روؤں جگر کو پیٹوں دریائے خوں رواں ہیں
دہشت اُٹھی! بتا دے لال و گہر کہاں ہیں
۔۔۔
کیا ظلم، کیا ستم ہے دل سوختۂ غم ہے
دیتا نہیں دکھائی آنکھیں دھواں دھواں ہیں
۔۔۔
اے بہرے حکمرانو! نابینا مہربانو!
حرمت کے پاسبانو! یاں لٹ گئے جہاں ہیں
۔۔۔
ہائے کراچی تیرے، دامن میں کیا ہوا یہ
تیرے ہی اپنے شہری برباد خانماں ہیں
۔۔۔
لے آ چھڑا کے یا رب، سب بے گناہ بچے
معصوم لاپتہ ہیں جانے تُو ہی کہاں ہے
۔۔۔
لب پہ دعا مسلسل دل میں پڑی ہے ہلچل
ہر چشم اشکِ نم ہے، آنسو رواں دواں ہیں
۔۔۔
ماں باپ، بیوی بچے، دن رات بے کلی میں
بے کل ہیں پہلو پہلو ہونٹوں پہ سسکیاں ہیں
۔۔۔
کالج، سکول دفتر خاموش ہو گئے ہیں
حیرت، فسردگی کے عنوان بے بیاں ہیں
۔۔۔
پولیس ریڈ کرنے ہر گھر میں پھاند آئی
کیا شہر کے محافظ وحشت کا کارواں ہیں
۔۔۔
جانے یہ کس شبہ میں مرد و جواں گھسیٹے
اندھی پولیس گردی، شب خون کے سماں ہیں
۔۔۔
چادر کی کیسی حرمت، گھر کا کہاں تقدس
قانون لٹ گیا ہے قانون داں کہاں ہیں
