Norman Vincent Peale ek kahani bayan karte hain jis mein is maamle ki ek umda misal pesh ki gayi hai. Bachpan ki khulandri umar mein Peale ko kahin se ek cigar haath lag gaya. Unhon ne idhar udhar dekha aur ek kone mein ja kar is cigar ko jalanay ki koshish ki. Doctor Peale batate hain ke shuru shuru mein is ka zaiqa bohat karwa aur ajeeb sa tha lekin jaise jaise woh is ke kash lagate gaye is ka zaiqa mazedar hota chala gaya aur saath hi saath woh apne aap ko ek jawan aadmi tasawwur karne lagay. Abhi woh isi tasawwur mein khoye huay thay ke unhein door se apne walid aate huay dikhayi diye. Unhon ne jaldi se is cigar ko bujhane ki koshish ki magar tab tak un ke walid sar par pohanch chuke thay isliye unhon ne jaldi se haath apni kamar par le ja kar cigar apne peeche chupa liya. Unhon ne baap ke samne normal rehne ki poori koshish ki. Apne baap ki tawajjo hatane ke liye unhon ne sarak ke kinare ek bare se board ki taraf isharah kiya jis par shehar mein lagne wali circus ka ishtihar aavezan tha aur kehne lagay: "Dad, kya main wahan ja sakta hoon? Mujhe bhi circus dekhne jana hai. Please mujhe bhi circus mein le kar jayein na! Please Dad!" Un ke walid ke jawab mein jo sabaq pinhan hai woh tamam duaiya jangju imandaron ke liye nihayat ahmiyat rakhta hai. "Beta tumhein zindagi ke baare mein sab se pehla sabaq yeh seekhne ki zaroorat hai ke kabhi apne peeche koi dhuan chorti hui nafarmani chupate huay baap se koi aur cheez mangne ki koshish nahin karni chahiye".