Hudson Taylor ki zindagi par mabni yeh kahani poori duniya mein bari mashhoor hui. Jab woh abhi 15 saal ke thay to aik kaleesiyai ibaadat ke dauran unhon ne dekha ke hadiye ki thaali har qataar mein se guzar rahi hai aur log mukhtalif raqam is mein daal rahe hain. Naujawan Hudson ka dil bhar aaya kyun ke us waqt un ki jeb mein aik phooti kauri bhi nahin thi jise woh hadiye mein daal sakte. Jab hadiye ka thaal un ke paas pohncha to woh khamoshi se uthay aur hadiya uthaanay walay shakhs ke peechhe peechhe chalne lagay. Jab hadiye ka thaal stage par pohnch gaya to unhon ne woh thaal uthaya, usey farsh par rakh diya aur us ke andar kharay ho gaye aur sab logon ke saamne elaan kiya ke main apne aap ko Khuda ki khidmat ke liye hadiye ke taur par pesh karta hoon. Baad azaan, Taylor ne kaha: “Mujhe achhi tarah yaad hai ke jab main ne apni zindagi ko Khudawand ki khidmat ke liye waqf kiya tha to main ne apne wajood, apni zindagi, apne doston, apna sab kuch mazhbah par rakh diya tha aur isi waqt mera dil aik gehre itminaan aur tasalli se bhar gaya jis ke baais mujhe mehsoos hua ke Khuda ne mere hadiye ko qubool kar liya hai. Khuda ki huzoori baray zor aur quwwat ke saath mere oopar chha gayi aur main khud aik nanhay bachay ki tarah mehsoos karne laga. Is ehsaas ko haasil karte hi main zameen par chaaron shanay chit ho gaya aur aik ajeeb si khushi ke saath us ki shukarguzaari karne laga.”