Main haal hi mein apne daftar mein ek aise baap ke saath baitha tha jo apne bete par is qadar ghusse mein tha ke us ke liye tehzeeb ke daire mein rehna bhi bohat dushwar tha. Woh apne bete ke andar maujood un zabardast roohani zarooraton ko dekhne se qasir tha jinhein poora karne ke liye Khuda ne munfarid taur par use is mansab par khara kiya tha. Un ke taalluqaat mein koi narmi nahin thi, yahan tak ke koi muhabbat o shafqat ka shaibah tak nahin tha. Balkeh wahan ek tanao, doori aur faasla tha. Ek mauqe par woh baap apne bete se us ke result card ke baare mein baat karne ke liye utha. Woh apne bete ki kursi ke paas gaya aur woh fail hone wala result card us ke chehray ke samne lehra kar bola, "Tumhari yeh jurat ke mere saath yeh karo, bawajood is ke ke main ne tumhare liye kya kya kuch nahin kiya!" Us ke nazdeek, woh buray grades us ki zaati tauheen thay. Us ki nazar mein is nizam ko yun nahin chalna chahiye tha. Us ne apna kaam kar diya tha, ab bete ko apna kaam karna tha. Albatta ek baat zaroor thi ke woh apne bete se nalaan to tha, magar Khuda ke khilaf us ke gunah ki wajah se nahin. Woh is liye ghusse mein tha kyun ke us ke bete ne ek baap ke taur par us se woh cheezein cheen li thin jinhein woh bohat azeez rakhta tha, yani ek kamyab Masihi baap ke taur par us ki shohrat, woh izzat jis ka woh khud ko haqdar samajhta tha, aur woh sukoon o rahat jo us ke khayal mein jawani ki umr ko pahunchne wale bachon ke saath bil-aakhir use hasil ho jani chahiye thi.