Khuda ki makhlooq hone ke naate, hum sab us ke qarzdaar hain ke apne saare badan, apni saari rooh aur apni saari taqat se us ki farmaanbardari karein. Us ke ahkaam ki hukm-udooli ke baad, jo hum sab se sarzad hui, hum us ke adl-o-insaaf ke qarzdaar hain, aur hum par us ka yeh qarz itna bhaari hai ke isay hum apne bal-boote par kisi soorat aur kabhi ada nahin kar sakte. Lekin aik Maseehi imandaar ke baare mein yeh poore wusooq ke saath kaha ja sakta hai ke ab woh Khuda ke adl ka kuch qarzdaar nahin, kyun ke Maseeh ne apne logon ke zimma wajib-ul-ada qarz khud apne besh-qeemat ka fidya de kar ada kar diya hai. Is sabab se, imandaar ab faqat Khuda ki muhabbat ka qarzdaar hai. Main Khuda ke fazl aur us ki gunaah maaf karne wali rehmat ka qarzdaar hoon. Lekin main ab us ke adl ka qarzdaar nahin raha, kyun ke woh mujh se kabhi aise qarz ka mutaliba nahin kare ga jo pehle hi ada ho chuka hai. Maseeh ne kaha, “Tamaam hua!” aur is se us ka matlab yeh tha ke us ke logon par jo kuch bhi qarz tha woh yaadgaar ki kitaab se hamesha hamesha ke liye mita diya gaya hai. Maseeh ne ilahi adl ke sab taqaazon ko poora kar diya hai. Hamara khata be-baaq ho chuka hai, balkeh woh poori dastavez hi keelon ke saath saleeb par jarr di gayi hai. Raseed bhi de di gayi hai, aur ab hum ilahi adl ke qarzdaar nahin rahe. Lekin phir, chunanche ab hum us aitbaar se to apne Khudaawand ke qarzdaar nahin rahe, magar doosri taraf hum Khuda ke pehle se kahin das guna zyada qarzdaar ban gaye hain. Ae Maseehi, zara thehar aur aik lamhe ke liye is par ghour kar. Tu ilahi fazl aur nijaat ka kitna bara qarzdaar hai! Tu us ki be-loas muhabbat ka kitna ehsaan-mand hai, kyun ke us ne apna beta bakhsh diya taake woh teri khaatir saleeb par apni jaan de. Is baat par ghour kar ke tu us ke maafi-bakhsh fazl ka kitna qarzdaar hai ke das hazaar martaba nafarmaani ke baad bhi woh tujh se waisi hi la-mutanahi muhabbat karta hai jaise hamesha karta tha. Zara ghour kar ke tu us ki qudrat ka kitna qarzdaar hai. Us ne tujhe gunaah ki maut se nikaal kar kaise zindagi mein daakhil kiya. Us ne teri roohani zindagi ko kaise barqarar rakha. Us ne tujhe girne se kaise bachaya aur bawajood is ke ke hazaar-ha dushmanon ne tera rasta rokne ki koshish ki, magar tujhe apni raah par qaim rehne ki taufeeq aur quwwat ata ki gayi. Is baat par bhi ghour kar ke tu us Khudaye-la-tabdeel ka is liye bhi qarzdaar hai ke agarche tu hazaar baar badal gaya, lekin woh aik baar bhi nahin badla. Isi tarah tu Khuda ke baqi har aik wasf ka bhi itna hi qarzdaar hai. Khuda ke huzoor tu khud apni zaat balkay apni har cheez ka bhi qarzdaar hai.
Pas tere paas ab aik hi rasta hai ke apne aap ko paak, be-aib aur zinda qurbani ke taur par us ke huzoor pesh kar de, yahi teri maqool ibaadat hai.

Yeh alfaaz Masih ke liye imandaar ki tarap aur us ke saath rafaqat ki shadeed khwahish ko bayan karte hain. Tu apna galla kahan charata hai? Apne ghar mein? Agar tu mujhe wahan mile to main zaroor jaoonga. Poshida dua mein? To main bila-nagha dua karoonga. Kalaam mein? To main usay shauq se parhoonga. Apne aaeen-o-dastoor mein? To main poore dil se us par chaloon ga. Mujhe bata ke tu apna galla kahan charata hai, kyun ke jahan bhi tu charwaahay ke taur par khara hoga, wahin main bheer ban kar tere qadmon mein let rehna chahta hoon, kyun ke tere siwa koi meri zaroorat poori nahin kar sakta. Tujh se door reh kar mujhe sukoon nahin milta. Meri rooh teri taaza huzoori ke liye bhooki aur pyaasi hai. Tu dopahar ke waqt apne galle ko kahan aaraam deta hai? Kyun ke subah ho ya dopahar, meri wahid aaraam gaah wahi hai jahan tu aur tera azeez galla hai. Mere dil ki haqeeqi tasalli tere fazl se milne wala aaraam hai jo sirf tujh hi se mil sakta hai. Us chattan ka saaya kahan hai? Bhala main us ke neeche aaraam kyun na karoon? Main kyun un logon ki tarah banoon jo tere rafeeqon ke gallon ke paas bhatakte phirte hain? Tere bhi rafeeq hain, to kyun na main bhi un mein se aik ban jaoon? Shaitaan mujh se kehta hai ke main naamqbool hoon, magar main to hamesha se hi naamqbool tha lekin tu ne phir bhi mujh se hamesha muhabbat rakhi, is liye meri na-ahli ab tere saath meri rafaqat mein rukaawat nahin ban sakti. Yeh sach hai ke mera imaan kamzor hai aur main bohat jaldi dagmaga jata hoon, lekin meri yehi kamzori mujhe us jagah pohanchne ke liye kheenchti hai jahan tu apna galla charata hai, taake main teri qurbat mein rahoon aur har tarah ke khauf-o-khatar se mehfooz rahoon. Main kyun bhatkoon? Mere paas bhatakne ki hazaaron wajoohaat hain magar sirf aik wajah un sab par bhaari hai, kyun ke Masih mujhe apni taraf bula raha hai. Agar us ne khud ko thori dair ke liye ojhal kiya bhi hai to sirf is liye ke main us ki huzoori ko zyada qadr ki nigah se dekhne ka hunar seekh loon. Ab jab ke main us se door hone ki wajah se ghamgeen aur pareshaan rehta hoon, woh mujhe aik baar phir apni usi panaah gaah ki taraf le jaye ga jahan us ke galle barray sooraj ki tamazat se mehfooz rehte hain.