ہیلو۔۔۔! خُدا آپ سب کو برکت دے کہ آپ سب میرے چارلیؔ کی تعظیم میں اور اُن کی یادگار کا جشن منانے کے لئے پوری دُنیا سے یہاں تشریف لائے۔

دو سال پہلے، یہاں سے چند میل کے فاصلے پر چارلیؔ نے اپنے ادارے TPUSA کے تحت faith event کے نام سے منعقد ہونے والی ایک تقریب America Fest 2023 کے دوران اسٹیج پر کھڑے ہو کر ایک تقریر کی تھی۔ چارلیؔ کو فی البدیہہ بات کرنا بہت اچھا لگتا تھا۔ اور وہ بغیر اسکرپٹ کے بہت اچھا بولتے تھے، اِس لئے مجھے ذاتی طور پر کوئی اندازہ نہیں تھا کہ وہ کیا کہنے جا رہے ہیں۔ اور، اُس روز اُنہوں نے جو کچھ کہا وہ خُدا کی مرضی کے سامنے سرِ تسلیم خم کرنے کے حوالے سے تھا۔

تقریر ختم ہونے کے بعد، مَیں بیک اسٹیج جاکر چارلیؔ سے ملی، اور مَیں یہ بات کبھی نہیں بھول سکتی، جو مَیں نے اُن سے کہی تھی، ''چارلیؔ بے بی، پلیز اگلی بار یہ بیان دینے سے پہلے مجھ سے ایک بار ضرور بات کر لینا۔'' کیونکہ آپ جب بھی یہ آیت بولتے ہو، تو مجھے لگتا ہے کہ اِس آیت میں کوئی بڑی قدرت پائی جاتی ہے۔ جب آپ یہ کہتے ہو، ''خداوند، مَیں حاضر ہوں۔ مجھے استعمال کر۔'' تو خُدا آپ کی گذارش کو گویا اُسی وقت قبول کر لیتا ہے۔ اور چارلیؔ کے ساتھ بھی اُس نے ایسا ہی کیا۔

گیارہ روز قبل، خُدا نے میرے شوہر کی اُس مکمل سپردگی کو اپنے حضور قبول کیا اور اُنہیں اپنے پہلو میں بُلا لیا۔ ہر معاملے میں چارلیؔ، اپنی مرضی سے بڑھ کر، خُدا کی مرضی کو اہمیت دیا کرتے تھے۔ اور پچھلے اِن گیارہ دِنوں میں، مَیں جس کرب سے گزری ہوں، اُس دوران مجھے خداوند کے اِس کلام سے جو تسلی ملی ہے اِس کا مجھے پہلے کوئی اندازہ نہیں تھا کہ ۔۔۔ ''تیری مرضی پوری ہو''۔ جس روز میرے شوہر کو قتل کیا گیا، اُس روز خُدا کی محبت کا یہ عُقدہ مُجھ پر کھلا۔

10 ستمبر کی سہ پہر، جب مَیں یوٹاہ (Utah) اسپتال پہنچی — مَیں نے اپنے شوہر کی خُون میں لت پت لاش دیکھی۔ مَیں نے وہ گھاؤ دیکھا جو اُن کے لئے جان لیوا ثابت ہوا تھا۔ وہ نظارہ دیکھتے ہی صدمے، خوف اور دِل چیر دینے والی اذیت کے ملے جُلے احساسات نے میرا وہ حال کر دیا جس کا پہلے مجھے کوئی اندازہ نہیں تھا۔

لیکن پھر کچھ اَور بھی ہوا۔ مُردہ جسم کے اندر بھی، مجھے وہ آدمی صاف دکھائی دے رہا تھا جس سے مَیں بے حد پیار کرتی تھی۔ مَیں نے اُن کے سر پر ایک سفید بال دیکھ رکھا تھا مگر اُس کے بارے میں اُنہیں کبھی نہ بتایا۔ اب تو اُنہیں معلوم ہی ہو گا۔ سوری، بے بی۔ مَیں نے اُن کے لبوں پر ایک ہلکی ترین مسکراہٹ بھی دیکھی، جسے دیکھ کر اِس بڑے سانحے کے اندر بھی مجھے خُدا کی بڑی رحمت کا گہرا احساس مِلا۔

چارلیؔ کو تکلیف نہیں سہنا پڑی۔ یہاں تک کہ ڈاکٹر نے بھی اِس بات کی تصدیق کی کہ اُن کی موت یکلخت واقع ہوئی، یعنی ایک لمحے میں، جب کوئی کچھ نہیں کر سکتا تھا۔ کوئی اذیت نہیں تھی، کوئی خوف نہیں تھا اور نہ ہی کوئی رنج تھا۔ ایک لمحہ پہلے، چارلیؔ عین وہی کام کر رہے تھے جو اُنہیں بے حد پسند تھا یعنی کالجوں اور یونیورسٹیوں میں جا کر ایک بڑے مجمع کے سامنے انجیل اور سچائی کے مقدمہ پر مباحثے اور مناظرے کرنا۔ پھر اُنہوں نے پلک جھپکی، اور اگلے ہی لمحے جنت الفردوس میں پہنچ کر اپنے نجات دہندہ کو اپنے روبرو دیکھا۔

اگلے دِن، ہوائی جہاز ائیر فورس ٹو کے اندر، میری ملاقات ایک بہت ہی پیاری خاتون محترمہ اُشا وینسؔ صاحبہ (Usha Vance) سے ہوئی۔ مَیں نے اُن کا ہاتھ تھاما اور صدقِ دِل سے اُنہیں بتایا، ''مجھے نہیں معلوم کہ مَیں اِس صدمے سے کیسے نکل پاؤں گی۔''

جب بھی تُم اپنے بچوں کے ساتھ ہوائی جہاز میں سفر کرتی ہو، اور آخری 15 منٹ کی فلائیٹ باقی رہ جاتی ہے اور سب کچھ نہایت عجلت میں سمیٹنا پڑتا ہے — تُم اِن 15 منٹ سے بھی گزر جاؤ گی اور اُس کے بعد اگلے 15 منٹ سے بھی۔

سب سے بڑھ کر، اِن پچھلے دس دِنوں میں، مَیں نے خُدا کے رحم اور اُس کی محبت کو اپنے اوپر گویا نچھاور ہوتے ہوئے دیکھا ہے۔ چارلیؔ کے قتل کے بعد، ہم نے کہیں کوئی پُرتشدد واقعہ نہیں دیکھا۔ بلکہ، ہم نے عین وہی چیز دیکھی ہے جسے اِس ملک میں دیکھنے کے لئے میرے شوہر ہمیشہ دُعا کیا کرتے تھے — ہم نے بیداری کی ایک بہت بڑی لہر اُٹھتی ہوئی دیکھی ہے۔

• لوگوں کو دہائیوں کے بعد پہلی مرتبہ بائبل مقدس کھولتے ہوئے دیکھا
• بچپن کے بعد آج پہلی بار دُعا کرتے ہوئے دیکھا
• بہتیروں کو اپنی پوری پوری زندگی میں پہلی بار چرچ سروس میں شریک ہوتے ہوئے دیکھا

چارلیؔ کو روزنامچہ (ڈائری) لکھنے کی عادت تھی جس میں وہ خاص خاص لمحات اور متاثر کن اقوال کو یاد گار کے طور پر قلمبند کیا کرتے تھے۔

ہر بار جب بھی آپ کوئی فیصلہ کرتے ہیں تو وہ آپ کی روح پر ایک گہرے نقش کی طرح ثبت ہو جاتا ہے۔

آپ میں سے وہ سب جنہوں نے ابھی ابھی فیصلہ کر کے ایک روحانی زندگی کی طرف قدم بڑھایا ہے، مَیں شکریہ ادا کرتے ہوئے آپ کو خوش آمدید کہتی ہوں۔ آپ سب جو پہلے سے ایماندار ہیں، اِن نئے ایمانداروں کی گلہ بانی کرنا اب آپ کا کام ہے۔ اِسے معمولی خدمت مت سمجھیں۔ اِن کے ایمان کے بیج کو پانی دیجئے، اِس کی حفاظت کیجئے، اور اِسے بڑھنے میں مدد کیجئے۔

• بلاناغہ دُعا کریں
• ہر روز بائبل پڑھیں
• اگلے اتوار کو ضرور چرچ جائیں اور پھر اُس سے اگلے اتوار بھی
• اِس دُنیا کی آزمائشوں اور زنجیروں سے خود کو آزاد رکھیں

چارلیؔ کو یہ سب باتیں بخوبی معلوم تھیں اور اُنہوں نے اپنی زندگی کے پورے سفر میں اِس صلیب کو خوشی خوشی اُٹھائے رکھا۔ اگرچہ چارلیؔ بہت کم عمری میں خداوند کے پاس چلے گئے مگر وہ اِس کے لئے بھی تیار تھے۔ کوئی چیز ایسی نہیں تھی جسے وہ چھوڑنے پر آمادہ نہیں تھے۔ اُنہوں نے کسی پچھتاوے کے بغیر دُنیا کو خیر باد کہا۔ اُنہوں نے ہر روز اپنی استعداد کے مطابق سو فیصد کام کیا۔

مگر مَیں آپ کو کچھ بتانا چاہتی ہوں، چارلیؔ اپنا کام ادھورا چھوڑ کر دُنیا سے رُخصت ہوئے، مگر اپنی خدمت ادھوری چھوڑ کر نہیں۔

ہر سنیچر، چارلیؔ مجھے ایک عدد محبت نامہ بھیجنا کبھی نہیں بھولتے تھے۔ ہر محبت نامے میں، وہ اپنی ہفتہ بھر کی نمایاں باتوں کا ذکر کرتے، میرے اور بچوں کے لئے خداوند کی شکرگزاری کرتے اور آخر پر ہمیشہ یہ بات ضرور کہا کرتے تھے:

پلیز مجھے ضرور بتانا کہ مَیں بطور شوہر تمہارا مزید بہتر خیال کیسے رکھ سکتا ہوں۔

مَیں چارلیؔ کی رازدار تھی، اُن کی امانتوں کی امین، اُن کی قریبی ترین اور سب سے زیادہ قابلِ بھروسہ مشیر، اور بہترین دوست تھی۔ مَیں اُن پر اپنی جان چھڑکتی تھی، اُن کے ساتھ گہری محبت رکھتی تھی، اور ہر معاملے میں اُن کو سہارا دیتی تھی کیونکہ اُن کی محبت مجھے ایک بہتر بیوی بننے کی تحریک دیتی تھی۔

دُنیا بھر سے جتنے شوہر میری بات سُن رہے ہیں، اُن سے مَیں یہی کہوں گی کہ چارلیؔ کے چیلنج کو قبول کیجئے۔ حقیقی مسیحی مردانگی کا مظاہرہ کریں۔

• اپنے گھرانوں کے لئے مضبوط اور دلیر بنیں
• اپنی بیوی سے محبت رکھیں اور اُن کی رہنمائی کریں
• اپنے بچوں سے پیار کریں اور اُن کی حفاظت اور دیکھ بھال کریں
• اپنے گھر کے روحانی سربراہ بنیں اور ایک قابلِ تقلید قائد بھی بنیں
• یاد رکھیں: آپ کی بیوی آپ کی خادمہ یا غلام نہیں — وہ آپ کی مددگار ہے

خواتین، آپ کو بھی مَیں یہ چیلنج دینا چاہتی ہوں کہ نیکوکار بیوی بنیں۔ جو کردار نبھانے کے لئے خُدا نے ہمیں بنایا ہے وہی ہماری اصل طاقت ہے۔

• اپنے شوہروں کی حفاظت کریں، اُن کی ہمت افزائی کریں اور اُن کا خیال رکھیں
• اپنے دِل کی خوب حفاظت کریں کیونکہ سب کچھ دِل سے ہی نکلتا ہے
• اگر آپ ماں ہیں تو جان لیں کہ آپ کا گھر ہی آپ کی واحد اور سب سے اہم خدمت ہے
• گھر کو شوہر کے لئے سکون اور آرام کی جگہ بنائیں

میرا شوہر اُس نوجوان جیسے سب نوجوانوں کو بچانا چاہتا تھا جس نے اُن کی جان لے لی۔ وہ آدمی ۔۔۔ اُس نوجوان آدمی کو ۔۔۔ مَیں اُسے معاف کرتی ہوں! مَیں اُسے اِس لئے معاف کرتی ہوں کیونکہ مسیح نے بھی یہی کِیا تھا، اور چارلیؔ بھی یہی کرتے۔ نفرت کا جواب نفرت نہیں۔ انجیل ہمیں محبت کرنا سکھاتی ہے کہ اپنے دشمنوں سے بھی محبت رکھو اور اپنے ستانے والوں سے بھی۔

دُنیا کو Turning Point USA کی ضرورت ہے۔ اِسے ایک ایسے گروپ کی ضرورت ہے جو نوجوانوں کو بدحالی اور گناہ سے نکال کر مسیح کی سچائی، خوبصورتی اور زندگی کی راہ دکھائے۔ ہماری خدمت کا ہر ایک شعبہ اب مزید بڑھے گا۔ Turning Point USA کی نئی سی ای او بننا میرے لئے ایک بہت بڑے اعزاز کی بات ہے۔ چارلیؔ اور مَیں اپنے مقصد میں پوری طرح متحد تھے۔ اُن کا جذبہ میرا جذبہ تھا اور اب اُن کا مشن میرا مشن ہے۔

• ہزاروں کی تعداد میں نئے سینٹر کھلیں گے
• TPUSA Faith کے اندر ہزاروں کی تعداد میں نئے پاسبانوں اور نئی جماعتوں کا اضافہ کیا جائے گا
• کالجوں اور یونیورسٹیوں میں منعقد کئے جانے والے مناظرے، مباحثے، اور مکالمے جاری رہیں گے
• کوئی قاتل ہمیں اظہارِ رائے و ایمان کے حقوق کا دفاع کرنے سے نہیں روک سکتا

اِس وقت جب مَیں یہاں کھڑی ہوں تو میرے شوہر کی یہ خوبصورت تصویر میرے بالکل سامنے ہے اور مجھے تیرہ سال پہلے والے چارلیؔ کی یاد دلاتی ہے — جب اُن کی عمر اٹھارہ برس تھی، ابھی کالج سے فارغ التحصیل بھی نہیں ہوئے تھے، اُن کی جیب میں ایک ڈالر اور اُن کے فون میں رابطے کا کوئی ایک بھی نمبر نہیں ہوتا تھا مگر وہ آر این سی کی راہداریوں میں بھاگتے پھرتے تھے۔ لوگ کہتے تھے کہ اِس لڑکے کو کچھ معلوم نہیں کہ وہ کیا کر رہا ہے، مگر اُنہیں سب پتہ تھا۔ وہ دُنیا کو بدلنے جا رہے تھے۔ اور اُنہوں نے ایسا کر دکھایا۔

چارلیؔ کی زندگی اِس مُلک کے لئے ایک نیا موڑ تھی۔ اُن کی زندگی ایک معجزہ تھی۔ آئیے اِس معجزے کو اپنی زندگی کے لئے بھی ایک نیا موڑ بنائیں۔

• آج ہی سے دُعا کرنے کا چناؤ کریں
• دلیری، خوبصورتی اور مہم جوئی کا انتخاب کریں
• خاندان اور ایمان کی زندگی گزارنے کا فیصلہ کریں
• سب سے بڑھ کر مسیح کا انتخاب کریں

چارلیؔ بے بی، مَیں آپ سے پیار کرتی ہوں، اور مَیں آپ کا سر فخر سے بلند کروں گی۔

خُدا آپ سب کو برکت دے، اور خُدا امریکہ کو برکت دے۔