اب غم سے گھٹ رہی ہے فضا، پاسباں بچا
گریفن جونز شرر
غزلیات
مطالعات: 119
پسند: 0
اب غم سے گھٹ رہی ہے فضا، پاسباں بچا
دامن نفس کا چاک ہوا، پاسباں بچا
۔۔۔
میں نے جہادِ زندگی میں کھائی ہے شکست
میں اپنے حال سے ہوں خفا، پاسباں بچا
۔۔۔
کھوئے ہوئے سبھی ہیں سیاست میں ذات کی
ملتا نہیں خودی کا پتہ ، پاسباں بچا
۔۔۔
غیرت بھی ہمنواؤں کی نیلام ہو گئی
پھرتی ہے ماری ماری حیا، پاسباں بچا
۔۔۔
راہوں میں دفن ہو گئے سب رہبرانِ قوم
ہیکل سے آ رہی ہے صدا، پاسباں بچا
۔۔۔
ہم اپنا اپنا جامِ خودی پی کے کھو گئے
زوروں پہ ہے خمارِ انا ، پاسباں بچا
۔۔۔
کہتی ہے اب صلیب شرر غم کے سائے میں
مانگو لرزتے دل سے دعا ، پاسباں بچا
واپس جائیں
