Jab koi shakhs aap ko pyara lagta hai to us ki khatir us se wabasta har cheez bhi pyari lagne lagti hai. Isi tarah, tamam sache imandaron ki nazar mein Khawand Yesu ki zaat is qadar besh qeemat hai ke woh us se mansoob har baat ko anmol aur har qeemat se balatar samajhte hain. Daud ne kaha tha ke “Tere har libas se mur, oud aur tij ki khushboo aati hai,” goya Manji ki khil‘at bhi us ki zaat se mansoob hone ki wajah se itni khushbodar ho gayi ke woh us ke liye bhi apni muhabbat ka izhar kiye baghair na reh saka. Yeh baat yaqini hai ke har woh jagah jahan us ne apna qadam-e-mubarak ranja farmaya, har woh lafz bhi jo us ki zaban-e-mubarak se ada hua, ya har woh khayal bhi jo us ke muhabbat bhare kalam mein zahir hua, woh hamare liye duniya ki sari daulat se zyada qeemti hai. Yahi haqeeqat Masih ke namon par bhi sadiq aati hai ke us se mansoob sare naam bhi tamam imandaron ke liye nihayat sheereen aur izzat o ta‘zeem ka maqam rakhte hain chahe use kaleesia ka shohar kaha jaye ya us ka dulha, us ka dost kaha jaye ya banaye alam se peshtar zabh kiya hua barra, badshah, nabi ya kahin kaha jaye ya Shiloh, Immanuel, Ajeeb, Mushir aur Khudaye Qadir ya kuch bhi. Us se mansoob har ek zaati o safi naam o alqab us chhatte ki manind hai jis se sheereen aur muqawwi shahad tapakta hai. Lekin us se mansoob sare namon mein se ek naam aisa hai jo har imandar ke kanon mein goya ras gholta hai to woh Yesu naam hai! Yesu woh naam hai jise sun kar aasmani barbaten ek jalali jal-tarang ke andaz mein naghmasarai karne lagti hain aur tamam makhluqat sajda rez ho kar kornish baja lati hain. Yahi naam hamari tamam khushiyon ki hayat hai. Is se barh kar duniya mein aur koi naam dilkash aur qeemti nahin hai. Hamari hamd o sana ke tane bane isi naam se murassa‘ o musajja‘ hain kyun ke hamare bahut se geet isi naam se shuru hote, isi naam par mabni hote aur isi naam ki tamjeed mein gaye jate hain. Shayad hi koi achha geet ho jo is naam par khatam na hota ho kyun ke yeh naam sari rahatoun ka wahid majmua aur sarchashma hai jise sunte hi poori kainat khil uthti hai. Yeh naam ikhtisar mein chaar huroof par mabni hai magar haqeeqat mein azal se abad tak ke sare alamon se zyada wasee‘ o baseet aur ameeq hai. Aasman o zameen ki sari barkatein jis ism-e-wahid mein pinhan hain, woh naam Yesu hai!
"Main tere pyare naam se behad pyar karta hoon
Ke is se dil aur jaan o rooh sarshar karta hoon."

Kuch logon se agar poochha jaaye ke woh najat se kya murad lete hain, to un ka jawab yeh hoga ke, “Jahannam se bachaya jana aur aasmaan par le jaya jana.” Yeh najat ka ek nateeja to hai, lekin is ne‘mat mein jo kuch shamil hai yeh us ka daswan hissa bhi nahin hai. Yeh sach hai ke hamara Khawand Yesu Masih apne sab logon ko aane wale ghazab se chhurata hai; woh unhein us holnaak saza se bachata hai jo un ke gunahon ki wajah se un par wajib thi; lekin us ki fatah is se kahin zyada kamil aur mukammal hai. Woh apne logon ko “un ke gunahon se” najat deta hai. Aah! hamare badtareen dushmanon se kaisi sheereen khalasi. Jahan Masih najat ka kaam kar ke apne logon ko fatah, badshahi aur hamesha ki zindagi se humkinar karta hai, wahan woh apni qudrat-e-kamilah se Shaitan ko bhi takht o taraj karta hai. Koi bhi shakhs us waqt tak haqiqi Masihi nahin ho sakta jab tak gunah us ke fani badan par hukumat karta rahe. Haan, yeh sach hai ke gunah hamare jismani batin mein basa rehta hai aur us waqt tak hamari zindagiyon se daimi taur par juda nahin hoga jab tak ke hamari roohen abdi jalal mein dakhil na ho jaayen. Magar yeh kabhi hum par ghalib nahin aayega. Ghalbe ki jang aur kashmakash hamari jari rahegi kyun ke woh nai shariat aur nai rooh ko maghloob karne ki apne taeen sartoar koshish karega jo Khuda ne hamare batin mein jaguzin ki hai, magar gunah se najat ki barkat se gunah hum par kabhi is tarah ghalib nahin aayega ke hamare poore wujood ko ek mutlaq-ul-anan badshah ki tarah apne qabze mein le kar hamari zindagiyon ka badshah ban jaye. Balki Masih hamari zindagiyon ka malik aur haqiqi badshah hai jis ne gunah ke zor ko tor kar hamein apni najat se behra mand kiya hai. Yehovah ke qabeelay ke us babar ne saanp ke sar ko kuchal diya hai. Ae Masihi! ab tu bata. Kya gunah tere andar maghloob ho chuka hai? Agar teri zindagi napaak hai to tera dil hanooz tabdeel nahin hua, aur agar tera dil tabdeel nahin hua to tu ek ghair najat yafta shakhs hai. Agar Manji ne tujhe pak nahin kiya, tujhe naya nahin banaya, tujhe gunah se nafrat aur pakeezgi se muhabbat karne ki taufiq nahin bakhshi, to tere andar najat ka koi kaam nahin hua ya us ka samar poori tarah zahir nahin hua. Woh fazl jo insan ko doosron se behtar nahin banata, ek bekaar aur jaali cheez hai. Masih apne logon ko un ke gunahon mein nahin phansata, balki un se najat deta hai. “Pakeezgi ke baghair koi Khawand ko na dekhe ga.” “Jo koi Khawand ka naam leta hai narasti se baz rahe.” Agar gunah se najat na mile, to hum us ke barguzeedon mein shumar hone ki umeed kaise rakh sakte hain. Ae Khawand, main tujh se apne har gunah ki maafi mangta aur us se najat ki darkhwast karta hoon. Mujhe taufiq bakhsh de ke main is najat ke liye umr bhar apne Manji ki shukrguzari aur tazeem kar sakun.