Israeel ki a‘saab-shikan aawaaragiyan apne ikhtitaam ko pohanch chuki thin aur mau‘oodah aaraam bhi haasil ho chuka tha. Khaimon ki naql-e-makani, jalaanay walay saanp, tund-mizaaj Amaaliqi aur bayaabaanon ki aah-o-buka sab mauqoof ho gayi kyun ke ab woh us sar-zameen par pohanch chukay thay jahan doodh aur shehad behta tha, aur unhon ne us ki qadeem paidawaar ka pehla maza chakkha.
Azeez Masihi qaari, yahi maamla is saal aap aur meray saath bhi paish aa sakta hai. Yeh manzar kaisa dil-nasheen hai, aur agar imaan poori tarah fa‘aal aur musta‘id ho, to yeh baat hamaray liye bay-inteha shaadmani ka ba‘is ban sakti hai. Abdi aaraam mein Yesu‘ ki rifaqat jo Khuda ke logon ke liye hanooz baqi hai, aik pur-masarrat umeed hai, aur us abdi jalaal ki ‘anqareeb ronumaai ki soorat mein goya hamari aik dogni sa‘aadat hai.
Bay-imaani hanooz us darya-e-Yardan ke kinaaray larzaan hai jo hamaray aur us mubarak sar-zameen ke darmiyan rawaan-dawaan hai, lekin aaiye hum is baat par kaamil yaqeen rakhein ke hum pehle hi maut ki haulnaak tareen museebaton se guzar aaye hain. Ab aaiye har aik khaufnaak khayaal ko apne zehnoon se nikaal kar, bari khushi aur is jalaali umeed ke saath is naye saal mein daakhil hon ke hum “hamesha hamesha ke liye apne Khudawand ke saath rahain ge”.
Is lashkar ka aik hissa is saal bhi Khudawand ki khidmat ke liye zameen par thehra rahe ga. Agar hamara bhi yahi muqaddar thehra, to is soorat mein bhi naye saal ki is aayat ke saadiq na honay ki koi wajah baqi nahi rehti. “Hum jo imaan laaye us aaraam mein daakhil hotay hain.” Rooh-ul-Qudus ki meeraas hamara haqeeqi bakhra hai aur wohi humein “Khuda ke jalaal” ki umeed se hamkinaar karta hai.
Jo imaandaar hum se pehle wahan ja chukay hain woh mehfooz hain, aur isi tarah hum bhi apne Yesu‘ Maseeh mein mehfooz hain. Wahan woh apne dushmanon par fatah ka jashn manaatay hain, yahan hum bhi fatah se barh kar ghalba paatay hain. Aasmani roohain Khudawand ki rifaqat mein shaadmaan hain, aur wohi shaadmaani hamaray paas bhi hai.
Woh us ki muhabbat mein aaraam paatay hain, aur humein bhi usi mein kaamil itminaan haasil hota hai. Woh us ki hamd mein gaatay hain aur yahi istihqaaq humein bhi ba-qadr haasil hai. Is saal hum zameen par rehtay hue aasmani paidawaar khaayen ge jahan imaan aur umeed ne hamaray bayaabaan ko Baagh-e-Adan mein badal diya hai. Qadeem zamanon mein aadmiyon ne farishton ki ghiza khaai thi, to aaj kyun nahi?
Yesu‘ ka fazl aur us ka kalaam is saal hamaray liye Mulk-e-Kan‘aan ki paidawaar jaisa hai.
Aaiye isay nosh karein!

Hum apne Khudawand mein shaadmaan aur masroor hon ge. Hum apne naye saal ka darwaaza al-ghozay ki ghamgeen dhunon ke saath nahi balkay khushi ke barbat ki madhur taanon aur masarrat ki buland awaaz jhanjh ki jhankaar ke saath kholain ge. “Aao hum Khudawand ke huzoor naghma-saraai karein! Apni nijaat ki chattan ke saamne khushi se lalkarein.”
Hum jo Khuda ke bulaaye hue, wafadaar aur barguzeedah log hain, apne har tarah ke ghamon ko door kar ke apne Khuda par imaan ka jhanda khoob lehrain ge. Duniya apni museebaton par maatam karti hai to karti rahe, magar hum jo Maarah ke karway paani ko meetha bana dene wali saleeb ke maan’ne walay hain, apne Khudawand mein khushi manaatay hue us ke naam ko ooncha karein ge.
Us abdi Rooh ke waseelay se, jo hamara sacha madadgaar aur hamaray badanon ke muqaddas mein sakoonat karne wala hai, hum Yesu‘ ke naam ki hamd karne aur usay mubarak kehne se kabhi baaz na aayen ge. Hum yeh azm kar chukay hain, aur is par qaayam bhi hain, ke hum apni dili masarrat ka taaj Yesu‘ ke sar par sajaayen ge aur apne dulha ki huzoori mein maatam-kunaan ho kar us ki hargiz hargiz tahqeer nahi karein ge.
Humein aasmaanon ke Khuda ki tamjeed ke liye muqarrar kiya gaya hai, to aao hum naye Yaroshalem ke darbaanon mein pohanch kar apna geet gaane se pehle yahan pooray tamtaaraq ke saath us ka i‘aada karein. Hum shaadmaan aur masroor hon ge — ghour kijiye ke yeh dono alfaaz aik hi ma‘ni rakhte hain, ya‘ni dogni khushi, barkat par barkat.
Kya ab apne Khudawand mein shaadmaan aur masroor honay par koi qadghan lagana zaroori hai? Kya fazl ke farzandon ke liye aaj bhi apne Khudawand ki shaadmaani mein shareek hona khushboo-daar tareen bakhoor se barh kar nahi? To zara sochiye ke aasmaan par is ki mehkaar aur kitni zyada dil-nasheen ho gi.
“Hum tujh mein shaadmaan aur masroor hon ge” — yahan musta‘mal tarkeeb “tujh mein” is roohani ghiza ka haqeeqi maraghan, meway ka asal maghz aur aayat ki asal rooh-e-rawaan hai. Yesu‘ mein saaray aasmaanon ki barkaat ka khazaana posheedah hai! Woh barkaton ke la-mutanaahi darya ka manba‘ aur us ke har aik qatray mein shaadmaani ko bharne wala sarchashma hai!
Ai pyaaray Yesu‘, tu jo apne logon ka haqeeqi bakhra hai, hamaray is naye saal ko apni qudrat se aisa maal-a-maal kar de ke is ke pehle din se aakhri din tak hum tujh mein shaadmaan aur masroor rahein. Kaash ke is January ka aaghaz Khudawand mein shaadmaan honay se aur December ka ikhtitaam Yesu‘ mein masroor honay par ho.