📖 گوشۂ ادب
گزر گئیں کئی صدیاں پلک جھپکنے سے
گزر گئیں کئی صدیاں پلک جھپکنے سے
زمیں پہ گر پڑے تارے ہوا کے جھونکے سے
۔۔۔
عجب نہیں جو کوئی مجھ کو ڈھونڈنے نکلے
میں اِک ندا ہوں کِسی اَن لکھے صحیفے سے
۔۔۔
زمین ماں ہے مِری، آسمان باپ مِرا
چھڑا رہا ہوں میں ہاتھ اِس قدیم رشتے سے
۔۔۔
میں اُس گلی سے جو گزرا تو بے طلب مُجھ پر
سفید پُھول گرے اَدھ کِھلے دریچے سے
۔۔۔
بہت اُداس تھا منظر چراغ بجھنے کا
لپٹ کے رو دیا میں بھی ہوا کے جھونکے سے
۔۔۔
میں کھو گیا کئی رنگوں کئی صداؤں میں
گرے وہ برگِ زماں شاخِ خواب ہلنے سے
۔۔۔
فلک سے لڑتا رہا خاک پر بکھرتا رہا
بہت خراب ہوا، میں خدا کے ہونے سے