2 Corinthians 4:18
"Andekhi cheezein."
Apni Masihi musafarat ke beshtar hisse mein, hamare liye iman ki aankhon se aage ki taraf dekhte rehna hi behtar hai. Sirf iman ki aankhon se hi andekhi cheezon ko dekha ja sakta hai jaise ke aasmani manzil aur wahan ke jalali taj. Chahe woh umeed ho, khushi ho, tasalli ho ya hamari mohabbat ki tehreek, iman ki aankh ka asal markaz mustaqbil hi hona chahiye. Mustaqbil mein jhankte hue, iman ki aankhon se hum dekh sakte hain ke gunah ka khatma kar diya gaya hai, gunah aur maut ka badan fana ho chuka hai, aur ruh kamil ho kar noor mein muqaddason ki meras mein unn ke saath shareek hai. Mazeed aage dekhein ge, to imandar ki roshan aankh maut ke darya ko uboor kar ke, udas lehron ko paar karte hue aur unn noorani paharon tak dekh sakti hai jahan aasmani shehar waqe hai. Wahan hum khud ko motiyon ke phatakon mein dakhil hote, fatah se barh kar ghalba pane wale ke tor par bulaye jate, Masih ke hathon se taj pehente, Yeshu ki aaghosh mein samate, unn sab muqaddason ke saath jalal pate aur unn ke saath jalali takht par barajman hote hue ain ussi tarah dekh sakte hain jaise woh khud ghalib aa kar apne baap ke saath takht par ja bitha tha. Mustaqbil ka yeh khayal maazi ki tariki aur haal ki udasi ko door kar sakta hai. Aasman ki khushiyan yaqeenan zameen ke dukhon ka muawza sabit hon gi. Ay mere shubhat, khamosh ho jao! Maut mahaz ek chhoti si nadi hai jise hum jald hi paar kar lein ge. Zindagi kitni mukhtasar aur abadiyat kitni taveel hai! Maut kitni aarzi aur la-faniyat kitni la-mutanahi hai! Mujhe aisa mehsoos hota hai jaise mein abhi se Wadi-e-Iskal ke angooron ke khoshe kha raha hoon aur uss chashme se paani pee raha hoon jo phatak ke andar hai; rasta bahut hi mukhtasar hai aur mein jald wahan pahunch jaoon ga.
Jab zamana dil pe apne gham ke saye daal de,
Fikr ki aandhi chale, sab chain hum se chheen le, Mere achhe soch phir upar falak tak ja pahunchein, Aur mayousi ke lamhon se mujhe azad kare
Rah-e-zindagi mein mera sath de iman mera,
Jab talak yeh safar-e-hasti ho na jaye khatam sa, Khauf aayein, dard hon, mushkil ho ya ho imtihan Phir bhi aakhir mein mein apne ghar pahunchoon ga zara.
Genesis 8:11
"Aur woh kabootari shaam ke waqt uss ke paas laut aayi."
Rahmaton bhare ek aur din ke liye Khudawand ka naam mubarak ho! Ab agarchay main din bhar ki mushaqqat se thak gaya hoon magar insanon ke muhafiz ke huzoor mein apna shukarguzari ka geet pesh karta hoon kyunke jis tarah kabootari ko kashti se bahar kahin aaram na mila aur woh wapas lout aayi, bilkul issi tarah meri ruh ne bhi aaj yeh seekh liya hai ke dunyawi cheezon mein koi haqiqi itminan nahi aur sirf Khuda hi meri ruh ko haqiqi aaram de sakta hai. Mera karobar, meri jayedad, mera khandan aur meri kamyabiyan apni jagah sab theek hain lekin yeh sab cheezein meri la-fani ruh ki aarzoo-on ko poora nahi kar saktin. Pas ay meri ruh! Apne aaram ki taraf lout, kyunke Khudawand ne tujh par ihsan kiya hai. Yaad kijiye, woh khamoshi ki ghari jab din ke kawaar band ho rahe thay, to kabootari manda paron ke saath apne malik ke paas lout aayi. Ussi tarah ay Khudawand! Mujhe taufiq ata farma ke aaj ki shaam main bhi Yeshu ki taraf lout sakoon. Woh kabootari laq-o-daq veerane ke upar ek raat bhi guzarna bardasht na kar saki aur na hi main apne qalbi sukoon ki jagah aur apni haqiqi aaram gah yani Yeshu ki aaghosh se ek ghari bhi door rehna bardasht kar sakta hoon. Phir, woh aa kar sirf kashti ki chhat par nahi baithi balkay ’’uss ke paas andar aayi‘‘, bilkul issi tarah meri mushtaq ruh Khudawand ke bhedon ko janna, sachayi ki gehrai mein utarna, parde ke andar dakhil hona aur apne mehboob Khudawand ki qurbat tak pahunchna chahti hai. Mujhe palat kar Yeshu hi ke paas aana hai kyunke uss ke saath qareebi aur gehri rafaqat ke baghair meri pyasi ruh ko qarar nahi aa sakta. Ay pyare Yeshu! Mere saath ho, apne aap ko mujh par zahir kar aur poori raat mere saath reh ta ke jab main subh bedar hoon to uss waqt bhi tujhe apne paas hi paoon. Main dekhta hoon ke kabootari apne munh mein zaitoon ki ek patti bhi layi jo guzre hue din ki yaadgar aur mustaqbil ki peshgoi thi, to kya mere paas ghar lane ke liye koi khushgawar yaadgar nahi? Kya aane wali mehherbaniyon ka koi bayana mere paas nahi? Haan mere Khudawand! Main teri unn narm-o-gudaz rahmaton ke liye teri shukarguzari karta hoon jo har subh nayi aur har shaam taza hoti hain, aur ab main tujh se iltija karta hoon ke apna hath barha aur apni iss kabootari ko apni aaghosh mein le le.
Hath barha aur apni iss kabootari ko tham le. Basale mujhe apni aaghosh-e-mohabbat mein, ay mere Khudawand!