Romans 11:26
’’Aur iss surat mein tamam Israel najat paye ga.‘‘
Jab Musa ne Behr-e-Qulzum par geet gaya, to uss ke liye yeh bari khushi ki baat thi ke bil-akhir tamam Israel ko chhutkara naseeb hua. Jab tak Khuda ki qoum Bani Israel ke aakhri shakhs ne salamti ke saath uss samundar ke paar qadam na rakh diya, tab tak paani ki uss istada deewar se paani ka ek bhi qatra neeche na gira. Jab woh paar utar gaye, to furan hi samundar dobara apni jagah par wapas aa gaya, lekin uss se pehle nahi. Iss geet ka ek hissa yeh tha ke, ’’Apni rahmat se Tu ne unn logon ko jin ko Tu ne khulasi bakhshi rahnumayi ki‘‘. Akhair zamana mein, jab barguzida log Khuda ke bande Musa aur Barrah ka geet gayein ge, to yehi baat hamare Khudawand Yeshu Masih ke liye bhi bais-e-sad iftikhaar hogi ke, ’’Jinhein Tu ne mujhe diya, main ne unn mein se kisi ko bhi na khoya‘‘. Aasman par ek bhi takht khali nahi hoga.
Barguzida nasl jo chuni gayi
Takht ke gird woh jama hogi
Kare gi woh fazl ki hamd-o-sana
Jalal uss ka bataye gi sada
Jitno ko Khuda ne chuna hai, jitno ko Masih ne chhuraya hai, jitno ko Ruh-ul-Qudus ne bulaya hai, aur jitne Yeshu par iman laye hain, woh sab uss ameeq-o-baseet samundar ko salamti se paar kar lein ge. Hum sab abhi tak salamti ke kinare par nahi pahuche:
Lashkar ka ek hissa paar ja chuka
Aur ek hissa abhi paar kar raha
Iss lashkar ka harawal dasta pehle hi sahil par pahunch chuka hai. Hum gehraiyon mein se guzar rahe hain. Abhi hum apne rahnuma ke peeche peeche samundar ke ain wast mein poore jazbe ke saath chal rahe hain. Aaiye hausla rakhein kyunke hamara pichhla dasta bhi jald wahan pahunch jaye ga jahan harawal dasta pehle se maujood hai; barguzida logon mein se aakhri shakhs bhi jald hi samundar paar kar jaye ga, aur phir fatah ka shadiyana sunayi de ga jab sab ke sab salamti ki sar-zameen par pahunch jayein ge. Lekin aah! Agar ek bhi kho jata, ya agar uss ke barguzida khandan ka ek bhi fard peeche chhor diya jata, to iss se makhulsi pane walon ke jashn mein bad-mazgi paida ho jati aur Jannat-ul-Firdous ke saazon ke taar goya toot jate, yahan tak ke har taraf saf-e-maatam bichh jati.
Judges 15:18
’’Aur uss ko bari piyas lagi. Tab uss ne Khudawand ko pukara aur kaha Tu ne apne banda ke hath se aisi bari rahai bakhshi. Ab kya main piyas se maroon aur namakhtoonon ke hath mein ja paroon?‘‘
Samson piyasa tha aur piyas ke marey jaan-ba-lab tha. Yeh mushkil iss sorma ke liye unn tamam mushkilat se bilkul mukhtalif thi jin ka uss ne abhi abhi samna kiya tha. Mahaz piyas bujhana is qadar bari baat nahi jitni ek hazar Philistiyon se chhutkara pana! Lekin jab usse piyas lagi, to Samson ko yeh chhoti si darpesh musibat maazi ki uss bari mushkil se kahin zyada bhari mehsoos hui jis se usse khaas tor par rahai mili thi. Khuda ke logon ke liye yeh ek aam baat hai ke jab woh kisi bari rahai ka jashn manate hain, to agli chhoti si musibat unn ko bahut bhari mehsoos hona shuru ho jati hai. Samson ek hazar Philistiyon ko halak kar ke goya kushton ke pushte laga deta hai, magar phir chand boond paani ke liye nidhaal ho jata hai! Yaqub Peniel mein Khuda ke saath kushti larta aur Qadir-e-Mutlaq par ghalib aata hai, aur phir ’’apni raan se langrata hua‘‘ jata hai! Yeh ajeeb baat hai ke jab bhi hum fatah pate hain, to kamzori ka ehsas bhi saath hi aa dhamakta hai. Goya Khudawand humein hamari auqat aur hudood mein rakhne ke liye kamtari aur be-basi ka sabaq sikhata hai. Samson ne bade fakhriya andaaz mein kaha tha ke, ’’Main ne ek hazar aadmiyon ko mara‘‘. Uss ka fakhr bhara halaq jald hi piyas se baith gaya aur usse dua ka sahara lena para. Khuda ke paas apne logon ko khaksar karne ke bahut se tariqe hain. Ay Khuda ke azeez farzand! Agar bari rahmat ke baad aap bahut past ho gaye hain, to aap ka muamla koi anokha nahi hai. Jab Dawood Israel ke takht par baitha, to us ne kaha ke, ’’Agarchay main mamsooh badshah hoon to bhi aaj ke din aajiz hoon‘‘. Aap ko uss waqt kisi bari kamzori ki tawaqqo karni chahiye jab aap apni sab se bari fatah se lutf-andoz ho rahe hon. Agar Khuda ne maazi mein aap ke liye rahai ke bade bade kaam kiye hain, to aap ki maujooda musibat mahaz Samson ki piyas ki manind hai, aur Khudawand aap ko himmat nahi haarne de ga, aur na hi namakhtoonon ko aap par ghalib aane de ga. Dukh ki raah hi aasman ki raah hai, lekin iss poore raste mein tazgi bakhsh paani ke kunwein atraaf mein hamesha maujood rehte hain. Pas, ay aazmaish se dochaar bhai aur behen! Samson ke alfaz se apne dil ko tasalli de, aur yaqeen rakh ke Khuda jald hi tujhe iss se bhi rahai de ga.