Yeh kitni dilchasp baat hai ke Kitab-e-Muqaddas ka aik bara hissa dua ke mauzoo par mushtamil hai aur dua-go imandaron ki qabil-e-taqleed misaalon, mutaliq aqaaid ki tarweej ya wadon ke ilan se muzayyan hai. Bible Muqaddas kholte hi hum parhte hain ke “us waqt se log Yehova ka naam le kar dua karne lage,” aur jis tarah yahan insani tareekh ke aik nihayat aham daur ka ikhtitam aur aglay daur ka aaghaz dua ke khusoosi zikr se hota hai, wese hi humein bhi is naye saal ke ibtidaai dinon mein dua par apni khaas tawajjoh markooz karni chahiye.
Dua ki misaalen bohat zyada hain. Yahan hum Yaqoob ko kushti larte hue, Daniyel ko din mein teen baar dua karte hue, aur Daud ko apne poore dil se Khuda ko pukarte hue dekhte hain. Udhar humein paharon par Eliyah nazar aata hai aur qaid khanay mein Paulus aur Silas. Phir humein hukmon aur wadon ki bhi aik bohat bari tadaad dekhne ko milti hai. In sab baton se hum dua ki fazilat, ahmiyat aur zarurat ke ilawa aur kya seekhte hain?
Aik baat hum poore wasooq ke sath keh sakte hain ke har woh baat jiska Khuda ne apne Kalam mein numayan zikr kiya hai, us ke baray mein us ka irada yahi hai ke hum use apni zindagiyon mein bhi utna hi numayan maqam dein. Agar us ne dua ke baray mein itna kuch kaha hai to isi liye ke woh janta hai ke humein is ki kitni ashadd zarurat hai. Hamari zaruriyat itni ghambheer hain ke jab tak hum aasman par chale nahi jate, tab tak hamari zindagiyon se dua mauqoof nahi honi chahiye.
Kya aap ki koi zarurat nahi? Phir, maaf kijiyega, aap nahi jante ke aap kitne ghareeb hain. Kya aap ko Khuda se koi nemat darkar nahi? Phir, Khudawand ki rehmat hi aap ki muflisi aap par zahir kar sakti hai! Jis zindagi mein dua nahi, us zindagi mein Masih nahi.
Dua aik sheer-khwar ki tatlahat, aik jangjoo imandar ki lalkar, aur Yesu mein qareeb-ul-marg muqaddas ki abadi neend mein utarne ki lori hai. Yeh har Masihi ki saans, takiya-kalam, tasalli, quwwat aur izzat hai. Agar aap Khuda ke haqeeqi farzand hain to apne Baap ke deedaar ke taalib hona aur apni zindagi ko us ki muhabbat mein basar karna aap ka mamool hoga.
Dua kijiye ke is saal aap paak, farotan, bedaar aur sabir banne ke sath sath Masih ki qurbat aur rifaqat mein barhte aur taraqqi karte hue us ki muhabbat bhari ziyafat gaah mein daakhil ho saken. Dua karein ke aap doosron ke samne aik babarkat aur pur-fazal zindagi ka namoona ban kar apni zindagi ko apne Malik ke jalal ke liye guzar saken.
“Dua mein zyada se zyada mashghooliyat” ko is saal ke liye apna nasb-ul-ain bana lijiye.

Sab zameeni cheezen bahal kiye jane ki muhtaj hoti hain. Koi makhlooq az-khud bahal nahi ho sakti. Zaboor nawees kehta hai ke “Tu rawai-e-saal ko naya bana deta hai.” Yahan tak ke ashjaar, jinhein koi aisi fikr lahiq nahi hoti jo unhein manda kare aur na hi unhein koi mashakkat karni parti hai jis se un ki umr kotah ho jaye, phir bhi unhein aasman ki barish se taazgi aur zameen ke posheeda khazanon se rooeidgi hasil karna parti hai. Khuda ke lagaye hue Lubnan ke deodar bhi isi liye shadab rehte hain kyun ke woh bhi roz-ba-roz apne liye zameen se taaza namkiyaat kashid kar ke unhein musalsal apne andar zakhira kiye rakhte hain.
Isi tarah insani hayat bhi Khuda se az-sar-e-nau zor hasil kiye baghair qaim nahi reh sakti. Jaise badan ke muzmahil hisson ko baar baar ghiza khane ke zariye taqweeyat aur marammat baham pohanchai jati hai, wese hi humein bhi Khuda ki Kitab ko nosh karne, ya Kalam ki manadi ko sunne, aur ya phir Paak Meiz ke lawazimat ke zariye apni muzmahil rooh ko ghiza khilani parti hai. Jab hum in zaraaye ko musalsal nazar-andaz karte rehte hain to hamari nematein kaisi manda parne lagti hain!
Un muqaddaseen ki roohen kis qadar faqa-kashi se dochar hongi jo Khuda ke Kalam aur duaiya khalwat ke musta‘id istemal se hatt kar apni zindagi guzar rahe hain! Agar hamari deendari Khuda ke baghair zinda reh sakti hai to yeh ilahi takhleeq ka wasf hargiz nahi, balkeh mehaz aik dhakosla hai, kyun ke aisi soorat mein hamari rooh us ki huzoori ki kabhi yun mushtaq na hoti jaise phool os ke muntazir hote hain.
Musalsal bahali hasil kiye baghair hum kabhi jahannum ke hamlon, ya aasman ki kari museebaton, ya apni baatini chipqalishon ke liye hama-waqt kamar-basta nahi reh sakte. Jab bagola uthega to us paer par afsos kiya jaye ga jis ne bar-waqt zameen se nami jazb na ki, na apni jarron ke zariye mazboot chattan par apni girift mustahkam ki. Jab bhanwar uthte hain to un mallahon par afsos kiya jata hai jinhon ne bar-waqt apne badban mazboot na kiye, na langar dala aur na hi khaari mein panah li.
Agar hum apni kahili ke baais kamzor par jayein to sharir ko mauqa mil jata hai ke woh apni poori taqat majma‘ kar ke hum par aisa haavi ho jaye ke jis ke baad humein aik aziyat-naak tabahi se dochar hona pare, to phir aik nauha-angez ruswai hamara muqaddar ban jati hai. Aaiye, aajizi aur farotni ikhtiyar karte hue us shafqat se bhare hue Khuda ke qadmon mein aayein, jis ne hum se yeh wada kiya hai ke:
“Khudawand ka intezar karne wale az-sar-e-nau zor hasil karein ge.”