to teri tasalli meri jaan ko shaad karti hai."

Koi imandar azmaish ko talne ki koshish nahin karta balkay Yesu ki tarah dat kar us ka samna aur muqabla karta hai. Jab jab Shaitan humein azmata hai to us ke sholay pehle se sulagne wali chingariyon par girte hain lekin Masih ke maamle mein yeh pani par sholay barsane ke mutaradif tha magar phir bhi dushman ne apni burayi ka kaam jari rakkha. Ab agar Iblees koi natija baramad na hone ke bawajood apni zarbein lagana jari rakhta hai to zara sochein ke woh us waqt kitni zyada zarbein lagata jaye ga jab woh jaanta hai ke hamare dilon mein pehle hi kis qadar aatish-geer mada bhara hua hai. Chahe Rooh-ul-Quds ke zariye aap ki taqdees pehle hi se ho chuki ho phir bhi yeh tawaqqo rakhein ke jahannum ka yeh shikari kutta mutawatir aap ke upar bhaunkta rahe ga. Insaanon ke beech to hum azmaye jaane ki tawaqqo rakhte hi hain lekin tanhai bhi humein is azmaish se nahin bacha sakti kyunke Yesu Masih ko insani muashray se bohat door ek biyaban mein le jaya gaya aur wahan woh Iblees se azmaya gaya. Tanhai ki apni ranginiyan aur fawaid hote hain kyunke yeh aankhon ki khwahish aur zindagi ki sheikhi ko rokne mein madadgar sabit ho sakti hai magar Iblees hamari khalwat ke intehayi tareek goshon mein bhi hamara peecha karna nahin chore ga. Yeh guman na karein ke sirf duniya-dar logon ko hi haulnak khayalat aur kufriya azmaishon ka samna karna parta hai kyunke ruhani zehen rakhne wale log bhi isi se guzarte hain aur muqaddas tareen maqaam par bhi humein tareek tareen azmaish ka samna karna par sakta hai. Rooh ki intehayi waqf shuda wafadari bhi aap ko shaitani azmaish ke khilaf koi zamanat farahum nahin kare gi kyunke Masih mukammal taur par waqf aur makhsoos ho chuka tha balkay us ka odhna bichona aur khana peena bhi yahi tha ke apne bhejne wale ki marzi ko poora kare magar phir bhi woh azmaya gaya! Aap ke dil Yesu ki mohabbat ke sholon se dehak rahe hon ge aur phir bhi Iblees aap ko Laodicea jaisi neem-garmi ki taraf lane ki sartorr koshish jari rakhe ga. Agar aap mujhe yeh bata sakein ke Khuda kab ek Masihi ko apne ruhani hathiyar utarne ki ijazat deta hai to main aap ko bata doon ga ke us waqt jab Shaitan aap ki azmaish karna chor de ga. Purane jangjuon ki tarah humein sote waqt bhi apne ruhani hathiyaron se lais rehna chahiye kyunke woh bara dhoke-baz hamari chhoti si ghaflat ka faida utha kar humein daboach sakta hai. Pas zaroorat is amar ki hai ke hum har waqt hoshiyar aur bedar rahein aur Khuda ki madad se is garajne wale sher-e-babbar ke jabron se bachne ke liye apni ruhani jiddo-jehad ko jari rakhein.