سوتی آنکھیں جاگتی آنکھیں
دیکھتی ہیں سب سپنے ۔۔۔
میں نے دیکھا ۔۔۔ میں تھا اک آزاد فضا میں ۔۔۔
اوپر نیچے، دائیں بائیں ۔۔۔
سرحدوں کے پار گیا میں ۔۔۔
روک نہیں تھی، ٹوک نہیں تھی ۔۔۔
ٹھنڈی مسرور فضا تھی ۔۔۔
اور میں اڑتا جاتا تھا ۔۔۔
کچھ ہی دیر میں ۔۔۔
چمکیلے براق پرندے
اپنی چھبیلی ڈاروں میں ۔۔۔
دائیں، بائیں ۔۔۔
اپنی اڑان میں
مجھ تک پہنچے ۔۔۔
پر پھیلائے گردن موڑے
بھولی بھالی آنکھوں میں مسکان سجائے
میری جانب تکتے جائیں ۔۔۔ جیسے
استقبال کو میرے ۔۔۔
دستہ پروٹوکول کا ہو!
مجھ کو لگا آزاد فضا کا ۔۔۔
میں جیسے شہزادہ ہوں ۔۔۔
میں نے سر شاری میں اپنی ۔۔۔
بانہیں کھول کے پھیلا دیں ۔۔۔
اُن کے ہمراہ ۔۔۔
محوِ پرواز ہوا
ان کے پروں کے مدہم مدہم ۔۔۔
جھلکوروں میں ۔۔۔
ہم آواز کلیل سروں میں ۔۔۔
کھو سا گیا
پھر بارودی ایک دھماکے کی آواز نے
آنکھیں کھول دیں ۔۔۔
منظر سارا بکھر گیا
میری زمیں تھی ۔۔۔
چیخیں، دھول اور
آہیں اور کراہیں ۔۔۔
میرا مکان تھا۔
ریزہ ریزہ خاک پڑا تھا ۔۔۔
اور میرا کچھ بھی نہ تھا ۔۔۔
اور بس
میں اور میرا ٹوٹا سپنا!
