ساحل ہے خوفِ مرگ کُھلے پانیوں میں آ
نذیر قیصر
غزلیات
مطالعات: 114
پسند: 0
ساحل ہے خوفِ مرگ کُھلے پانیوں میں آ
جینے کی آرزُو ہے تو ہم فانیوں میں آ
۔۔۔
لمحوں کی ٹہنیوں سے گِرا برگِ ماہ و سال
اے موجِ روز و شب کبھی طغیانیوں میں آ
۔۔۔
اے آسمان ہاتھ کی محراب پر اُتر
اے حرفِ خواب جاگتی پیشانیوں میں آ
۔۔۔
اے شعلۂ وجود کبھی آئینوں میں جل
اے شکلِ کم نما کبھی حیرانیوں میں آ
۔۔۔
اے شبنمِ وصال کبھی شاخ پر ٹھہر
اے حدِ شوق بہتے ہوئے پانیوں میں آ
۔۔۔
اے شہپر ثبات کبھی ٹوٹ کر بکھر
اے گرہِ نقش و رنگ پریشانیوں میں آ
واپس جائیں
