Dua mein daleri ke hawale se Martin Luther ki ek misal kuch is tarah pesh ki ja sakti hai. 1540 mein Luther ka ek qareebi dost Friedrich Myconius shadeed bimar para. Myconius ko bimari ki shiddat ke sabab se apni maut saaf dikhayi dene lagi aur us ne Luther ko ek al-wadai khat likh diya. Is azeem musleh Martin Luther ne bara dilchasp jawab diya. Us ne jawab mein yeh zor-dar baat likhi: "Main tujhe Khuda ke naam se hukam deta hoon ke tu jeeta reh kyunke kaleesiya ki islah ke kaam mein mujhe abhi teri bohat zaroorat hai... Khudawand mujhe tab tak woh din nahin dikhaye ga jab main teri maut ki khabar sunu ga balkay tu mujhe zinda rehne ka hausla de ga. Yeh meri dua hai, yahi main chahta hoon aur aisa hi hoga kyunke main Khuda ke naam ko jalal dene ke liye yeh sab kuch keh raha hoon." Tareekh batati hai ke jab Luther ne yeh khat likha tha to us ke dost ki halat nihayat bigar chuki thi aur afaqay ki koi surat baqi nahin thi. Us ka dost quwat-e-goyayi kho chuka tha. Maut sar par mandla rahi thi. Magar ek moajiza ho gaya. Dheere dheere zindagi Luther ke dost ke murda hote huay badan mein utarne lagi aur jald hi woh mukammal shifa-yab ho gaya. Aur hairani ki sab se bari baat yeh hai ke Myconius, Martin Luther ke marne ke baad bhi mazeed do mahine jeeta raha aur yun us ne khud Luther se zyada lambi umar payi. Hum keh sakte hain ke Luther ki dua dost ki bimari par ghalib aayi! Yaqeenan aisi dua ke zariya se duniya mein bari tabdeeli layi ja sakti hai!