Mujhe ek kahani yaad aati hai ke bahri jahazon ki ek company ko telegraph operator ki zaroorat thi. Dilchaspi rakhne walay darkhwast-kunandagan ko muttala kiya gaya ke woh falan din aa kar mulazmat ke liye interview dein. Bohat se log muqarrara waqt par pohanch gaye aur jald hi intezar-gah ki khamoshi baat-cheet ki awazon se goonjne lagi. Tamam umeed-varan bulaye jane ke intezar mein baat-cheet mein masroof thay magar un mein se sirf ek shakhs ne kone mein latakne walay ek loudspeaker par nuqton aur lakeeron ke likhe jane ki awaz suni. Woh furan chalaang laga kar apni jagah se utha aur samne hi maujood daftar ke andar ghus gaya. Thori der jab woh wahan se bahar nikla to us ke chehre par ek kamyab muskurahat thi. Use naukri mil gayi thi! Baqi umeed-varan yeh sara manzar dekh kar hairan ho gaye aur kuch to shikwa karne lagay ke humein to bataya aur bulaya hi nahin gaya halankay hum to ain muqarrara waqt par yahan pohanch gaye thay. Jald interview lene wala officer wahan aa pohancha aur us ne unhein وضاحت (wazahat) karte huay bataya ke jab aap sab log aapas mein baat-cheet karne mein masroof thay to ain isi dauran daftar ke darwaze ki ek taraf kone mein lage huay loudspeaker se Morse Code mein andar aa jane ka paigham bheja gaya tha jis mein kaha gaya tha ke jo pehla shakhs is paigham ko sun kar daftar mein aaye ga us ki naukri pakki! Aur sirf isi shakhs ne dhyan se is halke aur dheeme paigham ko suna aur sab se pehle daftar ke andar dakhil ho gaya tha is liye use naukri par rakh liya gaya hai. Dua mein shunwa hone walay log bil-aakhir Khuda ki qudrat ke bhedon ko samajhne lagte hain. Hum sirf tab seekhte hain jab hum sunte hain. J.R. Miller bayan karte hain ke "Kisi shakhs mein khamosh rehne ki qabiliyat us ki taqat hoti hai. Shor karna fasahat nahin. Buland awaz se bolte jana hamari qabiliyat ko zahir nahin karta. Zindagi ke tamam hisson mein khamosh rehne wali quwatein zyada muassar aur zor-awar hoti hain. Is liye agar hum bhi zor-awar banna chahte hain to humein bhi khamosh rehne ka fun seekhna hoga. Khamosh rehne wale shakhs ki zindagi mein bhi har taraf khamoshi aur sukoon rehta hai."