Murdon mein se jee uthne ke baad Masih jab aasman par uthaya gaya to is hawale se jadeed tanazur mein ek tamsil bayan ki jati hai. Aasman par ek bara jashan munaqid kiya gaya aur sab farishte jama ho gaye. Jashan ki khushiyan manane ke dauran farishton ne Khuda ke bete Yeshu ke gird jama ho kar us se poocha ke bata zameen par jaane ka tajurba kaisa raha aur kaise kaise waqiyat ronuma huay. Masih ne farishton ko sab bataya ke kaise us ne bimaron ko changa kiya, murdon ko zinda kiya aur hazaron logon ke liye moajizat kiye. Phir woh unhein apni masloobiyat ki kahani sunata hai ke kis tarah main ne insaan ke liye saleeb par jaan di takay insaan gunah ki ghulami se azad ho jaye. Woh unhein yeh bhi batata hai ke kis tarah woh teesre din murdon mein se jee utha. Jab Yeshu ki baat khatam hui to poore aasman par goya sannata chaya hua tha. Achanak ek farishte ne kaha "Khudawand! Ab hamari bari hai. Hum bhi tere kaam mein shareek hona chahte hain. Hum zameen par jayenge aur sari duniya ko batayenge ke tu ne un ke liye kya kuch kiya hai". Khudawand ne khamoshi se apna sar hilaya aur kaha "Nahin! Aisa mumkin nahin." Sare farishte hairan ho gaye. Ek aur farishte ne poocha "To phir tu apne is kaffaray ka paigham sari duniya tak kaise phailaye ga?" Malik ne bare pur-etmad lehje mein jawab diya "Main ne yeh zimmedari gyarah mahi-geeron (fishermen) ke supard kar di hai." Farishton ke chehron par sawaliya nishan ban gaye magar ek farishte ne pooch hi liya "Lekin ae Khudawand! Agar insaan phir nakam ho gaya to?" Yeshu ne jawab mein kaha "Mere paas is ke siwa aur koi mansooba nahin hai!"