Virginia Whitman ek khoobsurat kahani pesh karti hain jo is pehle usool ki umda misal pesh karti hai. Spain ke ek chhote se gaon La Mancha se talluq rakhne wali ek khatoon apne ek mazoori bhai se milne gayi jo Madrid mein rehta tha. Wahan apne qayam ke dauran us ne kisi Evangelical kaleesiya ko talash karna shuru kiya takay jitne din wahan rahe us ki rafaqat aise logon ke saath ho jo us ke Masihi tajurba mein taraqqi ka bais banein. Use wahan aisi koi kaleesiya na mili ya koi aisa shakhs na mila jo us ki rahnumai kar sakta isliye us ne Khuda se rahnumai mangi. Dua ke dauran uske zehen mein ek khayal ubhra ke woh bus par baith kar shehar ke markazi ilaqe mein jaye aur wahan Khuda ki mazeed rahnumai ka intezar kare. Is ke bhai ka khayal tha ke us ki behen zaroor pagal hai jo itne bare shehar mein ek makhsoos kaleesiya ko dhoondne chali hai aur phir upar se yeh zyada bara pagal-pan isliye bhi tha ke woh nabina thi. Is ki raah mein nabina-pan ki itni bari rukawat ka hayal hona bhi is khatoon ke iman ko kamzor na kar paya. Bari umeed ke saath woh bus par sawar hui aur Khuda par iman rakha ke woh har qadam par us ki rahnumai karega. Jald hi bus mein ek aur aurat sawar hui aur us ke saath wali nishast par aa kar baith gayi. Joonhi is khatoon ko mehsoos hua ke koi shakhs us ke paas aa kar baitha hai us ne apne purse mein haath dala aur Injeel ke paigham par mabni kitabcha nikaal liya. Yeshu ki gawahi dene ki gharz se is nabina aurat ne woh kitabcha apne saath baithi aurat ke haath mein thama diya. Is ke baad un ki aapas mein baat-cheet shuru ho gayi aur jald hi pata chal gaya ke woh aurat Madrid ke ilaqe se talluq rakhti thi aur ibadat ke liye church ja rahi thi. Nabina khatoon ne furan us se poocha "Kya aap mujhe bata sakti hain ke First Baptist Church kahan waqia hai?" Is aurat ka jawab sun kar nabina khatoon nihayat hairan reh gayi jab us ne kaha "Kya aap ko wahan jana hai? Main bhi to wahin ja rahi hoon. Aap mere saath aa sakti hain."