سر خونچکاں تھا جسم و رگِ جاں لہو لہو
چھلنی تھے ہاتھ پاؤں گریباں لہو لہو
۔۔۔
روتے تھے لوگ آ کے سرِ کوہِ کلوری
دیکھا گیا تھا دار پہ یزداں لہو لہو
۔۔۔
آنسو بہائے خون کے مریم نے اس قدر
پلکیں تھیں زخم زخم تو مژگاں لہو لہو
۔۔۔
کھینچا تھا جب صلیب پر اک بے گناہ کو
صیحون خون خون تھا، کنعاں لہو لہو
۔۔۔
سورج شفق میں قتل سرِ شام ہو گیا
آندھی تھی سُرخ اور مہِ تاباں لہو لہو
۔۔۔
نیزے کی تیز نوک تھی پسلی کے آر پار
سینہ فگار تھا، تینِ عریاں لہو لہو
۔۔۔
کشکولِ خون، موت نے پھینکا صلیب پر
ایمان خون خون تھا، ایقاں لہو لہو
۔۔۔
ہر اک زباں پہ قتلِ مسیحا کا ذکر تھا
صحرا لہو لہو تھا بیاباں لہو لہو
۔۔۔
مر کر پلایا تشنہ چراغوں کو خونِ دل
جی کر کیا غرورِ فقیہاں لہو لہو
۔۔۔
دل خون، خامہ خون، شرر کی زباں ہے خوں
مضمون ہے خون خون تو عنواں لہو لہو
