Yeh kaffare ki la-tabdeel sachai ki awaaz hai. Yahoodiyon ki kisi bhi rasm mein gunahon ko khoon bahaye baghair, hatta ke alamatī taur par bhi, door nahin kiya jata tha. Kisi bhi soorat mein, aur kisi bhi tareeqe se, kaffare ke baghair gunah maaf nahin ho sakta. Pas, yeh baat wazeh hai ke Masih ke siwa koi umeed nahin; kyunke gunah ke kaffare ki haisiyat se ab kisi doosre khoon ki koi ahmiyat nahin rahi. To kya main us par imaan rakhta hoon? Kya us ke kaffare ka khoon waqai mere sab gunah dho chuka hai? Apne liye us ki zaroorat ke aitbaar se tamaam insaan aik hi satah par hain. Chahe hum jitne marzi ba-ikhlaq hon, sakhi hon, hamdard hon ya muhibb-e-watan, is usool mein hamare liye istisna ki gunjaish paida karne ke liye ratti barabar bhi tarmeem nahin ki ja sakti. Gunah us ke khoon se kisi kamtar cheez se maghloob hi nahin ho ga kyunke use Khuda ne bani-nau-insaan ke kaffare ke taur par muqarrar kar diya hai. Yeh kitni mubarak baat hai ke gunahon ki maafi ka sirf aik hi rasta hai aur woh hai Yesu ka besh-qeemat khoon! Hum bhala kisi doosre raste ki talash kyun karein? Mahz rasmi deendaar log is bhed ko samajh nahin sakte ke hum is baat par kaise khush ho sakte hain ke Masih ke iwaz hamare sab gunah maaf kar diye gaye hain. Unhein apne kaamon, duaaon aur riyazaton se sukoon nahin milta aur un ki yeh bechaini hamare liye qata’an hairat ki baat nahin, kyunke woh us azeem nijaat ko nazar-andaz karte hue khoon ke baghair maafi hasil karne ki tag-o-dau kar rahe hain. Aey meri jaan! Baith ja aur is baat ko pehchan ke woh aadil o munsif Khuda har aik gunah ki saza dene ka paband hai, magar ghour kar ke tere imaan lane ke baais teri saari saza Khawand Yesu ne apne upar utha li. Is liye ab kamal aajizi, khushi aur shukarguzari ke sath us ke qadmon mein sajda-e-ta’zeem pesh kar jis ke apne qeemti aur be-aib khoon se tera fidya diya hai. Jab aik baar zameer bedaar ho jaye to itminaan-e-qalb ke liye jazbaat aur zahiri sabooton par bharosa karna be-sood ho jata hai kyunke yeh aik buri aur afsosnaak aadat hai jo hum ne Misr ki aseeri mein seekhi thi. Pashaiman zameer ka wahid ilaaj saleeb par Yesu ko masloob haalat mein dekhna hai. Laawiyon ki shariat kehti hai ke “khoon mein jaan hai”, jis bina par hum bhi poore wasooq se yeh kehte hain ke Yesu ne apni jaan de kar hamari jaan ko abadi halakat se bacha liya hai.
"Aah! behta hai mere Munji ka yeh khoon kitna pyara,
Us par imaan la kar mila mujh ko hai sahara, Kaamil sulah karai meri Khuda se us ne,
Dekho Masih ke khoon se mera hua kaffara."

Khuda ke kalaam ki sachaiyan is qadar qadeem aur ameeq hain ke kisi insaan ke liye in ki hudood o gehraai tak pohanchna muhaal hai, magar in ke andar hamari roohon ki shaadmaani ka bhed muzmar hai. Aaiye aik lamhe ke liye un par ghour o khauz karein aur unhein wese hi dohrayein jaise koi maaldaar apne maal ka shumaar karta hai. Jis ilahi intikhaab ke tehat aasmaani Baap ne humein chuna aur hamesha ki zindagi ke liye muqarrar kiya, waqai be-had qadeem baat hai, aisi qadeem ke insaani aqal us ke aaghaz ka tasawwur bhi nahin kar sakti. Us ne humein bina-e-aalam se peshtar Masih mein chun liya tha. Is intikhaab ke sath us ki azli o abadi muhabbat bhi shaamil thi, kyunke yeh mehaz mashiyat-e-ezdi ka koi saada sa faisla nahin tha balkeh is mein Khuda Baap ki gehri raghbat aur qalbi muhabbat bhi shaamil thi. Baap ne ibtida hi se hamare sath muhabbat rakhi. Yeh bila-naagha ghour o fikr ke laiq aur aik bara mazmoon hai. Hamari tabaah-haali ko peshtar se dekhte hue humein chhurane, paak o saaf karne aur aakhir-kaar abadi jalaal mein shaamil karne ka azli mansuba aur maqsad bhi utna hi qadeem hai jitni Khuda ki la-tabdeel muhabbat. Is ahd ko hamesha “azli o abadi” hi bayaan kiya gaya hai, aur is ahd ka doosra fareeq, yani Yesu, bhi azal se hai balkeh Kitaab-e-Muqaddas mein use Qadeem-ul-Ayyam bhi kaha gaya hai. Pehle sitare ke chamakne se bhi bohat pehle us ne aik paak ahd baandha, aur usi ahd mein hum barguzeedon ko hamesha ki zindagi ke liye naamzad aur muqarrar kar diya gaya tha. Is tarah Khuda ke Bete aur us ke logon ke darmiyan aik aisa mubarak ahd qaim hua jo zamanon ke poora ho jaane ke baad bhi abad-ul-aabaad jaari o saari rahe ga. Kya in qadeem sachaiyon se waqif hona hamare liye faida-mand nahin? Yeh kitni dukh ki baat hai ke Masihi hone ka da‘wa karne walon ki aksariyat in sachaiyon ko nazar-andaz kar deti hai aur qadeem o daqiyanosi qarar de kar in se kanni katarati hai. Agar woh apne gunah ki wus‘at ko haqeeqi ma‘non mein jaante, to un ki zabanen is imtiyazi fazl ki sataish karte kabhi na thaktein. Aaiye aaj ki shaam hum is fazl-e-be-payaan ki tamjeed mein mil kar gaayein:
"Fazl ka aik nishaan hoon main,
Lahoo se hoon dhula hua;
Rehmat ka aik nishaan hoon main,
Mein banda tera chuna hua;
Teri kitaab-e-hayaat mein,
hai naam bhi likha hua."