Dua ka jawab milne se pehle hi qadam uthane ke liye iman ki zaroorat hoti hai. Is ki misal dete huay John Bisagno ek umda kahani pesh karte hain. Un ki paanch-saala beti ek din un ke paas aayi aur guriya ke ghar ki khwahish karne lagi. Pastor Bisagno kehte hain ke "Main ne us se waada kiya ke main jald hi tumhein ghar bana doon ga aur is ke baad furan wapas aa kar ek moti aur zagheem kitab parhne mein magan ho gaya. Thori der baad main ne apne kamray ki khirki se bahar nazar dorayi to kya dekhta hoon ke meri beti apne hathon aur bazoon mein apne bartan, khilone, guriyan aur doosri cheezein laati jati hai aur sehan ke ek kone mein unhein ikatthi karti jati hai. Main ne apni biwi ko awaz di aur us se poocha ke woh apne sare khilonon ka wahan dher kyun laga rahi hai. Meri biwi ne jawab mein kaha aap ne khud hi to us se waada kiya hai ke main tumhein abhi ghar bana kar deta hoon aur chunke woh aap ki baat par yaqeen rakhti hai isliye woh tayyari karne lag gayi hai. Aap andaza nahin laga sakte ke is baat ne baap ke dil par kya asar kiya aur us ne guriyaghar banane mein kitni jaldi ki. Musannif likhte hain ke main ne furan yeh baat sun kar us kitab ko ek taraf phenka aur sehan ki taraf bhaga aur beti ko ghar bana kar diya".