Amriki khana-jangi ke zamane mein riyasat Ohio mein ek baap aur maan rehte thay jin ka ek hi iklota beta tha jis par jaan chirakte thay. Jang ka zamana tha aur un ke jawan bete ka naam bhi fauj mein shamil kar ke use na sirf bula liya gaya balkay use ghumsaan ki jang ke aglay mahazon par bhej diya gaya. Woh din aa gaya jab jawan-saal beta apne walidain ko nam aankhon ke saath chor kar fauji beray ke humrah chala gaya kyunke us ke boorhay walidain bhi nihayat muhib-e-vatan thay aur mulk ko darpesh mushkilat se bakhobi agah thay. Torrey sahib batate hain ke jangi morchon se bhi woh jawan beta ba-qaidgi ke saath apne walidain ko khat likha karta tha aur apni khairiyat se unhein ba-khabar rakhta tha aur saath hi saath chand khaas waqiyat ke baray mein bhi batata rehta tha. Us ke khutoot hamesha khushi aur josh se bhare hote thay. Ek din us ke khat aane band ho gaye. Kai din beet gaye magar koi khat na aaya. Hafte guzar gaye aur walidain intezar mein be-chain rehne lagay aur un ke chehron par khauf ke saye mandlane lagay. Aakhir-kar ek din ek khat aan pohancha jo ke Riyasat-haye-Muttahida America ki fauj ki taraf se tha. Is khat mein in boorhay walidain ko yeh itla di gayi ke is bari larayi mein bohat se sipahiyon ne jaam-e-shahadat nosh kiya. Un ka beta bhi unhi shaheedon mein shamil ho chuka tha. Woh walidain kai dinon aur hafton tak is baat ka matam karte rahe. Saal guzarte gaye. Jang khatam ho gayi. Ab sirf jang ki yaadein baqi reh gayi thien. Phir ek ajeeb baat hui. Ek subah jab woh dono miyan-biwi khane ki meiz par baithe nashta karne mein masroof thay ke un ki naukrani ne aa kar unhein bataya ke bahar darwaze par ek nihayat ghareeb aur maflook-ul-haal shakhs khara hai aur ghar ke malik se milna chahta hai. Naukrani ne use bhagane aur chale jane ko kaha tha magar us ne ek khat naukrani ko de kar andar bheja aur is khat ke bahar un ke bete ki likhayi mein apna naam likha tha. Jab baap ne woh khat khola to is par likha tha: "Pyare Abbu jaan aur Ammi jaan! Mujhe goli lag gayi hai aur mere paas jeene ke liye bohat kam waqt bacha hai aur main is kaghaz par apne al-wadai alfaz likh raha hoon. Jab main yeh sab alfaz likh raha hoon to mere paas hi mera yeh dost ghutno ke bal baitha hai aur yeh fauj mein mera behtareen dost hai. Jab jang khatam ho jaye gi to yeh dost mera yeh khat aap tak poancha de ga aur jab woh aap ke paas aaye to woh mera naam le ga to mere naam ki khatir is se meherbani, shafqat aur mohabbat se pesh aana. Aap ka pyara beta, Charles!" Mubashir Torrey ne is waqiye ke aakhir par kaha: "Is ghar mein is ghareeb aadmi ki un ke bete Charles ke naam se bari izzat-afzai ki gayi... Aasman aur zameen mein Yeshu ka naam lene se meri aur aap ki bari izzat-afzai hoti hai, khaas taur par aasman par to bohat zyada!"