Masih ki kaamil sadaqat par ghhor o fikr karna hamesha ek Masihi ke liye itminaan, tasalli, rahat aur khushi ka baais hota hai. Khuda ke muqaddaseen aksar mayoos aur afsurdah ho jaate hain. Mera nahin khayal ke unhein aisa karna chahiye. Agar woh Masih mein apni kaamiliyat ko poori tarah dekh saken to main nahin samajhta ke woh dobara kabhi udaas honge. Kuch log hamesha apni khwahishaat ki mehroomi, badhaali aur rooh ki baatini buraai ke baare mein barbaraate rehte hain. Yeh bilkul sach hai, lekin humein is se thora aage barh kar yeh yaad rakhna chahiye ke hum “Masih Yesu mein kaamil” hain. Yeh koi hairat ki baat nahin ke jo log apni kharaabiyon par sochte rehte hain un ke chehre itne udaas kyun nazar aate hain. Lekin agar hum yeh baat yaad rakhein ke “Masih hamari sadaqat ban gaya” to hamare dil khushi ke maare jhoom uthenge. Rozmarrah zindagi ke gona goon dukh humein chahe laakh pareshaan dein, Shaitaan bhi chahe mujh par baar baar hamla aawar ho, aasman par pohanchne se pehle chahe mujhe bohat si mushkilaat ka saamna karna pare, meri sadaqat apne Khudawand Yesu Masih mein pehle hi kaamil ho chuki hai. Kyun ke mere Khudawand mein kisi cheez ki kami nahin, aur us ne meri zindagi mein bhi koi kami nahin chori. Saleeb par us ne kaha “Tamaam hua”. Aur ab agar sab kuch poora ho chuka hai to meri sadaqat bhi us mein kaamil aur mukammal ho chuki hai. Yeh baat mere liye aisi khushi ka baais hai jo bayaan se baahar aur jalal se bhari hai. Ab meri sadaqat shariat par mauqoof nahin balkay woh jo Masih par imaan lane ke zariye fazl par munhasir hai, yaani woh sadaqat jo Khuda ki taraf se imaan ki bunyaad par milti hai. Aap ko aasman ke us paar un logon se zyada paak aur muqaddas qaum aur kahin nahin milegi jo Masih ki sadaqat ke aqeede ko apne dilon mein jagah de kar wahan ja pohanchi hai. Jab imandaar kehta hai ke “main sirf Masih ki badolat jeeta hoon, main apni najat ke liye sirf us par bharosa karta hoon, aur mera imaan hai ke chahe main kitna hi na-laaiq kyun na hoon, main phir bhi apne Yesu Masih mein kaamil hoon”. Is baray istehqaq ke liye shukar guzari ke taur par dil mein yeh khayal zaroor ubharta hai ke “kya ab main Masih ke liye na jeeyun. Kya main us se muhabbat na karun aur us ki khidmat na karun, yeh jaante hue ke main us ki sadaqat, raastbaazi aur paakeezgi ke sabab se bachaya gaya hoon”. Masih ki muhabbat humein majboor karti hai taake jo jeete hain woh aage ko apne liye na jeeyun balkay us ke liye jeeyun jo un ke wastay moa. Agar humein Masih ki is sadaqat ke bal bootay par najat mili hai to aaiye aaj ke din is sadaqat ki be had qadr aur shukar guzari karein.

Sirf daurrna hi sab kuch nahin hota, balkay daurne ke amal mein raaste ka intikhab bhi bohat zyada ahmiyat rakhta hai. Ek tez raftaar musaafir jo pahaaron aur waadiyon ke kathin raaste par chal raha ho, woh us sust raftaar musaafir ka muqaabla nahin kar sakta jo hamwaar maidaan mein mahv e safar ho. Meri roohani musaafirat ka kya haal hai. Kya main apne aamaal ke pahaaron par charhne aur apni nadaamaton aur iraadon ki khaiyon mein utarne ki mashakkat kar raha hoon, ya main “imaan lao aur zindagi pao” ke hamwaar raaste par daur raha hoon. Imaan ke zariye Khudawand ki raah ko takna kitni badi barkat ki baat hai. Imaan ki raah par chalte hue rooh thakaawat ke baghair daurti hai aur ghash khaaye baghair chalti hai. Yesu Masih zindagi ki raah hai, aur woh ek hamwaar aur khushgawaar raasta hai, jo kaanpte hue gunahgaaron ke dagmagaate qadmon aur kamzor ghutnon ke liye mauzoon hai. Kya main us raaste par paya jata hoon, ya main kisi aur pagdandi ki talaash mein hoon jiska daawa aur waada insaani falsafah ya mazhabi rasoomat ki jaanib se kiya jata hai. Main ne paakeezgi ki raah ke baare mein parha hai ke us par chalne wala musaafir chahe kitna hi nadaan kyun na ho, bhatak nahin sakta. Kya main apni mutakabbirana soch se nijaat pa chuka hoon aur ek chhote bachay ki tarah Yesu ki muhabbat aur us ke khoon par bharosa karne ke liye us ki huzoori mein laya gaya hoon. Agar aisa hai, to Khuda ke fazl se main us zor aawar tareen daurne wale se bhi aagay nikal jaaunga jo kisi doosre raaste ka intikhab kiye hue hai. Main apni rozmarrah fikron aur zarooraton ke girdab mein is sachai ko apne faiday ke liye yaad rakh sakta hoon. Mere liye yehi sab se daanishmandana tareeqa hoga ke main foran apne Khuda ke paas jaoon, na ke idhar udhar doston ke paas bhatakta phiroon. Woh meri sab zarooraton ko jaanta aur unhein muhaiya kar sakta hai, to bhala main dua ki barah e raast darkhwast aur us ke waadon ki saadah daleel ke saath us ke siwa aur kis ke paas jaoon. “Seedha raasta hi daurne wale ko kaamyab banata hai”. Main khadimon ke saath behas nahin karunga balkay un ke maalik ke paas pohanchne mein jaldi karunga. Is hawalay ko parhte hue yeh khayal aata hai ke agar insaan aam muamlaat mein ek doosre ka muqaabla karte hain aur ek doosre se aagay nikal jaate hain, to mujhe bhi poori sanjeedgi ke saath aise daurna chahiye ke jeetoon aur inaam haasil kar sakoon. Ae Khudawand, mere zehan ko jila bakhsh aur meri madad farma, taake main us nishaan ki taraf barhta rahoon jo Masih Yesu mein Khuda ki taraf se meri aala bulaahat ka ajar aur inaam hai.