Aaiye ek aisi maanoos misaal lete hain jo kisi bhi aise ghar mein aam paayi jaati hai jahan do ya do se zyada bachche maujood hon. Bachche khel rahe hain aur kisi makhsoos khilone par un ke darmiyan ek jhagra ho jata hai. Walidain ka riwayati rad-e-amal hamesha yahi hota hai ke, "Yeh khilona pehle kis ke paas tha?" Yeh rad-e-amal dil ki asal haalat gawa deta hai. "Yeh khilona pehle kis ke paas tha?" mahaz ek insani insaaf ka muamla hai. Yeh insani insaaf sirf usi bachche ke haq mein kaam karta hai jis ne intehai chusti dikhakar khilone par pehle haath maara tha. Agar hum is poori surat-e-haal ko dil ke zawiye se dekhein, to yeh masla yaksar badal jata hai. Ab is surat-e-haal mein aap ke saamne do khatakaar maujood hain. Dono hi bachche ek doosre ke hawale se apne dil ki sakhti ka muzahira kar rahe hain. Dono hi intehai khud gharzi barat rahe hain. Dono bachche amali tor par yahi keh rahe hain ke: "Mujhe tumhari ya tumhari khushi ki koi parwah nahin hai. Mujhe to sirf apni zaat se gharz hai. Mujhe yeh khilona chahiye. Meri khushi is khilone ko hasil karne par atak gayi hai. Main ise le kar hi khush rahunga, khwah is se tumhein kitni hi takleef kyun na pahunche." Agar dil ke zawiye se parkha jaye, to is waqt aap ke saamne do gunahgaar bachche maujood hain. Do bachche ek doosre par apni zaat ko tarjeeh de rahe hain. Do bachche Khuda ki shariat ko tor rahe hain. Yeh sach hai ke dono ke zahiri halaat mukhtalif hain. Ek bacha woh khilona chheen raha hai jo doosre ke paas hai. Doosra bacha apne pehle ikhtiyar ka faida utha kar use apne hi paas rakhna chahta hai. Zahiri halaat yaqeenan mukhtalif hain, lekin dil ka asal masla dono ka ek hi hai, yani: "Mujhe apni khushi chahiye, khwah is ke liye mujhe tumhara hi nuqsan kyun na karna pare."